Larissa M. Bieler daventa directura da SWI swissinfo.ch
La Grischuna Larissa M. Bieler surpiglia per il 1. d'october 2018 sper sia incumbensa actuala da schefredactura da SWI swissinfo.ch er la direcziun da SWI a Berna.
Il cussegl d'administraziun da la SSR ha elegì sin giavisch dal directur general Gilles Marchand a chaschun da sia sesida dals 19 da settember Larissa M. Bieler sper sia funcziun da schefredactura sco nova directura da SWI swissinfo.ch. La funcziun dubla vegn pussibilitada cun ina nova organisaziun dal team da direcziun SWI. Reto Gysi da Wartburg è il schefdirectur remplazzant da Larissa Bieler, Peter Zschaler resta directur remplazzant.
Larissa Bieler è vegnida elegida il zercladur 2015 sco schefredactura da SWI swissinfo.ch ed è entrada l'entschatta 2016 en uffizi. Bieler ha intensivà tematicamain il profil internaziunal da la plattafurma da diesch linguas – cun temas centrals sco la democrazia directa, Genevra internaziunala u l'expertisa globala da la Svizra. Ella ha rinforzà cun furmar communitads universalas la relaziun cun gruppas specificas d'utilisaders, Larissa M. Bieler latiers: «La Svizra è connectada bain globalmain, inspirescha l'exteriur, ha influenza e dependa da l'exteriur. Qua ans pudain nus profilar cun ina perspectiva svizra independenta ed ans posiziunar schurnalisticamain bain cun in'infurmaziun fidada».
Gilles Marchand: «Jau sun fitg cuntent che nus avain pudì gudagnar cun Larissa Bieler ina schurnalista versada e connectada stupent sco nova directura. Ella vegn a sviluppar vinavant il servetsch internaziunal da la SSR etablì fitg bain.»
Larissa M. Bieler ha studegià germanistica, scienzas economicas e politica a l'Universitad da Turitg. Avant e durant las dimoras da studi a Paris ed a Mannheim ha ella lavurà sco collavuratura libra tar il Bündner Tagblatt e diversas medias grischunas. Il fanadur 2013 ha Bieler surpiglià la schefredacziun dal Bündner Tagblatt ch'ella ha posiziunà nov grazia a grondas mesiras da reorganisaziun.
SWI swissinfo.ch ademplescha dapi passa diesch onns l'incumbensa d'infurmaziun a l'exteriur surdada da la Confederaziun e cumplettescha cun quai la purschida online da las staziuns da radio e televisiun da la SSR. Il servetsch SSR sa drizza oz en emprima lingia ad in public internaziunal che s'interessa per la Svizra ed a las Svizras ed als Svizzers a l'exteriur. La plattafurma intermediescha ina vista generala specificamain svizra ed er posiziuns svizras davart eveniments e svilups internaziunals. En pli reflectescha SWI la vista da l'exteriur sin la Svizra e sias posiziuns. Ils accents tematics metta SWI sin la politica, l'economia, la cultura, la societad e la scienza. SWI swissinfo.ch ha filialas a Berna (sedia principala), a Genevra ed a Turitg. Ulteriuras plazzas da lavur sa chattan en il center da producziun Chasa federala a Berna.
Post da medias SRG SSR
Edi Estermann
Medienstelle.srg(at)srgssr.ch / Tel. 031 350 95 95
