La SRG SSR e la branscha da film sa cunvegnan davart in nov «Pacte de l’audiovisuel»

Las tractativas davart il nov «Pacte de l’audiovisuel», la cunvegna da coproducziun tranter la SRG SSR e la branscha da film privata, han cumenzà a chaschun dals Dis dal film da Soloturn il schaner 2023. Il contract definescha las cundiziuns da basa per producziuns che la SRG SSR realisescha ensemen cun producent:as privat:as ed independenta:as.  

Il preventiv vegn augmentà 

Il preventiv total vegn augmentà per 1.5 milliuns francs sin da nov 34 milliuns francs per onn. La SRG SSR reagescha cun quest pass sin la chareschia ed ils custs adina pli auts per producziuns da films. Il preventiv per films da kino vegn augmentà correspundentamain da 9 sin 10 milliuns francs. Er il film animà vegn rinforzà pli fitg e sustegnì da nov cun dus milliuns francs empè dad 1 milliun francs sco fin ussa. 

Dretgs d’utilisaziun da streaming rinforzads 

Er ils dretgs d'utilisaziun vegnan redefinids: Producent:as han ussa la pussaivladad d'utilisar films lungs durant 18 mais e films documentars durant 12 mais, avant ch'els vegnan mussads sin ils emetturs da la plattafurma da la SRG SSR. Persuenter èn ils films silsuenter disponibels il medem mument era sin Play Suisse, la plattafurma da streaming da la SRG SSR. Per serias vegnan ils dretgs d'utilisaziun da streaming augmentads ulteriuramain. Da nov ha la SRG SSR ils dretgs durant 18 mais. Sco schon fin ussa èn las serias (primarmain ficziunalas, ma er documentaras) disponiblas sis mais exclusivamain sin Play Suisse. 

La collavuraziun cun plattafurmas da terzs vegn medemamain reglada. Ils partenaris reageschan cun quai sin l'obligaziun d'investir che entra en vigur a partir dal 1. da schaner 2024 («Lex Netflix»).  

In focus pli ferm sin ina moda da producir pli persistenta  

Las partidas s'engaschan en il rom dal nov Pacte per ina moda da producir pli persistenta («green filming»). En il center stattan il svilup da cumpetenzas (calculatur da CO2, «best practices», persunal incumbensà per persistenza da producziuns da films, etc.), l'obligaziun individuala da las producentas e dals producents da resguardar standards ecologics minimals per projects da film pli gronds ed occurrenzas da sensibilisaziun. 

Indemnisaziun adequata dals dretgs d'autur 

La SRG SSR renconuscha er explicitamain la lavur da las auturas e dals auturs. Ils partenaris partan dal fatg che las modalitads d'utilisaziun vegnian a sa midar vinavant tras las purschidas da web-only. La SRG SSR conferma sia veglia da cumpensar er en l'avegnir ils dretgs d'autur tenor cundiziuns gistas. I vegn a dar gruppas da lavur che defineschan novas reglas en vista dal proxim Pacte (a partir dal 2028). 

Er il tema «persunal qualifitgà» fa part dal Pacte. La SRG SSR sustegna la branscha cun mesiras che infurmeschan davart las professiuns en la branscha da film e cun mesiras da perfecziunament e communicaziun. 

Var in terz dals meds vegnan da la SRG SSR  

La SRG SSR resta la pli impurtanta e pli gronda coproducenta en Svizra. Il volumen da producziun en Svizra importa en tut var 150 milliuns francs. Cun il «Pacte de l’audiovisuel» ed ils meds supplementars che la SRG SSR metta a disposiziun per la producziun da serias munta la part da la SRG SSR a bun 50 milliuns francs per onn - var in terz da tut ils meds vegnan pia da la SRG SSR. 

Dapli serias svizras sin iniziativa da la SRG SSR ensemen cun producents independents 

La SRG SSR ha schlargià cuntinuadamain la producziun da serias dapi il 2020 e quai en tut las regiuns ed en tut las quatter linguas naziunalas. Anc quest onn e fin il cumenzament dal 2024 vegnan lantschadas las suandantas serias novas: «Delits Mineurs» (RTS), «Les Indociles» (RTS), «Tschugger 3» (SRF), «Davos» (SRF), «Alter Ego» (RSI) e «L’ultim Rumantsch» (RTR). La SRG SSR coproducescha entant sis fin set serias per onn. Ma era serias documentaras èn fitg popularas e daventan adina pli impurtantas. Suenter «La Fraternité» e «The Pressure Game – Im Herzen der Schweizer Nati» il 2023 vegn producida actualmain «Le Cirque blanc», ina documentaziun en quatter parts davos las culissas da l'equipa da skis svizra.  

Gilles Marchand, directur da la SRG SSR, davart la conclusiun dal nov «Pacte de l’audiovisuel»: «Cun quest nov contract conferma la SRG SSR sias prioritads. Il film gioga ina rolla impurtanta per exprimer nossas identitads svizras. Per la Svizra èsi essenzial da garantir ina producziun naziunala, pertge che films - tuttina sche quai èn films documentars u films lungs - raquintan da nossas realitads en ina moda che cumplettescha l'infurmaziun. La grondezza dal martgà svizzer na permetta betg a questa producziun da sa refinanziar tras entradas commerzialas. Perquai èsi impurtant che la SRG SSR surpiglia responsabladad en quest sectur. Ella contribuescha cun la producziun independenta a l'ulteriur svilup da questa industria creativa.»