Furmaziun per tuts

Furmaziun vul dir emprender e sa sviluppar permanentamain. La furmaziun intermediescha savida e gida a chapir il nunenconuschent. La furmaziun fa punts en la Svizra quadrilingua e multiculturala. La furmaziun gida a sa far in'opiniun libra, dat orientaziun ed è l'avegnir. La furmaziun è service public.

La furmaziun en sia varietad

Furmaziun e savida gidan ils umans ad avair success en la vita. La furmaziun è ina pitga da l'economia svizra. La vasta purschida da furmaziun da la SSR procura per savida per tut ils umans en Svizra.

Nus deditgain 13 pertschient dal temp d'emissiun da radio e televisiun a la furmaziun. Quai èn passa 6000 uras.

Nossas emissiuns preschentan in panorama da furmaziun plain fassettas da la scienza e medischina, la fauna e natira, l'economia e la protecziun dals consuments sco era da l'istorgia, l'art e las medias u viadis e la cultura. Ellas porschan savida da la perscrutaziun e da la pratica, dattan infurmaziuns supplementaras e cussegls.

En nossas purschidas da novitads e d'infurmaziuns derasain nus mintga di savida e furmaziun – en tut las quatter linguas naziunalas. Nossa vista or d'ina perspectiva svizra sin ils eveniments creescha savida e contribuescha a la furmaziun libra da l'opiniun.

Furmaziun: Quai èn 13 pertschient dal temp d'emissiun da radio
u passa 6000 uras.

La furmaziun è program

Da la purschida da furmaziun en la televisiun fan part emissiuns sco «Cuntrasts», «Minisguard», «DOK», «Reporter», «Einstein» e «Kulturplatz» sco era formats per la scola e l'instrucziun sco p.ex. «SRF mySchool». Ella cumprenda in mez tschientaner scola e furmaziun en la televisiun – da l'emissiun da scola frontala en alv e nair fin a la plattafurma da scolaziun multimediala.

En il radio dattan en il tun emissiuns da furmaziun sco «Forum», «Marella», «Kontext», «Echo der Zeit», «Espresso» e «Ratgeber». «Tips, trics e tacs» explitgescha chaussas interessantas per quels ch'èn en gronda prescha.