La SRG SSR cuntinuescha sia transfurmaziun: Roger Elsener daventa directur SRF, Nicolas Pernet vegn directur Purschida e Moritz Stadler surpiglia il post da directur Operaziuns

La SRG SSR cuntinuescha sia transfurmaziun. Ella fa avanzar decididamain sia midada lantschada la fin dal 2024 cun il project da transfurmaziun «Enavant SRG SSR» vers in’interpresa da medias pli digitala, pli efficazia e pli flexibla. En il futur lavura la SRG SSR pli ferm sur las regiuns, concentrescha sias forzas, nizzegia sinergias internas e resta il medem mument enragischada regiunalmain.

En consequenza da la transfurmaziun sa mida vinavant era la direcziun da la SRG SSR. Suenter l’elecziun da Severine Schori-Vogt sco manadra HR e da Stephanie Jutzi sco manadra Communicaziun ed affars publics vegn ussa cumplettada la direcziun cun trais ulteriurs profils cumplementars: Nicolas Pernet per la direcziun Purschida, Moritz Stadler per la direcziun Operaziuns e Roger Elsener per la direcziun SRF.

Las trais persunalitads directivas portan cun ellas forza innovativa digitala, excellenza operativa ed ina fitg buna chapientscha dal service public e dals basegns dal public. Quai èn cumpetenzas centralas per la SRG SSR da l’avegnir. La direcziun vegn a nizzegiar anc pli ferm sias forzas sur tut la gruppa e resta – grazia a la diversitad da sias commembras e da ses commembers – datiers dal public e quai en tut las regiuns linguisticas.

Roger Elsener daventa directur SRF

Sco nov directur da SRF vegn Roger Elsener a sviluppar vinavant il ferm program areguard cuntegn e qualitad, a far avanzar la digitalisaziun sin fundament da las disas d’utilisaziun dal public ch’èn sa midadas ed a metter in focus era sin il public giuven. El succeda Nathalie Wappler che ha annunzià sia demissiun il settember 2025.

Actualmain è l’um da 47 onns che deriva da la Svizra Centrala CEO da Zattoo, il purschider svizzer principal da streaming televisiv. El ha persvas las commembras ed ils commembers dal comité da nominaziun sut la direcziun da Lukas Bruhin, president da la SRG Deutschschweiz. Dal comité da nominaziun fa part era Susanne Wille sco directura da la SRG SSR. Roger Elsener ha in’experientscha da plirs onns en la fatschenta da radio, da televisiun e da streaming ed ina chapientscha profunda dal martga da medias svizzer. Avant è Elsener stà mainafatschenta da CH Media Entertainment e dapi il 2018 è el commember da la direcziun da la gruppa da radio e televisiun da CH Media. Plinavant è Elsener stà CEO da la CH Media TV AG, la joint venture da CH Media e da Sunrise per lur gruppa da televisiun e da servetsch da streaming oneplus. Avant che lavurar tar CH Media è Roger Elsener stà activ en differentas interpresas da medias en posiziuns directivas, tranter auter tar l’AZ Medien AG, la gruppa 3+ e tar Viacom International Media Networks (MTV, Viva, Nickelodeon). Roger Elsener ha terminà il 2003 ses studi a l’Universitad da Turitg cun in master en publicistica. El è maridà, bab da famiglia e viva oz puspè en ses lieu nativ a Menzingen ZG.

Lukas Bruhin, president da la SRG Deutschschweiz: «La suprastanza regiunala da la SRG Deutschschweiz sa legra ch’il cussegl d’administraziun da la SRG SSR ha elegì Roger Elsener. El porta cun sai tut las premissas per cuntinuar a sviluppar SRF en la Svizra tudestga en il servetsch dal service public, e quai en ina fasa pretensiusa. El ans persvada era sin nivel uman cun sia genuinitad, sia clerezza e sia avertadad.»

Susanne Wille, directura generala da la SRG SSR: «Roger Elsener è in manager da medias ed expert dal mund digital versà che vegn a cuntinuar consequentamain la midada digitala da SRF. El unescha cumpetenza da medias strategica, forza innovativa ed ina profunda chapientscha dal schurnalissem e dal martgà da medias naziunal ed internaziunal. Uschia è el adattà fitg bain per far avanzar SRF sco medium directiv en in ambient che sa mida svelt sco era per sviluppar SRF en la Svizra tudestga ad in medium modern e digital cun in program relevant.»

La directura da SRF Nathalie Wappler banduna SRF la fin d’avrigl. Roger Elsener surpiglia sia nova funcziun senza interrupziun il 1. da matg 2026.

Nicolas Pernet daventa directur Purschida 

Nicolas Pernet maina dapi il 2021 Radiotelevisiun Svizra Rumantscha (RTR) ed è dapi il 2025 vicedirectur general da la SRG SSR. Plinavant è el co-manader dal project da transfurmaziun «Enavant». Il manager da medias ha 46 onns, è naschì en l’Engiadina Bassa ed ha studegià economia da manaschi a l’Universitad da Son Gagl. Il 2010 ha el doctorà suenter segiurns da studi a l’University of Michigan ed a la HEC Paris. Avant che midar tar la SRG SSR ha el lavurà var diesch onns tar l’interpresa da medias Ringier, nua ch’el è stà tranter auter il manader Marketing ed il manader Publishing & News Business per la gruppa Blick da quella giada. Il davos ha el responsà sco Head of Commercial Management ils retgavs commerzials. Nicolas Pernet è maridà, bab da famiglia e viva ad Egg dasper Turitg ed a Cuira.

Il nov sectur Purschida maina tranter auter la plattafurma live e da streaming Play+ sco era las unitads da purschida Ficziun e Sport che vegnan manadas en l’avegnir sur tut la SRG SSR. Uschia vegn garantì che la purschida da la SRG SSR adempleschia anc meglier ils basegns dal public e ch’ella saja a la testa da la tecnologia. Grazia a teams organisads regiunalmain è garantida la proximitad a las aspectaturas ed als aspectaturs. Pernet porta cun sai la cumpetenza dubla dal service public e da la gestiun da product e purschida orientada al public. Quella è centrala per ina strategia da la purschida efficazia da la SRG SSR en tut las regiuns linguisticas. La strategia  vegn orientada unitarmain e po uschia vegnir realisada en l’avegnir a moda anc pli svelta ed effectiva.

Susanne Wille: «Nicolas Pernet ha in’experientscha da plirs onns en il sectur che collia cuntegns medials cun la distribuziun. El porta cun sai las premissas idealas per cuntinuar a sviluppar sistematicamain la strategia da la purschida da la SRG SSR. En il center stattan las spetgas ed ils basegns dal public, il martgà da medias, ses svilups futurs e las tecnologias ch’al fan avanzar.»

Nicolas Pernet cumenza sia nova funcziun il 1. d’avrigl 2026. Sia posiziun actuala vegn publitgada externamain. En il fratemp surpiglia in team transitoric interimisticamain la direcziun da RTR.

Moritz Stadler daventa directur Operaziuns

Il nov sectur Operaziuns unescha la producziun e la tecnologia e stabilescha tranter auter cundiziuns da basa unitaras per tut las activitads da producziun e da tecnologia. L’infrastructura integrada en il futur per tut las regiuns linguisticas e la collavuraziun naziunala intensivada èn in factur impurtant dal project da transfurmaziun «Enavant».

Moritz Stadler maina dapi la mesadad dal 2025 il stream Operaziuns tar «Enavant». Il 2024 è el vegnì elegì sco co-executive producer da l’Eurovision Song Contest 2025 a Basilea. Fin la mesadad dal 2025 è el stà commember da la direcziun da RTS sco manader Operaziuns, nua ch’el ha sviluppà vinavant ed orientà consequentamain la tecnologia e la producziun a las finamiras strategicas da l’organisaziun. Avant è el stà Head of Project Management Office tar Eurovision Services, ina filiala da l’European Broadcasting Union (EBU) a Genevra. Là ha el tranter auter responsà la realisaziun operativa da projects gronds internaziunals. Avant sia activitad tar la SRG SSR e l’EBU ha Moritz Stadler lavurà en differentas posiziuns en la branscha da medias e d’events, tranter auter sco vicedirectur da la producziun tar Europe 1 a Paris, sco er en il rom d’engaschis per l’UEFA e la FIFA, e quai en differentas regiuns dal mund. El ha terminà ina furmaziun sco tecnicist da radio ed ha en pli in diplom en management da l’Universitad da Caen. Moritz Stadler ha 40 onns, è maridà, bab da famiglia e viva a Neuchâtel.

Susanne Wille: «Cun Moritz Stadler avain nus pudì acquistar ina persunalitad directiva che vegn a far avanzar cun tutta forza la SRG SSR ed il service public en ils secturs da la producziun e da la tecnologia. El porta cun sai in’experientscha internaziunala en la realisaziun ed ina gronda excellenza operativa ch’è decisiva per l’effizienza, la qualitad e la segirtad da nossas structuras e da noss process.»

Moritz Stadler surpiglia sia nova funcziun a partir dal 1. d’avrigl 2026.

Preparà il terren per ina ferma SRG SSR en temps pretensius

Cun las elecziuns da Roger Elsener, Nicolas Pernet e Moritz Stadler procura la SRG SSR che secturs centrals da l’interpresa vegnian responsads da persunalitads directivas cumprovadas cun profils spezialisads – en ina fasa, nua che la transfurmaziun digitala, las sfidas finanzialas e la responsabladad publicistica èn entretschadas particularmain ferm ina cun l’autra. Las decisiuns stattan en il segn dal nov posiziunament organisatoric e da la concentraziun sin l’effect e l’effizienza en il rom dad «Enavant».

Jean-Michel Cina, president dal cussegl d’administraziun da la SRG SSR: «Il cussegl d’administraziun sa legra che nus avain pudì acquistar questas trais persunalitads directivas versadas per questas impurtantas funcziuns. Nus essan persvas ch’ellas vegnan a far ina contribuziun impurtanta en connex cun la transfurmaziun da la SRG SSR ed il medem mument a garantir che la SRG SSR adempleschia er en il futur sia incumbensa da service public en la pli auta qualitad.»

Susanne Wille, directura generala da la SRG SSR: «Nus orientain la SRG SSR e ses program multifar consequentamain als basegns dal public e rinforzain a medem temp l’effizienza e la collavuraziun tranter tut las regiuns da la Svizra. Cun questas elecziuns faschain nus in pass impurtant en direcziun d’ina SRG SSR pli digitala, pli efficazia e pli flexibla.»