La SSR avra ses archivs per las chasas da medias svizras via la plattafurma da Shared Content
La SSR augmenta sia purschida d'archiv per il public svizzer. Ultra dals cuntegns d'archiv offerts fin uss en l'internet ed a las staziuns da consultaziun specificas en bibliotecas ed universitads, pon las schurnalistas ed ils schurnalists da las chasas da medias svizras uss era retschertgar en ils archivs da la SSR e telechargiar videos via la plattafurma da Shared Content per als duvrar sin lur paginas-web.
La SSR fa in ulteriur pass vers l'avertura da ses archivs da radio e televisiun. Sco annunzià vul la chasa da medias publica undrar uschia l'istorgia cuminaivla dal pajais. Las unitads d'interpresa da la SSR (SRF, RTS, RSI e RTR) mettan perquai a disposiziun novs contos da retschertga, controlleschan ils cuntegns selecziunads concernent ils dretgs da terzs che na dastgan betg vegnir violads e dattan silsuenter liber per telechargiar il material giuridicamain verifitgà. En ina dimensiun limitada èsi era pussaivel d'incumbensar ils archivs da far retschertgas. L'export dals videos succeda via la plattafurma da Shared Content (sharedcontent.srgssr.ch), nua che stattan a disposiziun gia oz ils cuntegns da novitads da la SSR. Ils videos èn almain in onn vegls, cumpiglian sequenzas, entiras contribuziuns u emissiuns (senza ina limitaziun da la lunghezza) e na dastgan betg vegnir elavurads. Per motivs da l'economia da lavur vegn il dumber da videos telechargiabels ad esser limità.
Ils dretgs dals cuntegns restan tar la SSR. Las interpresas da medias pon dentant utilisar ils videos en in ambient commerzial.
Sin differentas paginas-web ed installaziuns da las unitads d'interpresa da la SSR e d'instituziuns publicas èn accessiblas gia oz millis uras da cuntegns d'archivs audiovisuals. Dapi il 2017 metta la SSR a disposiziun metadatas d'archivs selecziunads per programmadras e programmaders via in'interfatscha publica. Ultra da quai porscha l'interpresa dapi l'atun 2018 documents d'archiv da la SSR per intents da retschertga. Quels èn accessibels via las staziuns da consultaziun localas d'instituziuns culturalas. Ed ussa survegnan era las chasas da medias privatas material da video istoric da las singulas unitads d'interpresa. La finamira da quest pass è da rinforzar la plazza da medias svizra.
La SSR è en l'entir mund ina da las emprimas chasas da medias che accelerescha la digitalisaziun e l'avertura da ses archivs a moda uschè consequenta.
Post da medias SSR
Francesca Guicciardi: Medienstelle.srg(at)srgssr.ch / tel. 031 350 95 95
