La SSR festivescha ses giubileum da 90 onns

Communicaziuns a las medias 24.02.2021

Quai che ha cumenzà sco emettur da las plazzas aviaticas a Losanna, Genevra e Turitg ed è vegnì reunì ils 24 da favrer 1931 sco «Societad svizra da radiodiffusiun», è oz in'interpresa da medias cun radund 6900 collavuraturas e collavuraturs, tschintg unitads d'interpresa ed ina societad affiliada en mintgina da las quatter regiuns linguisticas, 17 programs da radio e set programs da televisiun. La «Societad da radio e televisiun» SRG SSR dad oz festivescha ses giubileum da 90 onns.

90 onns SRG: Intervista cun Jean-Michel Cina e Gilles Marchand

La SSR festivescha ses giubileum da 90 onns a moda modesta cun ina collecziun da giubileum speziala da films documentars sin sia nova plattafurma da streaming Play Suisse. Ils films dattan il medem mument invista en l'istorgia plain fassettas da l'interpresa da medias ed en l'istorgia da la Svizra dapi l'onn 1931, cura che la SSR è vegnida fundada.

Ils emprims emetturs da radio publics en Svizra èn stads emetturs da las plazzas aviaticas a Losanna, Genevra e Turitg. Els derasavan communicaziuns e prognosas da l'aura per l'aviaziun e tranteren laschavan els ir musica giu da plattas. Successivamain èn vegnidas vitiers novitads generalas e la derasaziun da resultats da sport. Ils 24 da favrer 1931 èn las set organisaziuns regiunalas s'unidas a l'uniun Societad svizra da radiodiffusiun (SSR). 

Novitads sulettamain da l'ATS e la «Defensiun naziunala spiertala» 

La SSR ha survegnì dal Cussegl federal la concessiun exclusiva per emissiuns da radio en Svizra. Sco prescrit dal contract dastgava ella retrair infurmaziuns sulettamain da l'Agentura telegrafica svizra ATS. Cura ch'il rumantsch è vegnì renconuschì sco quarta lingua naziunala svizra il 1938, ha il studio da radio a Turitg cumenzà d'emetter contribuziuns er en rumantsch.

Da l'exposiziun naziunala dal 1939 ha la SPF/ETH Turitg preschentà per l'emprima giada la nova tecnica da televisiun en Svizra. Durant la Segunda Guerra mundiala ha la SSR sustegnì cun ses trais emetturs naziunals Radio Beromünster (tudestg), Radio Sottens (franzos) e Radio Monte Ceneri (talian) la Defensiun naziunala spiertala. Las emissiuns davart la situaziun politica e militara vegnivan emessas en tut il mund via undas curtas. Il Radio Beromünster, numnà suenter l'emettur naziunal Beromünster en il chantun da Lucerna, valeva da quel temp sco sulet emettur tudestg «liber» da l'entira Europa.

A partir dal 1953 ha la SSR introducì in manaschi da televisiun uffizial. En la regiun da Turitg vegniva emess durant tschintg sairas l'emna in program dad in'ura ed era Genevra ha survegnì sia emprima concessiun d’emprova per il manaschi da televisun. Il 1954 ha la SSR fundà ensemen cun otg autras staziuns da televisiun europeicas l'Eurovision. L'onn 1957 ha la SSR alura survegnì l'emprima concessiun da televisiun uffiziala en Svizra. Las emissiuns a Turitg èn vegnidas cumplettadas a partir da la mesadad da l'onn 1958 cun emissiuns tudestgas e franzosas da Turitg e Genevra e l'emettur da la Svizra taliana transmetteva programs da las autras parts dal pajais cun commentaris talians. Ses emprim agen studio da televisiun en il Tessin ha la Svizra taliana survegnì l'onn 1961. Il 1963 han ins pudì guardar l'emprima emissiun rumantscha, il Balcun tort.

Terzs programs per ils giuvens ed avertura internaziunala

Ils onns 1970 ha la SSR pudì avrir novs studios da televisiun a Genevra, Turitg e Comano. A partir da l'onn 1971 n'ha betg pli l'ATS producì las novitads da radio, mabain la SSR ha surpiglià la responsabladad. A partir dal 1974 è l'istorgina da buna notg vegnida emessa per rumantsch mintgamai 2 giadas l'emna sin l’emettur da televisiun tudestg. Il 1983 ha la SSR introducì terzs programs per il public giuven: DRS 3 e Couleur 3. L'emprim teletext sin ils emetturs da televisiun svizzers hai dà a partir dal 1984. Il medem onn ha la SSR loantschà ensemen cun il ZDF tudestg e l'ORF austriac il program communabel 3sat sco era l'emettur franzos TV5 Monde ensemen cun partenaris franzos e beltgs. Il 1988 è vegnì lantschà il program tessinais Rete Tre.
Ils segunds emetturs da televisiun SF 2, TSR 2 e TSI 2 – spezialmain impurtants per il sport – han cumenzà lur manaschi l'onn 1997. Quel onn han ils programs da Swiss Satellite Radio Swiss Pop, Radio Swiss jazz e Radio Swiss Classic plinavant remplazzà la telediffusiun. 

swissinfo.ch, l'emprima plattafurma d'internet da la SSR, ha Schweizer Radio International lantschà l'onn 1999. Quella ha pussibilità l'access internaziunal als programs da la SSR ed ad infurmaziuns da la Svizra. L'onn 2010 èn Radio Suisse Romande (RSR) e Télévision Suisse Romande (TSR) s'unidas a Radio Télévision Suisse (RTS). In onn pli tard han ins fatg il medem pass en Svizra tudestga, cura che Schweizer Radio DRS (SR DRS) e Schweizer Fernsehen (SF) han fusiunà per daventar Schweizer Radio und Fernsehen.

Ils 4 da mars 2018 han las votantas svizras ed ils votants svizzers refusà cun 71,6 pertschient l'iniziativa dal pievel per abolir la taxa da medias. Silsuenter ha la SSR introducì vastas mesiras da transfurmaziun e pervia d'entradas da reclama regressivas ha ella realisà mesiras per spargnar plirs milliuns. Covid-19 ha pretendì stentas da spargnar supplementaras, schebain ch'ils programs da la SSR han dastgà giudair ina popularitad surproporziunala durant la pandemia. Ils 7 da november 2020 è la nova plattafurma da streaming Play Suisse ida online. La purschida ha fin oz gia passa 200'000 abunentas ed abunents. 

In grond grazia fitg al public ed a las collavuraturas ed als collavuraturs 

Il president dal cussegl d'administraziun da la SSR Jean-Michel Cina davart il giubileum: «Dar in sguard en l'istorgia da la SSR è sco da dar in sguard en l'istorgia da la Svizra. Cun collavuraturas e collavuraturs excellents e professiunals contribuin nus oz ed er en futur essenzialmain a la coesiun dal pajais, cuntanschain ina plivalur sociala per ils umans en Svizra e per noss public en quatter linguas ed essan francads en tut las parts dal pajais e sin tut ils chanals.»

Il directur general da la SSR Gilles Marchand: «Dapi il di da sia fundaziun accumpogna la SSR la societad svizra e mussa sia diversitad, ses success, ses dramas, ses siemis e sias sfidas. Nus essan decentrals, multiculturals, multilinguals ed enragischads fermamain, ma tuttina averts per auters. In cordial engraziament a nossas collavuraturas e noss collavuraturs che prestan er en temps pretensius adina ina grondiusa lavur. Engraziar less jau er al public svizzer ch'è restà fidaivel al program da la SSR durant quels 90 onns, l'emprim al radio, lura en la televisiun ed oz er en las purschidas online.»

A chaschun da ses giubileum vul la SSR pussibilitar ina interessanta invista en il svilup dals ultims decennis. Sin la plattafurma da streaming Play Suisse èn perquai da chattar ina retscha da films documentars da tut las regiuns linguisticas. Quels pussibiliteschan da laschar reviver anc ina giada in pèr puncts culminants da l'istorgia da la SSR:

  • «90 Jahre Service public» (intervista cun Jean-Michel Cina e Gilles Marchand)
  • «Qui Marco Blaser»      
  • «TSI oggi e domani»      
  • «Im Kreuzfeuer – Wie die SRG unter Druck kam»        
  • «50-Jahr-Jubiläum Schweizer Fernsehen»
  • «Die Entstehung der Tagesschau»
  • «50 onns Televisiun Rumantscha»
  • «Oz – ier – dumaun: 75 onns RTR» 
  • «Balcun Tort – 50 onns Televisiun Rumantscha»
  • «La TSR à Wengen»     
  • «Guerre froide à la TSR»
  • «Radio Genève»

 

Ina cronica cun maletgs da la SSR dapi il 1931: la SRG SSR dapi il 1931 

Contact

Post da medias SSR
Edi Estermann
tel. 058 136 21 21
medienstelle.srg@srgssr.ch