«2 x Nadal»: Uschè impurtant sco anc mai da sustegnair umans pertutgads da la povradad
In pac pezs, in liter ieli u in kilo farina: bains elementars strapatschan savens fitg il budget dad umans pertutgads da la povradad en Svizra. Ils pretschs creschids engrevgeschan la situaziun. En il rom da l'acziun «2 x Nadal» vegn perquai danovamain appellà a la populaziun svizra da far donaziuns da products d'igiena e da mangiativas bain conservablas. La collecta tradiziunala ha lieu a partir dals 24 da december 2023. Donaziuns online pon ins far a partir d'immediat. Ellas vegnan duvradas per projects da succurs d'enviern en l'Europa da l'Ost e l'Asia Centrala.
Dapi il 2014 crescha la quota da povradad en Svizra. Actualmain èn passa 700'000 persunas en Svizra pertutgadas da la povradad. Persunas che vivan sulettas, persunas attempadas e persunas ch'educheschan sulettas cun uffants minorens èn pertutgadas il pli savens. Per ellas èn ils daners uschè stgars mintga mais ch'ellas pon sa prestar mo cun fadia chaussas necessarias per viver. Ils custs d'energia e las premias da la cassa da malsauns creschents engrevgeschan la situaziun.
L'acziun «2 x Nadal» organisada cuminaivlamain da la SRG SSR, la Posta Svizra, Coop e la Crusch Cotschna Svizra (CCS) ha lieu quest onn per la 27avla giada. Dals 24 da december 2023 fin ils 11 da schaner 2024 po la populaziun regalar pachets cun artitgels dal basegn quotidian. Las societads chantunalas da la Crusch Cotschna repartan silsuenter ils products a persunas en situaziuns precaras en l'entira Svizra.
Diversas pussaivladads da far donaziuns
Ils pachets per «2 x Nadal» pon ins metter ensemen a moda individuala. Spezialmain dumandads èn quest onn: conservas da legums e fritgs, schuppas, farina, ieli ed aschieu ed era products d'igiena sco per exempel pezs, faziels da nas u bindas. Cura ch'ils pachets èn fatgs, pon ins dar si els gratuitamain en tut las filialas da la Posta Svizra e las filialas da partenaris. Via il servetsch pick@home pon ins plinavant era surdar gratuitamain ils pachets al postin. La posta transporta ils pachets en il center logistic da la Crusch Cotschna Svizra, nua che la rauba vegn zavrada e suenter distribuida en l'entira Svizra.
Sin coop.ch pon ins empustar in pachet en la valur da 20, 50 u 100 francs e sin giavisch pajar cun superpuncts. Pachets gia preparads à 20 francs pon ins cumprar en tut ils megastores da Coop sco er en negozis da Coop City elegids. Quels furnescha Coop alura directamain a la Crusch Cotschna Svizra.
Pachets online per il succurs d'enviern en l'Europa da l'Ost e l'Asia Centrala
L'acziun «2 x Nadal» gida er a l'exteriur. Ils pachets online pussibiliteschan da sustegnair umans pertutgads da povradad durant ils mais d'enviern fraids cun tschaveras chaudas, pachets da vivondas, bons per tschaveras u daner contant. Grazia a las donaziuns po la Crusch Cotschna Svizra realisar projects correspundents ensemen cun societads naziunalas da la Crusch cotschna e da la Mesaglina cotschna en l'Armenia, la Bosnia-Erzegovina, la Moldavia ed il Kirghistan.
