Resultat annual 2020: In onn zunt spezial sut l’ensaina da transfurmaziun, derasaziun da record e sbassadas da custs

La SRG SSR guarda enavos sin in onn cun bleras sfidas ch'è stà marcà fitg da la pandemia da COVID-19. Cura ch'il Cussegl federal ha proclamà ils 16 da mars 2020 la «situaziun extraordinaria» e las butias, ils restaurants, las bars, las scolas sco era manaschis da divertiment e dal temp liber han stuì serrar, ha la SRG SSR immediatamain adattà ses program en tut las regiuns linguisticas: dapli telescola, in program per uffants e giuvenils extendì, emissiuns per senioras e seniors ed emissiuns spezialas davart il svilup da la situaziun cun quotas d'aspectaturs da record. 

Il public ha percunter stuì desister da la transmissiun d'occurrenzas grondas da sport sco il campiunadi europeic da ballape u ils gieus olimpics da stad a Tokyo ch'èn vegnidas spustadas en consequenza da la pandemia sin l'onn proxim. Auters events da sport che avessan gì lieu il 2020 en Svizra sco la cuppa mundiala da skis alpin, il campiunadi svizzer da hockey sin glatsch, il campiunadi mundial da hockey sin glatsch sco era il campiunadi mundial da ciclissem han ins stuì interrumper resp. spustar.

Ins ha annullà quasi tut las occurrenzas culturalas sco open airs ed arranschaments en directa, quai che ha gì consequenzas massivas per la branscha da cultura e d'events. Per sustegnair la scena da musica indigena han ils emetturs da la SRG SSR emess uschè blera musica svizra sco anc mai. Ins ha era sustegnì la scena da film svizra: La SRG SSR ha mussà durant il 2020 456 films svizzers, il 2019 eran quai anc 364 films.

Las lavurs da filmar han – sche pussaivel – gì lieu, e quai malgrà grevas cundiziuns da producziun, e partenadis da medias per festivals da film èn vegnids respectads, schegea ch'ins ha stuì realisar online la gronda part dals festivals. Cun duas collecziuns da lockdown spezialas è la branscha da film plinavant stada preschenta sin la nova plattafurma da streaming Play Suisse cun totalmain 58 films curts.

Ils effects finanzials da la crisa da COVID-19

Las entradas commerzialas èn sa sbassadas per 52,1 milliuns francs en cumparegliaziun cun l'onn precedent, da quai 30,7 milliuns francs damain retgavs da la reclama en la televisiun, 2,2 milliuns francs damain retgavs da sponsoring e 19,2 milliuns francs damain retgavs dal program, da quests radund  set milliuns francs pervia da producziuns da sport annulladas. Dapi il 2017 èn las entradas commerzialas da la SRG SSR sa sbassadas per totalmain passa 100 milliuns francs. 

Suenter in bun cumenzament da l'onn 2020 èn ils retgavs da la reclama sa reducids massivamain pervia da las mesiras cunter la pandemia ordinadas a partir dal mars. La segunda mesadad da l'onn è la situaziun al martgà da reclama sa meglierada grazia a l'auta quota d'aspectaturs dals programs da televisiun. Var la mesadad dal deficit da retgavs da la reclama è d'attribuir a la pandemia. L'ulteriur regress sa basa sin in consum da televisiun che sa transfurma vinavant ed il spustament da budgets da reclama en purschidas digitalas per gronda part globalas.

D'ina vart ha la pandemia chaschunà custs supplementars: ultra da la procuraziun da mascrinas d'igiena e dischinfectants han era las mesiras pretensiusas per cumbatter la pandemia generà custs supplementars per las atgnas producziuns. Da l'autra vart han ins sin fundament da la pandemia era pudì spargnar auters custs: perquai che las occurrenzas culturalas ed occurrenzas da sport n'han betg gì lieu èn crudads davent ils custs per dretgs e custs da viadi – u ch'els resultan pir l'onn proxim.

Ils custs da restructuraziun e respargns

Ulteriurs custs da respargn han engrevgià il resultat annual. La SRG SSR sa posiziunescha per l'avegnir. Quai per tegnair quint cun lur producziuns e furmas da distribuziun a las modas da consum ed als basegns dal public che sa midan e per  uschia sbassar consequentamain ils custs per pudair cumpensar ils retgavs da la reclama e da sponsoring che van vinavant enavos.

En il sectur dal persunal n'han ins sche pussaivel betg reoccupà plazzas ch'èn vegnidas libras. En media èn stadas occupadas l'onn passà 5537 plazzas cumplainas tar la SRG SSR – inclusiv l'anteriura societad affiliada TPC ch'è vegnida integrada per l'entschatta dal 2020 ed inclusiv SWISS TXT che resta ina societad affiliada. Il total da las plazzas cumplainas è damai sa reducì en cumparegliaziun cun l'onn precedent (5650 plazzas) per 113 plazzas. 

En la distribuziun han ins pudì realisar respargns per l'ina cun terminar la transmissiun televisiva terrestra (DVB-T) dals programs da la SRG SSR che vegniva strusch pli duvrada (1,4 pertschient) per ils 3 da zercladur 2019 e per l'autra pervia da l'ulteriura optimaziun da la transmissiun radiofonica digitala sur DAB+.

In dals highlights da l'onn da gestiun passà è stà la lantschada da la nova plattafurma da streaming Play Suisse ils 7 da november 2020. La plattafurma porscha las meglras atgnas producziuns e coproducziuns da RTR, SRF, RSI e RTS e quai senza barrieras linguisticas. Films, serias e documentaziuns, reportaschas e stgazis or da l'archiv pon ins streamar en lingua originala cun suttitels tudestgs, franzos e talians. Titels selecziunads èn plinavant era disponibels cun suttitels rumantschs. La purschida multifara da la SRG SSR po uschia vegnir promovida sur ils cunfins linguistics ora e sin tut ils apparats finals. Fin oz èn gia 250'000 utilisadras ed utilisaders en Svizra sa registrads sin Play Suisse.

Legraivel è il fatg ch'il Center da retschertga publicitad e societad (fög) da l'Universitad da Turitg ha attestà als programs da la SRG SSR en ses studi da qualitad relevant (1/2020) era l'onn 2020 relevanza e vardaivladad extraordinaria.

La transfurmaziun cuntinuescha

La transfurmaziun da l'interpresa cuntinuescha era l'onn current. La SRG SSR sto vinavant s'adattar a las relaziuns dal martgà e las novas modas da consum, e quai resguardond in rom finanzial adina pli stretg. Suenter ch'il program da spargn da 100 milliuns francs lantschà il 2018 ha pudì vegnir terminà il 2020, ha la SRG SSR stuì instradar sin fundament dal trend regressiv da las entradas commerzialas l’october 2020 in ulteriur program da spargn da 50 milliuns francs fin l'onn 2024. Quest plan da spargn vegn er ad avair consequenzas per il dumber da las plazzas da lavur.

Il rapport annual vegn suenter l’approvaziun tras la radunanza da delegads e delegadas publitgà ils 30 d’avrigl 2021 sin la pagina-web da la SRG SSR (srgssr.ch).