Program multifar al Di da la musica svizra
A chaschun dal Di da la musica svizra che ha lieu ils 16 da settember laschan ils emetturs da radio da la SRG SSR ir durant 24 uras mo musica dad artistas ed artists svizzers. Il program vegn enritgì cun intervistas e preschentaziuns en directa da musicistas e musicists sco Sam Himself, Danitsa e Chiara Banchini.
La lavur da las artistas e dals artists svizzers e la diversitad musicala svizra stattan ils 16 da settember en il center dals emetturs da radio da la SRG SSR. Durant 24 uras va mo musica svizra: Dal classicher svizzer fin a novas scuvertas da highlights musicals. Per cumplettar la tematica metta mintga emettur differents accents ed envida musicistas e musicists ad intervistas e represchentaziuns live en il studio.
Radio SRF 1 discutescha tranter auter cun il musicist dialectal Toni Vescoli, la musicista e chantautura Jaël, il saxofonist e leader da band Pepe Lienhard e cun autras artistas ed auters artists davart l'influenza da la pandemia da corona sin la scena da musica svizra. Intginas da las musicistas ed intgins dals musicists vegnan a dar concerts directamain en il studio. Rete Uno metta il focus sin musica svizra franzosa e taliana cun giasts sco l'artist grischun Alfredo Parolini ed il musicist Franz Treichler. Radio RTR metta natiralmain en il center la scena da musica rumantscha. Er en la Svizra franzosa è la musica svizra trumf: la musicista bernaisa Veronica Fusaro, la rappunza Silance ed il duo da folk The Woodgies sa preschentan live sin RTS La1ère. L’emettur da televisiun RTS 2 prenda cun sai las aspectaturas ed ils aspectaturs sin in viadi tras il temp da la scena da musica svizra dapi l'onn 1954.
Giuvens talents svizzers en il «Pavillon Suisse»
En il rom dal Di da musica svizra ed en vista a la surdada dal Premi svizzer da musica ils 17 da settember preschentan en il studio da RSI quatter talents da la musica classica tocs selecziunads e discutan davart lur carriera e las particularitads da lur professiun. L'emissiun da duas uras cun la violinista Anna Naomi Schultsz, il cellist Jonathan Gerstner, il pianist Alex Cattaneo e la flautista Luana Pereira Teixeira è quadrilingua e vegn emessa live a las 14:30 sin Rete Due e pli tard sin Espace 2, SRF 2 Kultur e Radio RTR.
La plattafurma da musica svizra Mx3 festivescha il 15avel anniversari
A chaschun dal Di da la musica svizra festivescha en pli la plattafurma da musica svizra Mx3 ses 15avel anniversari. La plattafurma vegn gestiunada dals emetturs da radio Rete Tre, SRF 3, Couleur 3, SRF Virus e Radio RTR. Cun questa occasiun vegnan a star sin tribuna otg furmaziuns artisticas da las quatter regiuns linguisticas en il club da musica Fri-Son a Friburg. Quai èn ils musicists Tatum Rush e Sam Himself, las chantaduras e chantauturas Animor, Danista, Ursina, Fiona Fiasco e Caroline Alves sco er il trio genevrin Barrio Colette. Il concert vegn emess a partir da las 19:00 live sin Rete Tre, SRF 3, Couleur 3 e RTR.ch.
Contact
Post da medias SRG SSR
Sibylle Tornay
058 136 21 21
medienstelle.srg@srgssr.ch
