La SSR avra ses archivs en instituziuns culturalas
La SSR dat ils 27 d'october, il Di mundial dal patrimoni audiovisual da l'Unesco, il culp da partenza per avrir ses archivs – quai fa ella ensemen cun la Fonoteca naziunala svizra (Uffizi federal da cultura) e Memoriav, l'Associaziun per il mantegniment da la memoria audiovisuala da la Svizra. Duas milliuns uras Svizra per guardar e tadlar.
Co èn sa midads suns, cuntradas, vitgs e citads, persunalitads svizras e rapports correspundents en il decurs dals ultims tschient onns en Svizra? A partir dals 27 d'october pon passa sessanta bibliotecas publicas, centers da documentaziun, universitads e scolas en tut las parts dal pajais laschar endrizzar in access da retschertga local als archivs digitals da la SSR sco er a las bancas da datas da la Fonoteca naziunala e da Memoriav. Lura pon scienziads, students, scolasts e persunas che s'interessan per l'istorgia contemporana tschertgar temas e chavazzins giavischads e guardar resp. tadlar ils documents respectivs. Las datotecas d'audio e video pon era vegnir utilisadas en l'instrucziun. En total vegnan rendidas accessiblas duas milliuns uras istorgia svizra.
Sco preannunzià fa la SSR uschia in ulteriur pass a l'avertura cumplessiva da ses archivs da radio e televisiun cun cuntegns che van enavos fin il cumenzament dals onns 1930.
Gia dapi il 2017 metta la SSR a disposiziun metadatas dals archivs per programmaders. Quai fa ella via in'interfatscha publica. Cun avrir ils archivs via staziuns da consultaziun localas situadas en instituziuns culturalas duain ussa surtut la perscrutaziun istorica e l'instrucziun innovativa survegnir novs impuls. Ord vista dals utilisaders èsi d'avantatg da pudair consultar ils documents da la SSR ensemen cun autras funtaunas impurtantas da l'istorgia contemporana. Perquai cooperescha la SSR cun Memoriav, l'Uffizi federal da cultura e cun bibliotecas, centers da documentaziun, universitads e scolas en las regiuns.
In'avertura online pli vasta dals archivs succeda parallelamain cun la soluziun da problems colliads cun quella ch'èn da natira giuridica, tecnica ed era qualitativa. A partir da l'entschatta dal 2019 vegnan lura interpresas da medias privatas a pudair retschertgar en ils archivs da la SSR e nizzegiar ils documents d'archiv.
La SSR è ina da las emprimas chasas da medias dal mund che promova uschè consequentamain la digitalisaziun e l'avertura da ses archivs.
Post da medias SSR
Edi Estermann
medienstelle.srg(at)srgssr.ch / tel. 031 350 95 95
