Co tracta la SRG SSR l'intelligenza artifiziala

L'IA è ina tecnologia che sa sviluppa vinavant a moda rasanta e che influenzescha gia oz fermamain il mintgadi da lavur. Dapi la primavaira 2023 datti ina taskforce d'IA cun represchentant:as da tut las unitads d'interpresa ch'examineschan il potenzial da questa tecnologia per la SRG SSR. En in emprim pass ha la taskforce elavurà princips co tractar l'intelligenza artifiziala che suttastritgan trais puncts essenzials: Primo: la responsabladad co duvrar l'IA ha adina l'uman. Secundo: cuntegns creads essenzialmain cun IA ston vegnir marcads a moda correspundenta e transparenta. E terzo: datas protegidas na dastgan betg vegnir elavuradas cun utensils d'IA per pudair garantir la confidenzialitad. 

Schanzas e ristgas da l'IA per la SRG SSR

L'intelligenza artifiziala permetta da far pli effizients ils process da lavur. La tecnologia basada sin datas po vegnir utilisada en tut ils secturs da la SRG SSR: da la planisaziun sur la producziun e distribuziun dals cuntegns fin a l'evaluaziun da success ed a la direcziun generala da las purschidas. La taskforce d'IA lavura actualmain vi dad ina emprima survista cumplessiva cun la finamira d'illustrar il niz d'utensils d'IA e da preschentar ils custs e ristgs respectivs. Per impedir il privel da donnegiar la credibilitad da la SRG SSR cun utilisar utensils d'IA succeda quai mo pass per pass e cun immensa precauziun. Mesiras concretas che las persunas responsablas vulan proponer en il decurs da l'onn duain silsuenter vegnir realisadas successivamain. 

Champs d'acziun actuals en la SRG SSR

Las unitads d'interpresa da la SRG SSR fan diever gia oz d'utensils d'IA, per exempel per transcriver automaticamain cuntegns d'audio-video, tranter auter era dialects dal tudestg svizzer pledads en tudestg da standard scrit. RTS examinescha cun agid d'IA quant enavant che las schlattainas vegnan tractadas egualmain en la televisiun. SRF examinescha utensils d'IA per converter texts per differents chanals e per intercurir pli efficaziamain gronds quantums da videos. RSI profita da l'IA per chapir meglier il cumportament d'utilisadras e d'utilisaders da la nova app da novitads e sport. Ultra da quai vegn actualmain programmà per tut las unitads d'interpresa in utensil ch'è bun d'extrair automaticamain miniaturas da videos.