La SRG SSR e la Chadaina da Fortuna èn solidaricas cun uffants e giuvenils

Dals 16 fin ils 22 da december 2023 ha lieu l'emna da solidaritad en favur d'uffants e giuvenils – organisada da la Chadaina da Fortuna en collavuraziun cun la SRG SSR. Per l'acziun «Furmaziun per tuttas e tuts – in futur per uffants e giuvenils en Svizra e sin l'entir mund» rimnan ils chanals da la SRG SSR donaziuns durant quell'emna. Il punct culminant è il Di da solidaritad da gievgia, ils 21 da december.  

Sin l'entir mund na van 244 milliuns uffants en la vegliadetgna da scola betg a scola. Er en Svizra èn var set pertschient dals giuvenils betg en il sistem da furmaziun e dus pertschient senza lavur. La furmaziun è dentant da gronda impurtanza per ils uffants e giuvenils. Ella gida d'interrumper il ciclus da violenza e povradad, avra novas portas e dat la schanza ad in avegnir autodeterminà. L'emna da solidaritad «Furmaziun per tuttas e tuts – in futur per uffants e giuvenils en Svizra e sin l'entir mund» s'engascha per far frunt a questa problematica.  

Miren Bengoa, la directura da la Chadaina da Fortuna, accentuescha: «Tut ils uffants ston pudair viver ed emprender en segirtad. La Chadaina da Fortuna s'engascha per che la furmaziun d'uffants e giuvenils saja ina prioritad en Svizra e sin l'entir mund.» 

L'emna da solidaritad sin ils emetturs da la SRG SSR 

Quizs, lavuratoris, preschentaziuns en directa, emissiuns dal suentermezdi u programs da radio per giuvenils – ils emetturs da radio e televisiun da la SRG SSR accumpognan l'emna da solidaritad cun in program spezial. Radio SRF 3 ingianta livesessions exclusivas cun las musicistas ed ils musicists svizzers Andryy, Loco Escrito e Kings Elliot ed in soundcheck privat cun Stephan Eicher. Plinavant decidan las audituras ed ils auditurs per quatter dis il program da musica: suenter avair fatg ina donaziun pon ellas ed els giavischar ina chanzun. En il rom da l'acziun «Coeur à coeur» sa ferma RTS cun ses studio mobil en tut ils set chantuns da la Svizra franzosa ed organisescha showcases en directa cun musicist:as local:as. Il «Quotidiano» da RSI mussa dus projects tessinais per la reintegraziun sociala e professiunala da giuvenils ed ina fanestra speziala en il «Telegiornale» sa deditgescha a projects da furmaziun en Columbia. En l'emissiun da la dumengia «Vita e creta» metta RTR per in'ura il focus sin ils temas solidaritad e furmaziun. Quai èn mo insaquants puncts da program en il rom da l'emna da solidaritad.  

Durant l'entira emna da solidaritad «Furmaziun per tuttas e tuts – in futur per uffants e giuvenils en Svizra e sin l'entir mund» rimnan ils chanals da la SRG SSR donaziuns. Durant il Di da solidaritad da gievgia, ils 21 da december, èn las centralas da telefon en las quatter regiuns linguisticas occupadas da las 07.00-23.00. Moderatur:as, prominent:as, politichers e gidantras voluntaras respundan als telefons da las audituras e dals auditurs. Tras l'emissiun maina tar RTR Claudia Cathomen, tar SRF 1 Sandra Schiess, tar RTS Jean-Marc Richard e tar RSI Carla Norghauer. Las moderaturas ed il moderatur rapportan l'entir di davart il tema «furmaziun per tuttas e tuts» e beneventan hosps interessants.  

La SRG SSR e la Chadaina da Fortuna  

La Chadaina da fortuna è vegnida fundada l'onn 1946 da la SRG SSR per rimnar donaziuns per umans en miserias. Durant 37 onns è la Chadaina da Fortuna stada ina part da la SRG SSR. En il decurs dal temp hai dà adina dapli collectas e la collavuraziun cun organisaziuns partenarias è daventada pli e pli cumplexa, uschia ch'èn stadas dumandadas structuras pli professiunalas. Dapi l'onn 1983 è la fundaziun Chadaina da Fortuna perquai independenta. Tuttina ha la SRG SSR anc adina ina stretga relaziun cun ella. Durant ils dis da solidaritad deditgeschan ils emetturs da radio e televisiun da SRF, RTS, RSI e RTR ina gronda part da lur temp d'emissiun a las activitads da la Chadaina da Fortuna. Els infurmeschan auditur:as ed aspectatur:as davart las acziuns respectivas, appelleschan a solidaritad e rapportan dals centers da collecta e davart il stadi actual da las donaziuns.