Distributur global american per «Amur senza fin»
Il distributur global american Cinema Management Group (CMG) da Los Angeles ha acquistà ils dretgs per la commerzialisaziun mundiala dal film «Amur senza fin» che la SSR ha coproducì.
La premiera mundiala dal film rumantsch «Amur senza fin» da Christoph Schaub («Giulias Verschwinden») al Festival Locarno ha fatg sensaziun internaziunala: il distributur global american Cinema Management Group (CMG) da Los Angeles ha acquistà ils dretgs per la commerzialisaziun mundiala dal film che la SSR ha coproducì.
Sut il titel internaziunal «Hide and Seek» vegn il film preschentà gia l'entschatta da settember 2018 al festival da films a Toronto, pia al martgà da film il pli grond en l'America dal Nord. Per Lukas Hobi e Reto Schaerli da la firma da producziun Zodiac Pictures («Die göttliche Ordnung», «Heidi», «Gotthard») munta quai in success enorm: «Rumantsch goes Hollywood – nus avain tschaffenun che CMG porta or en il mund ‘Amur senza’ fin ed ensemen cun il film era la lingua rumantscha.»
Edward Noeltner, CEO da CMG, vesa in grond potenzial internaziunal en «Amur senza fin»: «Malgrà ch'il rumantsch è la lingua naziunala la pli pauc derasada da la Svizra, raquinta ‘Amur senza fin’ en in linguatg universal e cun bellischem umor in'istorgia d'amur e da fidaivladad. Igl è il gener da film che intganta in public mundial.»
La cumedia da Sabine Pochhammer («Die Herbstzeitlosen») vegn mussada ils 2 da settember 2018 a chaschun dal di dal kino en passa 20 kinos da l'entira Svizra sco represchentaziun speziala. En la televisiun pon ins guardar «Amur senza fin per l'emprima giada ils 23 da settember 2018 a las 20:05 sin SRF 1. Ulteriuras emissiuns sin RTS e RSI èn planisadas.
Cuntegn
«Rumpaivel e custaivel» – la lètg da Mona e Gieri è vegnida in pau stancla suenter 20 onns. Inspirada da las propostas nunortodoxas dal nov plevon emprova ella da dar nova vita a lur lètg – betg mo Gieri vegn confus, l'entir vitg è prest tut sutsura.
Post da medias SSR, Edi Estermann
medienstelle.srg(at)srgssr.ch / tel. 031 350 95 95
