Diversitad ed inclusiun
Ils umans en Svizra èn fitg divers: nossa finamira èsi da represchentar questa diversitad e d'integrar ils differents interess e munds da viver en nossa purschida. Nus vulain inscuntrar tut ils umans cun respect e na vulain discriminar nagin. Nus essan sezs part da questa societad diversa e vulain rinforzar la diversitad e l'inclusiun en nossa lavur da mintgadi.
Dapi il 2020 avain nus in Diversity Board naziunal. El accumpogna nus sin la via a dapli diversitad ed a cundiziuns da lavur inclusivas. Il Diversity Board definescha la diversitad e l'inclusiun a moda cumplessiva: tut las collavuraturas e tut ils collavuraturs duain avair ils medems dretgs al plaz da lavur, independentamain da lur caracteristicas persunalas sco la schlattaina, la vegliadetgna, l'origin, la religiun, l'orientaziun sexuala, il model da viver u restricziuns.
La diversitad è francada en plirs lieus en la strategia d'interpresa e da purschida da la SSR. La strategia determinescha che la SSR vul esser ina patruna attractiva per tut las collavuraturas e tut ils collavuraturs sco era per tut ils candidats e las candidatas. La stima ed il respect vicendaivel durant la lavur sco era envers noss public ed il resguard conscient da la diversitad e da l'inclusiun duain augmentar la qualitad da la lavur quotidiana ed esser ina part essenziala da la DNA da nossa interpresa.
Uschia vivain nus la diversitad e l'inclusiun
Nus francain en l'interpresa il tema diversitad ed inclusiun
- Grazia al Diversity Board naziunal vegnan las finamiras da la diversitad realisadas a moda pli impegnativa – tranter auter cun francar la diversitad en la strategia d'interpresa e da purschida.
- Dapi la primavaira 2021 avain nus in post spezialisà per la diversitad e l'inclusiun. A partir dal schaner 2022 creain nus ulteriurs posts spezialisads regiunals per la diversitad e l'inclusiun.
- Dapi l'entschatta 2021 reglescha nossa lingua d'interpresa ch'il gender sto vegnir resguardà en tut las formulaziuns.
- Cun l'iniziativa «schanza 50:50» vulan las redacziuns cuntanscher che tuttina bleras dunnas sco umens vegnian a pled sco expertas ed experts.
- Il Diversity Board fa part da la Gender Equality Steering Group da la European Broadcasting Union (EBU) che s'engscha per la diversitad ed il resguard dal gender en chasas da medias da dretg public.
- Nus essan commembers da la rait da firmas «Advance». La rait s'engascha per in augment cuntinuant da la quota da dunnas en posiziuns da cader. «Advance» porscha era lavuratoris, programs da mentoring ed occurrenzas da networking.
Nus creain models da lavur flexibels e pajain pajas gistas
- Cun il model «Work Smart» creain nus las cundiziuns da basa per lavurar independentamain dal temp e dal lieu. Uschia sustegnain nus tant la lavur en il biro a chasa sco era la lavur a temp parzial. Nus na publitgain naginas plazzas mo pli cun in pensum da 100 pertschient. Il pensum maximal è adina tranter 80 e 100 pertschient.
- Nus ans engaschain per ina represchentaziun equilibrada da las schlattainas. La quota da dunnas en il cader munta actualmain a 30 pertschient. Nus ans stentain d'augmentar vinavant questa quota.
- Cun suttascriver la «Charta per l'egualitad da las pajas» il december 2019 renconuschain nus il princip da la «medema paja per la medema lavur».
«Dapli diversitad en la SSR è mo pussaivel, sche nus ans engaschain tuts ensemen per cuntanscher questa finamira. Mintgina e mintgin da nus po avair ina rolla activa e contribuir insatge.»
