Scolaziun e perfecziunament: in'investiziun en la qualitad schurnalistica

Nus investin mintg'onn var otg milliuns francs en la scolaziun ed il perfecziunament intern ed extern da nossas collavuraturas e da noss collavuraturs

Stages dattan la pussaivladad a la nova generaziun da schurnalists d'entrar en la professiun: 60 fin 70 stagiaris absolvan durant 12 fin 24 mais in program da scolaziun cun il focus sin ina scolaziun schurnalistica «on the job».

Dapi il 2010 è la scolaziun organisada a moda trimediala. Ultra dals stages ordinaris purschain nus stages curts dad in fin sis mais – il 2015 han 250 principiants en il mund da lavur profità da quai. En cumparegliaziun è la quota d'emprendistas e d'emprendists en la SSR plitost pitschna. La raschun è ch'i dat en Svizra blers emprendissadis per professiuns tecnicas e per funcziuns da support, dentant betg per activitads schurnalistic-publicisticas.

Ina scolaziun schurnalistica fundada è essenziala per il schurnalissem svizzer. Perquai sustegnain nus scolaziuns schurnalisticas en Svizra tudestga ed en Svizra franzosa: la SSR ha confundà il 1984 il Center da scolaziun da medias (MAZ) a Lucerna. Cun ina contribuziun annuala a la fundaziun MAZ promova la SSR era finanzialmain la furmaziun da schurnalistas e schurnalists futurs.

Ensemen cun il Centre de Formation au Journalisme et aux Médias (CFJM) purschain nus en Svizra franzosa a schurnalists futurs da l'Académie du journalisme et des médias de l'Université de Neuchâtel (AJM) plazzas per stages curts.

RSI tgira partenadis cun instituziuns chantunalas e federalas e cun editurs locals, p.ex. per organisar il «Corso di giornalismo della Svizzera italiana».