Qualitad per tuts

La lavur editoriala da la SSR dat paisa a la qualitad. Grazia a l'independenza economica e politica ed auts standards cuntanschan ils programs 94 pertschient da la populaziun svizra ed els giaudan ina gronda credibladad. La qualitad è service public.

En noss programs tschentain nus in punct da cuntrast al trend global dad infurmaziuns e currellas che sa derasan spert e che n'èn savens betg verifitgadas. Tut noss schurnalists èn obligads a nossas ideas directivas (credibel, independent, divers, creativ e fair) e sa tegnan vi da nossa Charta da schurnalissem.

Nus essan la suletta interpresa da medias che producescha purschidas audiovisualas en tut ils quatter territoris linguistics ed en tut las linguas naziunalas. La purschida per l'entira populaziun sa drizza tenor ils basegns dals umans cun differentas pretensiuns.

Nus pussibilitain a tuts l'access a noss programs: ad umans cun impediments dals senns, a la Svizra multiculturala ed a regiuns, en las qualas nus pudain porscher in program equivalent mo grazia a la gulivaziun da finanzas regiunala. Nossa purschida collia e surpassa ils cunfins da linguas, regiuns, gruppas e generaziuns.

Blers posts ans observan attentamain e controlleschan nus.
La controlla vegn fatga internamain ed externamain.

La qualitad sco process

La qualitad n'è nagin stadi, ella sto adina puspè vegnir elavurada da nov. Nus avain sviluppà instruments per mesirar, diriger e survegliar la qualitad en il program. Impuls e propostas da noss collavuraturs gidan nus a sviluppar vinavant il management da qualitad a moda orientada a la pratica. Nus ans barattain stedi cun collegas da l'exteriur e da la community da perscrutaziun.

Er il public è in indicatur impurtant: ils tschintg cussegls dal public observan il program a moda critica ed independenta. Er ordaifer quests cussegls è dumandada l'opiniun dal public, uschia p.ex. en discussiuns da gruppa per il svilup dal program. Plinavant existan numerus organs da controlla externs che surveglian nossa lavur e che dattan impuls per meglieraziuns: l'Uffizi federal da communicaziun ed il Departament federal per ambient, traffic, energia e communicaziun controlleschan, sche las basas legalas vegnan resguardadas. Il Cussegl svizzer da la pressa veglia sco organ da milissa la qualitad dal radio public e dal schurnalissem svizzer.

Ils tschintg servetschs da mediaziun intermedieschan en cas da reclamaziuns da la populaziun cunter nossa purschida publicistica. Sch'ina persuna n'è betg cuntenta, po ella far recurs tar l'Instanza independenta da recurs da radio e televisiun (AIRR) che exequescha ina procedura giuridica.

Noss management da qualitad sa basa sin sis pitgas:

  1. standards da qualitad e normas: reglas impurtantas èn fixadas ed accessiblas en manuals u en directivas.
  2. manar cun finamiras: tant per collavuraturs sco era per emissiuns vegnan definidas, fixadas e controlladas finamiras.
  3. resursas e process: andaments da lavur e process per recrutar ed engaschar collavuraturs èn definids cleramain.
  4. feedback e controlla da qualitad: i dat feedbacks sistematics e checks da qualitad. Las experientschas vegnan integradas en ils process redacziunals.
  5. furmaziun: la purschida cumpiglia scolaziuns e perfecziunament solids, programs da scolaziun individuals e programs specifics per persunas da cader.
  6. perscrutaziun dal public e dal martgà: i vegn relevà quant public ch'ina purschida ha e co ch'ella chatta accoglientscha. Reacziuns sin enquistas van enavos a las redacziuns, per che quellas possian meglierar d'in cuntin lur planisaziun.

Organs da controlla

Nus vegnin survegliads sistematicamain da blers egls ed il public ha la pussaivladad da cundecider: via organs da controlla interns cun daventar commember da l'uniun purtadra u via organs da controlla externs sco ils tschintg servetschs da mediaziun da la SSR e l'Autoritad independenta da recurs da radio e televisiun (AIRR).