La SRG SSR lantscha sia nova plattafurma da streaming ils 7 da november

Communicaziuns a las medias 22.10.2020

En paucs dis vegn lantschà Play Suisse: ils 7 da november preschenta la SSR sia nova plattafurma da streaming a la publicitad. La lantschada ha lieu en il rom dal Geneva International Film Festival. Play Suisse è disponibel via computer, smartphone e televisiuns intelligentas – ed era sco app sin Swisscom blue TV.

Play Suisse metta il focus sin l'entira Svizra: cun la plattafurma naziunala da streaming pon ils cuntegns da la SSR vegnir consumads a moda pli simpla e persunalisada e grazia als suttitels na datti naginas barrieras linguisticas.

La lantschada vegn ad avair lieu en il rom dal Geneva International Film Festival (GIFF). Bakel Walden, directur Svilup e purschida e manader dal Digital Board da la SSR: «Nus essan sin ils ultims meters da la preparaziun. Ed igl è per nus ina schanza unica da lantschar Play Suisse en il rom dal Geneva International Film Festival. Er il festival experimentescha numnadamain gugent cun las pli differentas expressiuns da film, televisiun ed art digital ed è pia l'occurrenza perfetga per preschentar Play Suisse».

L'access direct a Play Suisse vegn sustegnì en spezial dal partenadi tecnic cun Swisscom blue TV. «Nus partin cun ina purschida grondiusa che vegn engrondida cuntinuadamain e nus ans legrain fitg da la collavuraziun cun Swisscom blue TV», di Pierre-Adrian Irlé, manader da project da Play Suisse. Sco partenaria da lantschada da Play Suisse vegn la Swisscom a plazzar la plattafurma en ses blue TV-App Store per rinforzar la visibilitad da la purschida.

«Nus avain plaschair che nus avain pudì contribuir al svilup da Play Suisse. A partir dals 7 da november pon noss clients giudair ils cuntegns da Play Suisse sin blue TV», sa legra Wolfgang Elsässer, CEO da Blue Entertainment AG. En il fratemp vegnan manads discurs cun auters purschiders da telecommunicaziun e d'internet e cun partenaris da plattafurmas culturals. En pli è Play Suisse a partir dals 7 da november accessibel sin playsuisse.ch e disponibel sco app per iOS ed Android. Il dumber da plattafurmas vegn augmentà pass per pass.

Post da medias SSR
Edi Estermann
medienstelle.srg(at)srgssr.ch / tel. 058 136 21 21