Mario Timbal daventa directur da RSI

Communicaziuns a las medias 11.12.2020

Il cussegl d'administraziun da la SRG SSR ha suandà la proposta da la suprastanza regiunala da la Società cooperativa per la Radiotelevisione svizzera di lingua italiana (Corsi) ed ha elegì a chaschun da sia sesida dals 11 da december Mario Timbal sco nov directur da Radiotelevisione svizzera di lingua italiana (RSI). Timbal – naschì en il Tessin, anteriur Chief Operating Officer dal Locarno Film Festival e directur operativ actual d'ina fundaziun culturala ad Arles – surpiglia sia nova funcziun tar RSI la primavaira 2021.

Il cussegl d'administraziun da la SSR elegia la direcziun da RSI. Quai fa el sin proposta da la Società cooperativa per la Radiotelevisione svizzera di lingua italiana (Corsi) e tenor cunvegnientscha cun il directur general da la SSR Gilles Marchand. Mario Timbal ha persvas las commembras ed ils commembers da la Corsi en la procedura da nominaziun cun sia sensibilitad per la dimensiun culturala da la Svizra taliana e cun sia gronda rait en circuls culturals e medials. La Corsi è en pli persvasa che Mario Timbal portia a RSI novas experientschas grazia a sia persunalitad integrativa ed a sias abilitads en il management da team.

Tenor cunvegnientscha cun il directur general da la SSR, Gilles Marchand, surpiglia Mario Timbal, 43, la direcziun da RSI la primavaira 2021. Fin lura maina Maurizio Canetta, 64, vinavant l'interpresa. Canetta ha annunzià sia demissiun la stad 2020 per l'emprima mesadad da l'onn 2021 – quai suenter 40 onns tar RSI e sis da quels sco directur. Sin quai ha la SSR instradà ina procedura ordinaria per reglar sia successiun.

Mario Timbal è naschì il 1977 a Locarno en il Tessin. Suenter il studi da scienzas litteraras a Losanna lavura el dal 2005 fin il 2007 sco schurnalist tar il «Corriere del Ticino» a Lugano. Fin il 2009 è el Business Development Manager tar la Cannondale Cycling Group e collavura a partir dal 2009 en diversas funcziuns al Locarno Film Festival. L'emprim è el responsabel per il marketing ed il sponsoring, dal 2013 fin il 2017 sco Chief Operating Officer da quels secturs. Il 2017 surpiglia el la direcziun operativa da la fundaziun culturala Luma ad Arles en la Frantscha dal Sid. Mario Timbal è maridà e bab da dus uffants.

Luigi Pedrazzini, il president da la Società cooperativa per la Radiotelevisione svizzera di lingua italiana (Corsi) e vicepresident dal cussegl d'administraziun da la SSR: «Enfin la fin n'èsi betg stà simpel per la Corsi da tscherner tranter las annunzias da candidatas e da candidats fitg qualifitgads. Jau sun però persvas che nus avain fatg ina fitg buna schelta ed jau ma legrel sin la collavuraziun cun Mario Timbal, tant tar RSI sco er en il cussegl d'administraziun da la SSR.»

Il directur general da la SSR Gilles Marchand: «Jau ma legrel da dastgar beneventar Mario Timbal en il comité directiv da la SSR. Sias experientschas en il management da cultura, sia cumpetenza sociala e ses bun sentiment per ils basegns da la Svizra taliana vegnan ad esser da grond avantatg en questa fasa da transfurmaziun da la SSR e consequentamain era da RSI. A Maurizio Canetta engraziel jau gia oz per ses grond engaschi da plirs onns en favur da RSI. Enfin la surdada d'uffizi hai jau era vinavant cumplaina confidenza en el.»

Mario Timbal davart sia elecziun: «Jau ma legrel da turnar en il Tessin e da surpigliar la direcziun da RSI. Jau poss strusch m'imaginar in'incumbensa pli motivanta che contribuir al rinforzament dal service public e manar RSI tras questa fasa da midada a la transmedialitad – e quai cun esser conscient da las sfidas enormas ch'èn colliadas cun questa incarica.»
 

Contact:

Luigi Pedrazzini, President da la Corsi, Luigi.Pedrazzini2(at)rsi.ch, 058 135 92 61
Pelin Kandemir Bordoli, Vicepresidenta Corsi, info(at)corsi-rsi.ch, 079 458 09 92
Edi Estermann, manader dal post da medias SSR, medienstelle.srg(at)srgssr.ch, 058 136 21 21