Constituì la «Fundaziun Patrimoni Cultural RTR»
Il patrimoni audiovisual da la Svizra rumantscha duai vegnir digitalisà, segirà e rendì accessibel a la publicitad a lunga vista. Cun questas finamiras han la direcziun generala ed il cussegl d’administraziun da la SRG SSR decidì da constituir la «Fundaziun Patrimoni Cultural RTR». La fundaziun cumenza sia lavur il 1. da schaner 2022.
Radiotelevisiun Svizra Rumantscha (RTR) è ina da las instituziuns en il Grischun che dispona cun millis registraziuns audiovisualas d’in dals archivs ils pli impurtants da quest gener en la Svizra rumantscha. Damai in patrimoni che na duai en il senn dal service public betg mo vegnir segirà a lunga vista, mabain era documentà correspundentamain per la populaziun. En pli sustegna la fundaziun natiralmain era projects respectivs en collavuraziun cun ulteriuras organisaziuns ed auters partenaris en il sectur da la digitalisaziun e da l'elavuraziun dal patrimoni cultural rumantsch.
Gilles Marchand, directur general da la SRG SSR: «L'archiv da RTR cumpiglia in grond dumber da registraziuns audiovisualas cun atgnas producziuns. Las registraziuns da tun e maletg illustreschan in'impurtanta part da la vita culturala, politica e sociala da la Svizra, surtut da la Svizra rumantscha. Quest patrimoni cultural vali da mantegnair. Jau sun cuntent che la SRG SSR po far qua in'ulteriura contribuziun che va surtut a favur da la Svizra rumantscha e che rinforza sia identitad.»
La fundaziun è vegnida constituida ils 3 da december 2021 e cumenza sia lavur il 1. da schaner 2022. Presidià vegn il cussegl da fundaziun da Nicolas Pernet, directur da RTR, la vicepresidenta è Beatrice Baselgia-Brunner. L’administraziun surpiglia Erwin Ardüser e sco ulteriurs commembers fan part da la fundaziun Elena Luzio e Theo Mäusli.
Nicolas Pernet, directur da RTR: «Cun la fundaziun disponin nus ussa d'in instrument che po s'occupar – independentamain da las lavurs medialas quotidianas da RTR – cun projects ch'èn indispensabels gist era per il svilup e mantegniment d'ina minoritad linguistica e culturala. Quai er en collavuraziun cun autras organisaziuns. La fundaziun è en quel reguard d'impurtanza centrala. Cun illustrar ed elavurar nossa istorgia culturala pudain nus chapir e contextualisar meglier quai che capita. Quai è ina part essenziala d'in bun service public.»
Survegliada vegn la fundaziun dal chantun Grischun. La sedia da la fundaziun è – sco quella da RTR – a Cuira. La fundaziun n'ha naginas finamiras commerzialas.
Ulteriuras infurmaziuns:
Erwin Ardüser
erwin.ardueser(at)rtr.ch / Tel. 058 136 30 44
