In viadi digital tras l'istorgia da la SSR

Avant 60 onns ha la SSR survegnì ses nov num «Societad svizra da radio e televisiun» (vesair «La chronica da la SSR»). L'abreviaziun da la «Societad svizra da radiodiffusiun» ha ella mantegnì enfin oz. Ils trais bustabs SSR stattan dapi l'onn da fundaziun 1931 per il federalissem e la coesiun en la diversitad, per purschidas en las differentas parts dal pajais e per in'incumbensa da service public independenta en favur da la libra furmaziun da l'opiniun. Quests princips ha l'instituziun da medias adina defendì en il rom da las circumstanzas politicas, finanzialas e tecnicas ch'èn sa midadas cuntinuadamain. Saja quai l'introducziun dispitaivla da la televisiun, las entradas da la reclama adina pli bassas u schizunt l'aboliziun cumpletta da la SSR: l'uniun enragischada en la societad ha stuì superar blers obstachels e tschertgar numerusas soluziuns.

Theo Mäusli, spezialist en la direcziun Svilup e purschida, è ultra da Markus Drack, Andreas Steigmeier e François Vallotton in dals coediturs dals trais volums cumparids tranter il 2000 ed il 2012, en ils quals istoricras ed istorichers han elavurà l'istorgia da la SSR davent da sias entschattas fin l'onn 2010. Per Theo Mäusli sa distingua l'istorgia da la SSR cunzunt perquai ch'ella è colliada stretgamain cun l'istorgia da la Svizra e perquai che sa barattan periodicamain stentas da centralisar las unitads d'interpresa cun emprovas da render ellas pli autonomas.

Tschertgar tenor onn u temas

Ils eveniments pli pitschens e pli gronds che han marcà l'interpresa èn enumerads ed illustrads sin la pagina-web da la SSR sut «La chronica da la SSR». Via il menu da defilar pon ins tschertgar eveniments tenor in tschert onn u tenor temas sco anecdotas, directurs generals, partenadis da medias, organisaziun, politica, program, diffusiun e tecnica. La schelta da las fotos ha fatg Irene Benz da l'Archiv central da la direcziun generala. La manadra da l'archiv areguard la collecziun da fotos da la SSR: «Maletgs èn dapli che bellas regurdientschas. Els èn perditgas impurtantas da temps passads e damai funtaunas preziusas per studis istoric-culturals. Ultra dals documents en scrit avran els in'ulteriura dimensiun, la dimensiun visuala. En noss mund digital e plitost svanaivel na daventan collecziuns fisicas betg inutilas, mabain furman ina basa impurtanta accessibla independentamain da meds d'agid tecnics che nus pudain metter a disposiziun ad in public pli vast.»

L'istorgia da la SSR s'exprima en ses archivs 

En connex cun l'istorgia da la SSR giogan ses gronds archivs da radio e televisiun ina rolla impurtanta. En ils Archivs da la SSR sa chattan emissiuns da radio e televisiun d'ina durada da passa dus milliuns uras. La SSR renda accessibel quest vast fundus a la publicitad. L'avertura da l'archiv sa basa sin tschintg pitgas. Tut tenor gruppa en mira datti differents access:
1.    Access als cuntegns da l'archiv via las paginas d'archiv da las unitads d'interpresa
2.    Access a la purschida da radio e televisiun via il Player
3.    Access via l'interfatscha per programmaders e designers 
4.    Access via ils terminals en instituziuns culturalas, scolas ed universitads
5.    Access via la plattafurma da shared-content per chasas da medias svizras
 

L'istorgia da la SSR n'è anc betg scritta a fin. Theo Mäusli di en quel connex: «Gist ils ultims mais da crisa han cumprovà ch'il public stima las purschidas d'archiv da la SSR. Las partiziuns d'archiv da las unitads d'interpresa lavuran cun bler engaschi, savida spezialisada e creativitad per render accessibel a las differentas gruppas d'interess il material d'archiv da plirs milliuns uras anc betg publitgà a moda attractiva e cunzunt era correcta.»