La SRG SSR lantscha il project da pilot «dialog»

Atgnamain è «dialog» ina gronda retschertga d'opiniun bunamain permanenta en uschè blers champs tematics sco quai ch'i n'ha anc mai dà en Svizra. Sin las plattafurmas da novitads digitalas da las unitads d'interpresa da la SRG SSR – RTR, SRF, RTS, RSI e SWI swissinfo.ch – e sin las applicaziuns pon las Svizras ed ils Svizzers en Svizra ed a l'exteriur respunder a dumondas davart la politica, la cultura, la societad u simplamain davart lur vita da mintgadi ed uschia contribuir ad in'impressiun mumentana da quai che muventa la Svizra e ses bainstar. 

Interactivitad, debatta e dialog 

Cun agid d'in tool interactiv pon las utilisadras ed ils utilisaders respunder a dumondas e cumparegliar lur tenuta e lur valitaziun cun il rest da la populaziun. In tool da debatta pussibilitescha en pli da sa barattar davart temas actuals, e quai sur ils cunfins da las regiuns linguisticas ora. Il team da redacziun moderescha e translatescha las debattas en tschintg linguas. Il team da «dialog» surregiunal sa cumpona da schurnalist:as, manager:as da community e sviluppad:ras da tut las tschintg unitads d'interpresa da la SRG SSR e lavura a moda decentrala or da tut las regiuns linguisticas da la Svizra. Il project da pilot dura fin ils 31-12-2025. Responsabla per il project è la Conferenza da las schefredacturas e dals schefredacturs da la SRG SSR e manader da project è Marco Morell, schef d'ediziun da la schefredacziun Audio da SRF. 

Di tematic naziunal ils 23 d'avust 

Per il di tematic naziunal dad oz preschentain nus sin ils emetturs e chanals da la SRG SSR ils resultats d'ina emprima gronda retschertga d'opiniun (57'000 participant:as), realisada per incumbensa da «dialog». Ils proxims mais suondan successivamain ulteriurs resultats. Sin fundament da las constataziuns e dals resultats vegn il team da redacziun da «dialog» a metter ensemen e publitgar online contribuziuns redacziunalas fundadas – uschenumnads pachets infurmativs – da tut las unitads d'interpresa da la SRG SSR. Uschia vul ins resguardar anc meglier ils basegns da la populaziun svizra. 

Il directur general da la SRG SSR Gilles Marchand davart il project da pilot: «Ultra d'analisar las prioritads da las Svizras e dals Svizzers han las redacziuns da la SRG SSR duas finamiras: Per l'ina porschan ellas il spazi per discussiuns moderadas preziusas en la tradiziun da la democrazia directa da la Svizra. Per l'autra vulan ellas far punts tranter las regiuns linguisticas. En l'interess da tuts duai il project scuvrir las pussaivladads ch'ils tools digitals porschan per cumplettar il broadcast dad oz.» 

La populaziun svizra è da princip cuntenta 

Ils resultats da l'emprima enquista mussan: la Svizra è in pajais cun ina populaziun ch'è da princip fitg cuntenta. Cun la maioritad da las persunas interrogadas, numnadamain 61 pertschient, vai bain fin fitg bain e mo tschintg pertschient giuditgescha sasez:za sco malcuntent:a. Questa cuntentientscha generala deriva en spezial da la vita privata, schegea ch'ins passenta la gronda part dal temp dal mintgadi cun la lavur. I dat però era varts main positivas: strusch in terz è en ina situaziun finanziala «plitost u fitg» pesanta - cunzunt en Svizra taliana e rumantscha. Las finanzas ed il squitsch da prestaziun adina pli grond èn ils facturs che influenzeschan il pli fitg il sentiment da ventira da las persunas interrogadas.  

Ulteriuras constataziuns da l'enquista cun passa 300 dumondas vegnan preschentadas a partir dad oz sin ils chanals da la SRG SSR. Tranter auter en connex cun temas sco la confidenza en actur:as da la politica e l'interess per temas dal cumbat electoral en vista a las proximas elecziuns.