Annuari davart la qualitad da las medias: puspè bunas notas per ils products da la SRG SSR

Communicaziuns a las medias 24.10.2022

Cun il «Jahrbuch Qualität der Medien» publitgescha il Center da perscrutaziun per la publicitad e la societad (Fög) da l'Universitad da Turitg era quest onn ina valitaziun da la qualitad mediala en Svizra. Per las unitads d'interpresa e per las redacziuns da la SRG SSR datti puspè bler laud.

Copyright: Ruben Sprich

Dapi l'emprima ediziun il 2010 da l'Annuari davart la qualitad da las medias publitgescha il Center da perscrutaziun per la publicitad e la societad (Fög) da l'Universitad da Turitg mintg'onn las cifras-clav actualas davart la qualitad da las medias, l'utilisaziun da las medias, la concentraziun da las medias sco era davart il svilup dal sistem medial svizzer. Examinads vegnan tut ils geners da medias. Las scienziadas ed ils scienziads resguardan era las tendenzas actualas ed ils eveniments actuals, per exempel la rapportaziun en connex cun la pandemia da corona u cun la guerra en l'Ucraina. 

Plazs excellents per las emissiuns d'infurmaziun da la SRG SSR 

Il Fög constatescha che la qualitad generala da las medias svizras è s'augmentada malgrà las resursas diminuintas e che las medias prestan en total dapli lavur da valitar dapi il cumenzament da la pandemia da corona. Ils emprims plazs en las quatter dimensiuns da qualitad relevanza, diversitad, prestaziun da valitaziun e professiunalitad occupan – tuttina sco ils onns passads – las emissiuns d'infurmaziun da la SRG SSR. Las emissiuns cun las meglras valitaziuns èn «Echo der Zeit» (SRF), «Telegiornale sera» (RSI), «Rendez-vous» (SRF), «Le12h30» (RTS), «Radiogiornale 12.30» (RSI), «Tagesschau» (SRF), swissinfo.ch (SWI), «10vor10» (SRF) e «Le Journal» (RTS). 

Il Fög accentuescha a moda positiva las prestaziuns da valitar dal «Telegiornale sera» da RSI – in dals motivs, per ils quals la qualitad generala da questa emissiun da televisiun è sa meglierada marcantamain. Era swissinfo.ch vegn ludà explicitamain per il bun resultat areguard la qualitad, en spezial per la rapportaziun relevanta e l'intermediaziun d'infurmaziuns cumplementaras ch’è vegnida  intensivada danovamain. 

Suttastritgadas vegnan era las prestaziuns da rtr.ch en Svizra rumantscha che possia, sco purschida online publica la pli pitschna resp. cun las pli paucas resursas, tegnair pass cun ils portals pli gronds srf.ch, rts.ch e rsi.ch areguard las dimensiuns da qualitad relevanza e professiunalitad. 

Quai che pertutga ils geners da medias plazzescha il Fög il radio public sin l'emprim plaz. I suondan la televisiun publica, las gasettas da la dumengia ed ils magazins, ils portals online da la SRG SSR, la televisiun privata e las gasettas abunadas. 

Dapli persunas sutprovedidas cun novitads 

Il Fög è preoccupà pervi da l'augment da persunas sutprovedidas cun novitads schurnalisticas. 38,5% da las Svizras e dals Svizzers tutgan l'onn 2022 tar questa gruppa. 

Giuvens creschids en la vegliadetgna da 19 fin 24 onns consumeschian oz en media mintga di mo pli 7 minutas novitads. Quai fan els per il solit sin lur smartphones sco apparat d'infurmaziun principal. Il Fög resumescha che quai haja potenzialmain consequenzas gravantas per la fidanza en las instituziuns e per la participaziun democratica. 

«Jahrbuch Qualität der Medien» 

Resultats principals da l'Annuari 2022 (18 paginas) 

Versiun cumpletta da l'Annuari 2022 (160 paginas) 

Contact

Post da medias da la SRG SSR
Edi Estermann
058 136 21 21
medienstelle.srg@srgssr.ch