International Public Media Conference (IPMC) – co vesa ora l'avegnir da las medias publicas?
Ils 4 da mars 2019, in onn suenter che l'iniziativa No Billag è vegnida refusada, ha lieu a Berna l'emprima International Public Media Conference (IPMC). Averta vegn ella da la nova ministra da medias cussegliera federala Simonetta Sommaruga. La conferenza vegn organisada communablamain da la Societad svizra da radio e televisiun (SRG SSR), da l'Uffizi federal da communicaziun (UFCOM), da la Cumissiun federala da las medias (CUFEM) e da la Societad svizra per las scienzas da la communicaziun e dals meds da massa (SSCM). Durant in di sa barattan referentas e referents renumads e persunas interessadas da la Svizra e da l'exteriur davart l'avegnir da las medias publicas audiovisualas e lur rolla en la societad.
![[Translate to Rätoromanisch:] International Public Media Conference (IPMC)](/fileadmin/_processed_/3/b/csm_Logo_IPMC_46b684caba.png){kind=logo}
[Translate to Rätoromanisch:] International Public Media Conference (IPMC)
La votaziun davart «No Billag» ha mess en il focus las differentas debattas sociologicas, economicas ed ideologicas davart l'impurtanza da las medias publicas che vegnan manadas en l'entira Europa e sur ils cunfins europeics ora. En vista a las novas sfidas tecnologicas, socialas e regulatoricas ed a las discussiuns regularas davart la legitimitad da las singulas medias dat quest di la chaschun da s'occupar cun la rolla democratic-politica da las medias publicas en Svizra ed a l'exteriur. Numerusas expertas e numerus experts da l'entira Europa s'expriman davart quest tema e discuteschan tge rolla ch'il service public audiovisual po surpigliar en ina societad marcada da las midadas digitalas. Co valiteschan spezialists da la branscha europeics las midadas en la cuntrada mediala? Tge duai la noziun «medias publicas» tut cumpigliar en l'avegnir? Co giain nus enturn cun il fatg ch'il service public audiovisual vegn d'ina vart crititgà fermamain e ch'el è da l'autra vart però uschè relevant sco anc mai? En il rom da la conferenza vegn debattà davart tut questas dumondas per sa barattar e chattar soluziuns.
Tenor la cunorganisatura Ladina Heimgartner, directura RTR e vicedirectura generala SSR, ha la conferenza duas finamiras. Per l'ina duai ella esser ina chaschun per differents champs (branscha, autoritads, scienza, etc.) da barattar experientschas per chapir meglier co che mintga pajais tracta sias sfidas. Per l'autra duai quest di esser in'occasiun singulara da crear contacts per la branscha da medias e per tut ils secturs pertutgads da questa tematica. Per cuntanscher questas finamiras èn sin il program differents referats d'experts, ina discussiun da podium ed exempels da la pratica da projects creativs e curaschus dal service public.
La damaun è deditgada als referats da prof. dr. Karen Donders, spezialista da communicaziun, Vrije Universiteit Brussel, e da Noel Curran, directur general European Broadcasting Union (EBU). Suenter ha lieu ina runda da discussiun cun las persunas responsablas d'intginas chasas da medias publicas da l'Europa: Cilla Benkö, directura generala Sveriges Radio, Jean-Paul Philippot, administratur general Radio Télévision Belge Francophone (RTBF), Karola Wille, intendanta dal Mitteldeutscher Rundfunk (MDR), e Gilles Marchand, directur general SSR. Las preschentaziuns dal suentermezdi sa concentreschan en spezial sin las suandantas dumondas: Tge service public dovri per las novas generaziuns? Tge ideas han noss vischins per cuntanscher era vinavant las gruppas en mira las pli giuvnas?
La conferenza ha lieu en il Zentrum Paul Klee a Berna ed è gratuita per tut las persunas annunziadas. Il dumber da participants è però limità. Plinavant vegn swissinfo.ch a porscher online tscherts panels da l'IPMC sco livestream (www.swissinfo.ch/eng/ipmc-livestream) ed a rapportar en englais davart la conferenza per il public interessà.
Program ed annunzia (fin il pli tard mardi, ils 26 da favrer 2019) sin: https://event.srgssr.ch/srgssr-International-Public-Media-Conference/
Post da medias SSR
medienstelle.srg(at)srgssr.ch / tel. 031 350 95 95
