Intgantar ils giuvens cun novs cuntegns

La pandemia è ina cesura profunda en la vita ed il svilup da la generaziun giuvna. Las midadas furman la basa per numerusas istorgias e per ina discussiun naziunala davart las circumstanzas da viver e las perspectivas per l'avegnir da Svizras e Svizzers. Il Content Board da la SSR sa concentrescha perquai l'auter onn sin las giuvnas ed ils giuvens ed intimescha producentas svizras e producents svizzers sco era collavuraturas e collavuraturs da la SSR d'inoltrar ideas e concepts en emprima lingia per in public giuven. Temas pussaivels èn per exempel la diversitad culturala, perspectivas professiunalas, perspectivas d'abitar, models da viver u la mobilitad.

La finamira da la concurrenza è d'enritgir la purschida da program naziunala da la SSR e da sias unitads d'interpresa SRF, RTS, RSI e RTR cun cuntegns innovativs ed originals che sa drizzan cunzunt ad in public giuven. La SSR è a la tschertga d'ideas che derivan da tut las regiuns da la Svizra e sustegna en quella moda la creaziun audiovisuala ed il svilup d'istorgias che sveglian l'interess e la mirveglia per temas unics che han in connex cun la Svizra. Cun questa concurrenza dat la SSR era la pussaivladad a novs talents da sa profilar cun lur projects linears u digitals.

Premissas per participar a la concurrenza

Participar a la concurrenza pon producentas e producents cun in domicil da fatschenta en Svizra e collavuraturas e collavuraturs da la SSR. I vala da resguardar las suandantas premissas:

• Gener: Il cuntegn e la furma èn averts.
• Moda da producziun, lunghezza e furma dal raquint: Il format è liber. El duess però resguardar las modas d'utilisaziun da la gruppa en mira sin il chanal respectiv.
• Per tut ils chanals: Ils cuntegns duessan vegnir elavurads per audio e video, radio, televisiun, purschidas online, purschidas linearas e non-linearas inclus plattafurmas da terzs.
• Concept: Vus pudais inoltrar concepts serials e betg serials sco er ideas per events en directa.
• Lingua: Il project permetta ina realisaziun en tut las linguas naziunalas.
• Public en mira: Ils cuntegns duain cuntanscher en emprima lingia in public en mira pli giuven – da 18 fin 29 onns ubain da 30 fin 45 onns.

Inoltrar ideas fin ils 15 d'october 2021

Vus pudais inoltrar vossas ideas fin ils 15 d'october 2021 exclusivamain via il formular. Necessarias èn las suandantas indicaziuns:

• formulaziun da l'idea en ina frasa,
• concept general cun sinopsa, motivaziun ed ina curta descripziun dal project inclus in plan da producziun e plattafurmas resp. chanals da distribuziun potenzials,
• biografia curta da la producenta/dal producent u da l'autura/l'autur,
• stimaziun approximativa dals custs.

Cun inoltrar las indicaziuns sincerais vus che las ideas preschentadas èn libras da dretgs da terzas persunas. En cas d'in consentiment da producziun obtegna la SSR tut ils dretgs al project. La SSR po acceptar sulettamain projects che pon vegnir publitgads enfin la fin dal 2022. Ils projects tschernids obtegnan in'incumbensa da producziun cun ils meds respectivs.

Ils projects tschernids vegnan preschentads ils 15 da november 2021

Il Content Board tscherna las ideas ed ils projects adattads per ina preschentaziun. Quella ha lieu ils 15 da november 2021. Reservai p.pl. questa data! Ils detagls davart la moda da preschentaziun suondan pli tard. Projects tschernids definitivamain basegnan in concept en detagl e la calculaziun dal budget. La SSR surdat l'incumbensa enfin la fin dal 2021.