RTS survegn in nov edifizi il 2025
Il cussegl d'administraziun da la SSR ha approvà oz il credit da realisaziun per construir in nov edifizi per RTS sin l'areal da la Scola politecnica federala Losanna (EPFL). Il nov edifizi polivalent e modulabel vegn ad unir sut in tetg ils secturs radio, televisiun e digital. A lunga vista pussibilitescha l'edifizi a RTS da spargnar passa 3 milliuns francs ad onn.
A chaschun da sia sesida dad oz ha il cussegl d'administraziun da la SSR approvà il credit da realisaziun per il project Campus. Il project prevesa da construir in nov edifizi per RTS sin l'areal da l’EPFL ad Ecublens. L'edifizi actual a La Sallaz han ins vendì l'onn 2015 per 55 milliuns francs al chantun Vad. Per la construcziun dal center da producziun che duai remplazzar quel han ins budgetà ina summa da 120 milliuns francs. Tiers il credit da construcziun vegnan anc ils custs per l'infrastructura tecnica. Quels vegnan quintads tar las investiziuns tecnicas regularas da RTS.
La construcziun nova è necessaria, perquai ch'ils edifizis a La Sallaz VD (radio), Meyrin GE (televisiun mobila) ed il grond studio da televisiun al quai Anserment a Genevra èn vegls. Gilles Marchand, il directur general da la SSR, motivescha la decisiun suandantamain: «Quest project è d'impurtanza per l'entira Svizra romanda. El è adattà perfetgamain per producir cuntegns da radio e da video per RTS. Plinavant porscha el pussaivladads fitg interessantas per ina collavuraziun pli stretga tranter las scolas autas e RTS en la regiun da Losanna, sco quai ch'igl è gia sa cumprovà a Genevra.»
En cumparegliaziun cun la renovaziun dals edifizis existents è ina construcziun nova pli favuraivla, schizunt sch'ins includa ils custs per l'externalisaziun temporara da las activitads. Cun la realisaziun dal project pon ins ultra da quai cuntanscher las finamiras da la strategia d'immobiglias da la SSR: RTS po sminuir sia surfatscha per totalmain 25 pertschient e reducir ils custs da gestiun a lunga vista per 3 milliuns francs ad onn. Cun la vendita da l'edifizi a La Sallaz al chantun pon ins gia cuvrir bunamain 50 pertschient da las investiziuns da construcziun approvadas.
Jean-Michel Cina, il president dal cussegl d'administraziun da la SSR, declera: «La decisiun gida era da garantir l'equiliber da las investiziuns en las differentas regiuns linguisticas. La SSR resta decentrala ed effizienta.»
Il nov center da producziun transmedial (per radio, televisiun e multimedia) correspunda dal tuttafatg a la strategia da la SSR che promova la convergenza da las medias. Dasper sia preschientscha en tut ils chantuns da la Svizra romanda, mantegna la SSR cun Genevra e Losanna vinavant duas fermas sedias principalas diversifitgadas. Las activitads da RTS a partir dal 2024/2025 vegnan repartidas en il rom d'in process participativ current cun teams professiunals. Il cussegl d'administraziun da la SSR ha tadlà il partenari social, il Sindicat svizzer dals meds da massa (SSM), e prendì enconuschientscha da sias constataziuns e recumandaziuns.
Servetsch da pressa SSR
Lauranne Peman
medienstelle.srg(at)srgssr.ch / Tel. 031 350 95 95
