Na a l’iniziativa «200 francs bastan!» – gea ad ina ferma SRG SSR enragischada en las regiuns

Cun la decisiun dad oz è il suveran svizzer s’exprimì cunter l’iniziativa «200 francs bastan!» ed en favur da la SRG SSR sco interpresa da service public cun in program multifar en tut las regiuns linguisticas, enragischada en las regiuns e damanaivla dals umans. Las votantas ed ils votants conferman uschia l’impurtanza d’ina ferma plazza da medias svizra cun ina SRG SSR independenta e sustegnan sia incumbensa en l’èra digitala. «Per l’avegnir da la SRG SSR è il di dad oz stà decisiv. Nus ans legrain fitg ch’il suveran svizzer ha demussà danovamain sia confidenza en nus», di il president dal cussegl d’administraziun da la SRG SSR Jean-Michel Cina. «Nus essan levgiads ch’igl è reussì a nus da far visibla la plivalur da la SRG SSR per l’entira Svizra.» 

Per la segunda giada en paucs onns è la populaziun s’exprimida a l’urna cunter in indebliment da la SRG SSR. Las discussiuns correspundentas davart il budget da la SRG SSR e la concepziun dal service public medial en Svizra han mussà ch’ina maioritad da la populaziun vul ina SRG SSR persistenta, regiunala e digitala ch’è relevanta en il mintgadi dals umans e che sa sviluppa vinavant. Era per la plazza da medias en total signifitgescha questa decisiun stabilitad.  

La SRG SSR ha survegnì in vast sustegn da tut las parts da la societad – da persunas privatas, persunas dal sport, da la cultura, scienza, politica e da bleras autras – ed ella engrazia a tut las persunas ch’èn sa messas en cun grond engaschi las ultimas emnas ed ils davos mais per il service public. La debatta intensiva en tut las regiuns linguisticas e las numerusas posiziuns publicas e persunalas en favur d’in ferm service public medial han mussà l’auta valur che la SRG SSR ha per ils umans en Svizra.  

«Il resultat da la votaziun fa plaschair, motivescha ed oblighescha nus. Nus vegnin a far tut il pussaivel per accumpagnar vinavant il mintgadi dal public cun in program multifar e ferm», di la directura generala Susanne Wille. «Nus restain damanaivel dals umans, tant cun esser preschents en las regiuns linguisticas sco er en il spazi digital. E nus cuntinuain cun la transfurmaziun da la SRG SSR instradada». 

Dapi il 2024 sa chatta la SRG SSR cun «Enavant» en in process da transfurmaziun fundamental. La SRG SSR vegn a realisar questa transfurmaziun cun cumplain engaschi ed ad adattar ils proxims trais onns sias structuras internas, rinforzar sia purschida e promover vinavant la digitalisaziun.