Uniun

La SSR è in'uniun. Quella sa cumpona da quatter societads regiunalas cun var 23 500 commembras e commembers. Daventar commember po mintga persuna che s'interessescha per las medias.

Las societads regiunalas francheschan la SSR en la societad cun intimar e manar ina debatta publica davart il service public audiovisual. A medem temp rimnan las societads regiunalas ils giavischs dal public, inoltreschan quels a la SSR ed influenzeschan l'orientaziun e la qualitad da las purschidas da la SSR.

L'artitgel 4 dals statuts da la SSR descriva las incumbensas da las societads regiunalas. La strategia da l'uniun dals 15 da zercladur 2021 concretisescha questas incaricas.

 L'organ suprem da l'uniun è la radunanza da delegads. Il cussegl d'administraziun da la SSR è la suprastanza da l'uniun. Ils presidents e presidentas da las quatter societads regiunalas èn a medem temp commembers dal cussegl d'administraziun e commembers da la radunanza da delegads.

Var 23 500 persunas en Svizra èn commembras e commembers da la uniun purtadra da la SRG SSR

En mintga societad regiunala garantescha il cussegl dal public il barat tranter il public ed ils responsabels per il program. Il cussegl dal public sustegna uschia la lavur da program da la chasa da medias SSR. In servetsch da mediaziun prenda encunter reclamaziuns che pertutgan la purschida da la SSR e fan or da quellas recumandaziuns per las redacziuns.

Actualisà l'ultima giada: dezember 2023