Resultat annual SRG SSR 2022: in onn captivant e pretensius

La SRG SSR guarda enavos sin onn turbulent cun diversas sfidas. Strusch che la pandemia da Covid-19 è stada surmuntada, ha l'attatga guerrila russa cunter l'Ucraina procurà – ultra da l’immensa suffrientscha umana – per la proxima crisa mundiala. Las redacziuns da tut las unitads d'interpresa da la SRG SSR rapportan davart questa guerra dapi l'entschatta cun lur rait da correspundentas e correspundents internaziunala ed in grond dumber da correspundentas e correspundents spezials. Ils eveniments vegnan giuditgads e situads en il context en fitg buna qualitad. La confidenza en ils programs da la SRG SSR è restada sin in aut nivel era l'onn 2022.

Las consequenzas da questa crisa internaziunala per la SRG SSR èn multifaras e na sa fan betg valair tuttas il medem mument. L'augment drastic dals pretschs da carburant ha, per far in exempel, in'influenza plitost pitschna sin ils custs, entant ch'ins vegn a sentir l'augment dals pretschs d'electricitad pir l'onn da rapport 2024 cun custs supplementars da plirs milliuns. 

Il pli grond effect immediat sin la SRG SSR han però gì las fermas turbulenzas sin ils martgads da finanzas: il grad da cuvrida da la cassa da pensiun da la SRG SSR è ad interim stà var 20 pertschient pli bass che al cumenzament da l'onn. En il fratemp è la situaziun puspè sa stabilisada in pau, ma quest punct vala anc adina sco grond ristg finanzial da la SRG SSR e vegn observà correspundentamain.

In onn sportiv

Il trend dals retgavs tut en tut regressivs da las entradas da reclama e da sponsuradis ha pudì vegnir franà l'onn da rapport. Ils motivs èn il grond radius ed ils programs che han survegnì ina fitg gronda attenziun. En pli èsi stà positiv ch'igl ha dà suenter il 2021 era l'onn 2022 duas occurrenzas sportivas grondas: ils gieus olimpics d'enviern a Peking ed il campiunadi da ballape en il Qatar. Damai ch'i na vegn a dar il 2023 naginas occurrenzas sportivas grondas ston ins quintar cun in regress in pau pli ferm dals retgavs commerzials.

Als gieus olimpics d'enviern a Peking ha la SRG SSR puspè pudì producir il signal mundial da las cursas da skis alpinas e quai ha purtà pli auts retgavs da servetschs. Il regress da l'ulteriur retgav da manaschi è da motivar cun il fatg ch'ins ha vendì l'onn passà cleramain pli paucas immobiglias.

Quotas d'aspectaturas e d'aspectaturs solidas

Malgrà ch'ils programs da radio e televisiun vegnan consumads en general pli pauc en lur diffusiun lineara e malgrà la concurrenza internaziunala massiva, èn las parts dal martgà dals emetturs da la SRG SSR restadas tut en tut stabilas il 2022. Sin il sectur da la televisiun han per exempel ils emetturs da SRF cuntanschì ina part al martgà da 33,4 pertschient (onn precedent 33,5 pertschient), il radio ha cuntanschì 52,3 pertschient (onn precedent 53,7 pertschient). Tar RTS importa la part al martgà da la televisiun il 2022 29,7 pertschient (onn precedent 29,6 pertschient) e dal radio 39,2 pertschient (onn precedent 41,1 pertschient). Era RSI ha pudì mantegnair sia part al martgà cun 29,5 pertschient tar la televisiun (onn precedent 30,5 pertschient) e cun 58,3 pertschient tar il radio (onn precedent 57,7 pertschient). Er il radius da las purschidas online è stà stabil. Il servetsch online internaziunal SWI swissinfo.ch ha dublegià durant la pandemia sias visitas annualas da 35 sin 70 miliuns ed ha pudì salvar il 2022 63 milliuns da quellas.

Custs stabils

Ils custs èn restads stabils il 2022 en cumparegliaziun cun l'onn precedent. Sin fundament d'ina rectificaziun da valurs necessaria da la reserva da la contribuziun da la patruna da 35 milliuns francs èn ils custs da persunal stads pli auts. Perquai ch'ins ha desistì d'in diever cundiziunà han ins pudì augmentar il grad da cuvrida da la cassa da pensiun per bundant in punct procentual. Quai ha gidà dad evitar ina sanaziun imminenta.

Tut en tut sa preschentan las expensas per il manaschi praticamain nunmidadas en cumparegliaziun cun l'onn precedent e per 0,8 pertschient pli bassas che l'onn da referenza 2019.

Per garantir il manaschi – almain minimalmain – er en cas d'ina stgarsezza d'electricitad acuta u perfin d'in blackout ha la SRG SSR meglierà ses access als agregats d'electricitad d'urgenza. Ils indrizs existents èn vegnids examinads per esser da la vart segira en il cas da basegn ed ins ha cumprà capacitads supplementaras per garantir il provediment cun current electric.

Projects d'immobiglias

A Turitg Leutschenbach è vegnida averta l'avust la nova Radio Hall. Radio SRF è ussa pia era da chasa sin il Campus Leutschenbach. La Radio Hall è oriundamain stada ina halla per ils vehichels da producziun e per ils camiuns da transmissiun. Grazia a l'utilisaziun da la substanza architectonica existenta èsi stà pussaivel da construir cun expensas finanzialas avantagiusas ina nova immobiglia da producziun. Suenter questa renovaziun han ins pudì vender l'immobiglia a la Brunnenhofstrasse a Turitg a la donatura dal dretg da construcziun. Là vegn bajegiada ina chasa da scola per il stgalim secundar cun utilisaziuns supplementaras da la citad da Turitg.  

Il project per ina construcziun nova a Losanna ed il project da renovaziun a Comano progredeschan tenor plan. La stgarsezza da tschertas materias primas e la chareschia en l'entir mund chaschunan custs da construcziun in pau pli auts. Custs d'amortisaziun levamain pli auts pudessan esser la consequenza.