Project da radio da la SRG SSR: Chantez-vous Suisse? – «Die anderen, les autres, ils auters, gli altri» sin il Pass dal Son Gottard!
La gruppa naziunala da radio da la SRG SSR «Die Anderen – Les autres – Gli altri – Ils auters» raduna tschintg musicistas e muscists svizzers sin il Pass dal Son Gottard, in lieu da gronda impurtanza istorica: en il rom dal project da radio «Chantez-vous Suisse?» che dura in'emna vegnan interpretadas da nov chanzuns da las quatter regiuns linguisticas da la Svizra. Il punct culiminant è in concert cuminaivel che ha lieu la fin da l'emna e che vegn emess al radio.
Foto: SRG SSR
En il rom da «Chantez-vous Suisse?», il project da radio da la SRG SSR che vegn realisà per l'emprima giada dals 26 fin ils 30 da zercladur 2023, passentan tschintg musicistas e musicists cuminaivlamain in'emna en l'ospizi sin il Pass dal Son Gottard. Quatter da las persunas represchentan mintgamai ina regiun linguistica da la Svizra. La tschintgavla persuna represchenta ils umans en Svizra cun ina biografia da migraziun. La finamira cuminaivla è da cumponer ina nova chanzun en quatter resp. tschintg linguas che represchenta e che tematisescha la plurilinguitad da la Svizra. Plinavant portan tut las musicistas e tut ils musicists cun els ina tipica chanzun da lur regiun linguistica. En il decurs da l'emna vegnan quellas chanzuns tematisadas ed interpretadas a moda plurilingua. Uschia pussibilitescha il project in'invista culturala e musicala en las regiusn linguisticas respectivas ed intermediescha lur tratgs cuminaivels resp. las differenzas.
Las Svizra tudestga represchenta Christoph Trummer (chantautur, musicist, autur e lobist da cultura) e la Svizra franzosa Marc Aymon (chantadur, ghitarrist, cumponist). La musicista Chiara Dubey represchenta la Svizra taliana, il chantautur, musicist «Mattiu» (Mattiu Defuns) la Svizra rumantscha e la rappunza e chantautura svizra-dominicana «La Nefera» (Jennifer Perez) represchenta las persunas en Svizra cun ina biografia da migraziun.
Temps d'emissiun dals 26 fin ils 30 da zercladur 2023:
Ils emprims quatter chanals da radio da la SRG SSR (Radio SRF1, RTS La Première, Rete Uno e Radio RTR) rapportan durant emissiuns en directa dal Pass dal Son Gottard. Las audituras ed ils auditurs han uschia la chaschun da persequitar la lavur en il «camp da musica», d'emprender d'enconuscher las artistas ed ils artists e d'udir istorgias en connex cun quel lieu plain simbolica. Il punct culminant dal project è il concert sin il pass che vegn tematisa en las emissiuns spezialas:
- Radio SRF 1: 26/27/29/30 da las 10:00-11:00
- RTS La Première: mintga di da las 15:00-16:00
- Radio RTR: mintga di da las 16:00-17:00
- Rete Uno: mintga di trais reportaschas en directa tranter las 14:00-15:00, emissiun da highlight la sonda, ils 01 da fanadur 13:00 – 14:00
Ultra da quai emetta RTR venderdi, ils 30-6-2023 en il Telesguard ina contribuziun davart il concert final.
Contact
Post da medias da la SRG SSR
Edi Estermann
Tel. 058 136 21 21
medienstelle.srg@srgssr.ch
Contact
Post da medias RTR
Romana Costa
Tel. 079 653 13 82
romana.costa@rtr.ch
