La plattafurma da streaming futura da la SRG SSR sa numna Play+

Actualmain sviluppan teams spezialisads da RSI, RTR, RTS, SRF e Play Suisse communablamain la nova plattafurma da streaming naziunala che vegn ad unir en in lieu l'entira purschida d'audios e videos da la SRG SSR. Questa innovaziun fa part dad «Enavant SRG SSR», il process da transfurmaziun da l'interpresa. Cun «Enavant» vul la SRG SSR daventar pli digitala, pli effizienta e pli agila ed il medem mument mantegnair la qualitad dal service public. «Per restar relevants en il mund digital stuain nus far part dal mintgadi dals umans en Svizra, enconuscher lur basegns ed offrir ad els ina purschida attractiva ed accessibla a moda simpla», di Susanne Wille, directura generala da la SRG SSR. «Play+ duai esser il nov dachasa digital per noss public. La plattafurma vegn ad unir umans, perquai ch'i dat da scuvrir là cuntegns relevants da tut las parts da la Svizra. Play+ unescha innovaziun, diversitad, fidanza e cuntegns d'auta qualitad da RSI, RTR, RTS e SRF – e quai sin ina suletta plattafurma.»

Dapli cuntegns, dapli Svizra, dapli service public 

Actualmain porscha la plattafurma da streaming naziunala Play Suisse films, serias e films documentars svizzers, fertant ch'ils players da RSI, RTR, RTS e SRF (p.ex. Play RTR) porschan access a tut ils audios e videos da la regiun linguistica respectiva. Cun Play+ vegnan quests dus munds unids sin ina plattafurma plurilingua orientada a l'utilisad:ra che vegn a remplazzar ils players existents e Play Suisse. Tut po lura exister in dasper l'auter: audios e videos, novitads, sport, documentaziuns, ficziun, cultura, economia e divertiment – live, da tuttas uras ed on demand. Per promover la scuverta da cuntegns d'autras regiuns linguisticas vegnan tut ils cuntegns d'interess naziunal rendids accessibels cun suttitels u sincronisaziun. Play+ vegn a midar l'experientscha da diever – grazia a la tschertga unifitgada da tut ils cuntegns, recumandaziuns persunalisadas e la navigaziun senza interrupziun tranter regiuns linguisticas e formats.

Preschentà il num ed il branding 

La SRG SSR ha preschentà oz il num e l'identitad visuala da la plattafurma futura Play+. «Il num Play+ fa ina punt evidenta a nossas plattafurmas actualas ed exprima il medem mument noss intent d'innovaziun sco era ina meglra experientscha da diever», di il mainaproject Damien Corti. Play+ sa basa sin la purschida da streaming existenta da la SRG SSR sco per exempel Play RTR e Play Suisse e marchescha il medem mument ina midada: la purschida fragmentada sin pliras plattafurmas daventa ina soluziun naziunala communabla. Il logo represchenta la Svizra – cun la  crusch identitara ed il simbol da «+» che stat per la plivalur da la plattafurma: in plus per dapli funcziuns e dapli cuntegns novs ch'i dat da scuvrir, per la coexistenza da l'enconuschent e formats novs e per il barat rinforzà tranter las regiuns.

Start planisà per l'atun 2026 

Ils proxims mais spetga il svilup da la plattafurma, suandà da la migraziun dals cuntegns e sistems existents fin la stad 2026. Silsuenter vegn la plattafurma testada minuziusamain cun integraziun da noss public – tranter auter cun il sustegn d'in panel d'utilisad:ras per optimar l'experientscha da diever. L'atun 2026 vegn Play+ lantschà.