La SSR il 2021: er durant in onn pretensius è ella finanzialmain e strategicamain sin buna via

Communicaziuns a las medias 14.04.2022

La SSR concluda l'onn 2021 cun in resultat d'interpresa positiv da 10,3 milliuns francs. Cun realisar consequentamain las mesiras per sbassar ils custs iniziadas il 2018 ha la SSR pudì far ulteriurs pass per stabilisar sia situaziun finanziala.

La SSR il 2021: er durant in onn pretensius è ella finanzialmain e strategicamain sin buna via

La SSR guarda enavos sin in onn animà e puspè pretensius ch'è vinavant stà marcà fitg da la pandemia da Covid-19. Las contribuziuns en il sectur da novitads han registrà fitg autas quotas da participaziun al martgà ed ina ordvart buna derasaziun, quai ch’ha era manà en il rom d'in program pli attractiv a pli autas entradas commerzialas che l'onn precedent. Il trend dals retgavs en general degressivs cuntinuescha dentant. Las entradas da las reclamas da televisiun èn il 2021 cun 164,1 milliuns francs per 14,7 milliuns francs pli bassas cumpareglià cun l’onn 2019.

Ils gieus olimpics da stad a Tokio, ils Campiunadis europeics da ballape en divers pajais da l'Europa ed ils Campiunadis mundials da ski alpin e nordic ad Oberstdorf en Germania respectivamain a Cortina d'Ampezzo en l'Italia han bain chaschunà dapli custs, els han però er procurà per entradas commerzialas pli autas.

Giubileums, cooperaziuns, ina charta ed in nov contract collectiv da lavur CCL

Ses giubileum da 90 onns il 2021 ha la SSR festivà cun ina collecziun speziala da films documentars sin sia plattafurma da streaming Play Suisse. En pli ha era la Chadaina da Fortuna, il bratsch umanitar da la SSR, pudì festivar il 2021 ses giubileum da 75 onns. Grazia a la grondiusa solidaritad da la populaziun svizra durant tut quels onns han pudì vegnir finanziads cun passa 2 milliardas francs dapli che 5000 projects en Svizra ed a l'exteriur.

Malgrà las circumstanzas difficilas, èn la SSR ed il partenari social Sindicat svizzer dals meds da massa (SSM) s'accordads cun success il 2021 da far in nov contract collectiv da lavur (CCL) ch'è entrà en vigur il 1. da schaner 2022. Suenter interessantas discussiuns animadas en tut las regiuns linguisticas ha la SSR introducì ina charta da la collavuraziun cun nov princips da cumportament. Quella determinescha il cumportament e la collavuraziun entaifer la SSR. Ultra da la charta han il comité directiv ed il cussegl d'administraziun approvà in reglament davart la protecziun da l'integritad persunala sco er ina nova politica da persunal.

L'onn passà ha la SSR pudì prolungar ses contract cun l'UEFA che la dat il dretg da transmetter tut ils gieus da la squadra svizra da ballape dals umens fin il 2028. Medemamain ha la SSR pudì prolungar ses partenadi da contract cun l'Associaziun federala da lutga per ulteriurs sis onns fin almain l'onn 2028.

La plattafurma da streaming Play Suisse lantschada il 2020 ha pudì vegnir cumplettada vinavant, entant cumpiglia ella passa 3000 cuntegns cun suttitels u sincronisaziuns en las linguas naziunalas e dumbra 500'000 abunentas ed abunents. Play Suisse ha damai cuntanschì en l'emprim onn dapi sia fundaziun plaz dus da las plattafurmas da streaming consultadas il pli savens en Svizra. E mintga quarta minuta da l'utilisaziun surpassa gia ils cunfins da la regiun linguistica.

Er il 2021 ha la SSR investì en il rom dal «Pacte de l'audiovisuel» 32,5 milliuns francs en la cinematografia independenta en Svizra. Cun ils ulteriurs meds finanzials per novas serias e per il «Tatort» ha ses sustegn da la branscha da film importà en total perfin 50 milliuns francs.

La pandemia da Covid-19 ha danovamain influenzà la situaziun finanziala da la SSR

Cun returnar pass per pass almain per part a la normalitad èn ils custs da gestiun puspè s'augmentads respectivamain sa normalisads. Ils custs èn però anc adina per pauc pli bass che avant la pandemia, perquai che la SSR ha pudì realisar cleramain pli paucas producziuns.

La vendita da duas immobiglias a Turitg e Genevra che la SSR na duvrava betg pli per intents operativs ha manà a gudogns da contabilitad excepziunals da 38,4 milliuns francs. Quellas entradas han augmentà il resultat dal manaschi sin 48,7 milliuns francs. La SSR ha damai pudì rinforzar ses agen chapital suenter dus onns ch'èn stads marcads da perditas.

Senza resguardar il gudogn d'immobiglias extraordinari serra la SSR l'onn 2021 cun in resultat d'interpresa positiv da 10,3 milliuns francs.

L'ulteriura realisaziun consequenta da las mesiras per sbassar ils custs iniziadas il 2018 ha gidà da stabilisar vinavant la situaziun finanziala da la SSR. Era l'auzament da la cumpart da las taxas da medias per netto 48,8 milliuns francs ha contribuì fermamain a quel svilup. Cunquai che la SSR survegniva cun il sistem vegl da taxas (Billag) nov milliuns francs damain che cun il sistem nov (Serafe), è il retgav da las taxas per 39,8 milliuns francs pli aut che l'onn precedent.

La transfurmaziun da l'interpresa cuntinuescha era l'onn current. La SSR sto s'adattar vinavant a las relaziuns dal martgà ed a las modas d'utilisaziun ch'èn sa midadas ed a medem temp resguardar il rom finanzial che vegn adina pli stretg. Suenter ch'il program da spargn da 100 milliuns francs lantschà il 2018 ha pudì vegnir terminà l'onn 2020, ha la SSR stuì iniziar l'october 2020, sin fundament dal trend regressiv da las entradas commerzialas, in ulteriur program da spargn da 50 milliuns francs fin il 2024 ch'ella realisescha consequentamain.

Quint da gudogn e perdita 2021

Contact

Post da medias SSR
Edi Estermann
058 136 21 21
medienstelle.srg@srgssr.ch