Di da la musica svizra tar la SRG SSR

Communicaziuns a las medias 14.09.2022

A chaschun dal Di da la musica svizra ils 16 da settember emettan ils programs da radio da la SSR durant 24 uras mo musica d'artist:as da la Svizra. Il program vegn enritgì cun intervistas e preschentaziuns en directa da musicist:as sco Sam Himself, Danitsa e Chiara Banchini. En pli emettan ils programs da radio da la SRG SSR concerts en directa dal festival da musica Label Suisse, e la plattafurma da streaming da la SRG SSR, Play Suisse, lantscha il nov accent tematic «Musica populara».

Da Patent Ochsner sur Joya Marleen fin a Loco Escrito: la lavur creativa da las artistas svizras e dals artists svizzers e lur diversitad musicala stat venderdi, ils 16 da settember, en il center dals programs da radio da la SRG SSR. Durant 24 uras emettan els exclusivamain musica svizra. La paletta cumpiglia musica classica, musica populara, jazz, rock, pop, hip-hop, musica electronica, classichers svizzers e novas scuvertas musicalas d'emprima qualitad. Cumplettà vegn il program cun differents accents tematics tut tenor emettur e cun intervistas e preschentaziuns en directa da musicist:as da la Svizra.  

SRF emetta tranter auter highlights da l'emissiun «Swissmade». En Svizra franzosa tematiseschan ils emetturs p.ex. la furmaziun professiunala musicala e las scolas da musica sco era la mediatisaziun da la musica svizra. Couleur 3 metta en il focus la band The Young Gods e ses album «T.V. Sky» che festivescha il giubileum da 30 onns. RTS la 1ère beneventa en il studio Marina Viotti, la chantadura d'operas e la victura dal Premi svizzer da musica da l'onn 2022. Option Musique emetta in tozzel preschentaziuns en directa dad artistas e d'artists svizzers, sco p.ex. Volver, Pat Burgener e Lily Gasc. RSI mussa sin l'emettur da televisiun RSI LA2 preschentaziuns en directa da la band Vad Vuc, dal musicist Pippo Pollina e dal chantautur Marius Bear. Rete Due fa ina contribuziun speziala che s'adressescha a persunas sut 30 onns, Rete Uno maina debattas davart las cifras en connex cun la musica svizra e Rete Tre regala cun trair la sort plattas e DC's. Las preschentaziuns da Carmen Cresta, Gina & Jamira Estrada, Anik, Kaufmann, Julie Fox e Happy, for Real pon ins tadlar tar RTR.  

Concerts en directa dal festival Label Suisse 

Dals 16 fin ils 18 da settember ha lieu a Losanna la dieschavla ediziun dal festival da musica Label Suisse che RTS sustegna sco partenaria. Als concerts dals talents svizzers da tut las direcziuns da musica pon ins esser da la partida en directa u als persequitar pli tard sin ils emetturs da la SSR. Il Di da la musica svizra pon ins tadlar tranter auter la preschentaziun da la chantautura Priya Ragu (en directa sin SRF 3, pli tard sin Couleur 3 e RTR), il concert da la band Fai Baba (en directa sin SRF 3, pli tard sin Couleur 3) u la preschentaziun da la chantadura da pop e chantautura Evelinn Trouble (en directa sin SRF 3, pli tard sin Couleur 3, La 1ère e RTR). Plinavant organisescha il med Street e Pop da RTS Tataki ina saira cun Chilla, Danitsa e Ta'Shan, trais gronds nums en la scena da hip-hop, soul e R'n'B. La majoritad da la saira vegn emessa en directa sin SRF Virus e singulas preschentaziuns pon ins tadlar sin SRF 3 e Couleur 3.  

En pli vegnan a sa preschentar al festival Label Suisse l'Orchestre Tout Puissant Marcel Duchamp, Fritz Hauser, Arthur Hnatek, Ripperton e Marina Viotti, tschintg da las indesch victuras e victurs dal Premi svizzer da musica. La surdada dal Premi svizzer da musica 2022 che la SRG SSR sustegna sco partenaria ha lieu ils 16 da settember en preschientscha da cusseglier federal Alain Berset en l'Octogone a Pully.   

La musica classica stat en il center en il «Pavillon Suisse» 

En il «Pavillon Suisse», ina producziun cuminaivla da Rete Due, Espace 2 e SRF 2, vegn transmessa in'emissiun speziala il Di da la musica svizra: in concert da l'Orchestra della Svizzera italiana sut la batgetta da Heinz Holliger cun Sebastian Bohren a la violina. La preschentaziun plurilingua vegn emessa a partir da las 20:30 en directa da Lugano sin Rete Due ed Espace 2. La repetiziun pon ins tadlar ils 20 d'october a las 20:00 sin SRF 2 Kultur.   

Quatter giuvens talents da la musica classica han preschentà l'onn passà tocs musicals selecziunads en il «Pavillon Suisse». Intginas da las registraziuns da concerts dals «Jeunes Talents Suisses» pon ins tadlar quest onn en il rom dal Di da la musica svizra sin SRF 2 Kultur. En pli è disponibel sin Play Suisse l'entir concert dals «Jeunes Talents Suisses» sco er ina documentaziun da video davart l'origin dal «Pavillon Jeunes Talents Suisses».  

Ina nova tribuna per la musica populara svizra  

A chaschun dal Di da la musica svizra lantscha Play Suisse, la plattafurma da streaming da la SRG SSR, in nov accent tematic en la rubrica «Musica populara». Ultra da registraziuns da concert fin uss anc betg publitgadas da differentas festas da musica e da chant sco era films documentars e reportaschas producidas aposta per questa chaschun, èn disponibels sin Play Suisse semperverds or dals programs da las unitads d'interpresa RSI, RTR, RTS e SRF.   

Quai n'è però betg l'unica novitad per amaturas ed amaturs da la musica populara: en il rom da las festivitads per il giubileum da 50 onns dal «Kiosque à musiques»,  l’ emissiun da radio la pli veglia da RTS, han ins registrà in DC. Ina gruppa da lavur interregiunala a l'intern da la SSR ha tschernì da mintga regiun quatter tocs dal repertori da la musica populara. Silsuenter han furmaziuns d'autras regiuns arranschà ed interpretà quels. Uschia per exempel «Marignan» da Jean Daetwyler (RTS), «Für immer uf di, Büne Huber» da Patent Ochsner (SRF), «Polka all'antica» da Pietro Bianchi (RSI) e «Mia Muntogna» da Nina Mayer (RTR).   

La SRG SSR e la musica svizra 

La SRG SSR porscha ina gronda tribuna a la musica svizra, e quai betg mo il Di da la musica svizra. Tuttina sche pop, rock, musica populara, jazz, opera u classica: ils emetturs da radio da la SSR promovan musica svizra da tut las direcziuns da stil. En la «Charta da la musica svizra», la cunvegna cun la branscha da musica svizra, s'oblighescha la SSR d'emetter en ses programs da radio ina quota commensurada da producziuns da musica svizras. Sin tut ils chanals da radio è la quota da musica svizra auta. Tar ils emetturs tematics sco Radio Swiss Pop, Swiss Jazz u Swiss Classic importa ella var 50 pertschient. Il medem vala per Radio SRF Virus, Radio SRF Musikwelle e Radio RTR. Ultra da quai porscha la SRG SSR ina plattafurma a persunas giuvnas activas sin il champ musical ed ella promova uschia talents giuvens.  

Plinavant mussan ils chanals da televisiun da la SRG SSR da tut las regiuns linguisticas mintg'onn passa tschient uras registraziuns da concert da bands svizras. Sin Play Suisse, la plattafurma da streaming, stattan a disposiziun differentas registraziuns da concerts. La SRG SSR surdat premis per promover la musica, premis da promoziun a novas bands ed ella envida regularmain bands svizras a sa preschentar en directa al radio. Ultra da quai offra ella era trais portals da musica naziunals – mx3.ch, neo.mx3.ch e volksmusik.mx3.ch – via ils quals èn vegnids scuverts gia numerus talents giuvens sco Valeska, Pascal Gamboni, Kings Elliot, Marius Bear u Danista. 

Contact

Post da medias da la SSR
Edi Estermann
058 136 21 21
medienstelle.srg@srgssr.ch