Instradà la midada a la testa da la SRG SSR

Il plan da termins strategics e politics da la SRG SSR è ussa cler. Suenter la fasa da consultaziun che va a fin il 1. da favrer vegn il Cussegl federal a concluder il zercladur 2024 sias mesiras en connex cun l’iniziativa «200 francs bastan». Il 2025 vegn alura il parlament a sa fatschentar cun l’iniziativa e cun la missiva dal Cussegl federal. La votaziun è planisada per l’onn 2026. Silsuenter sa tracti da negoziar il 2027 la nova concessiun da la SRG SSR che vegn concludida il 2028. Durant questa lunga perioda sto la SRG SSR avair ina direcziun generala stabila e durabla. 

Gilles Marchand terminass ses temp d’uffizi l’entschatta 2027, cura ch’el cumplenescha ses 65avel onn da vegliadetgna. Quai signifitgass dentant ch’ins stuess tschertgar ina successura u in successur il 2026, damai amez la perioda da votaziun. En vista a questa situaziun han il cussegl administrativ ed il directur general decidì cuminaivlamain d’anticipar il process da successiun per installar ina nova direcziun generala ch’è pronta gia l’entschatta dal 2025. Il post dal directur general vegn perquai publitgà proximamain. Il process da publicaziun vegn manà da la cumissiun da persunal dal cussegl administrativ sut il presidi da Jean-Michel Cina. 

Gilles Marchand è stà directur da TSR (2001-2009) ed ha silsuenter reunì e manà RTS (2010-2017). Dapi il 2017 è el directur general da la SRG SSR. Durant questa perioda è l’interpresa stada confruntada surtut cun l’iniziativa «No Billag», ch’è vegnida refusada da las votantas e dals votants cun passa 70 pertschient, cun la vasta transfurmaziun digitala dal service public audiovisual, cun l’investiziun intensivada en cuntegns svizzers sco serias e documentaziuns e cun l’introducziun da la plattafurma da streaming naziunala Play Suisse. 

Jean-Michel Cina: «Per far frunt a las grondas sfidas che spetgan la SRG SSR ils proxims tschintg onns dovra l’interpresa ina direcziun generala che ha temp avunda per sa preparar e s’engaschar cumplainamain sur in temp pli lung. Perquai avain nus decis cuminaivlamain d’anticipar la midada persunala. Jau vuless engraziar cordialmain a Gilles Marchand per ses engaschi instancabel a favur dal service public, ma surtut era per sia prontadad da s’engaschar vinavant cun tutta forza per la SRG SSR fin che sia successiun è reglada.» 

Gilles Marchand: «Igl è la meglra decisiun pussaivla en l’interess da l’interpresa. La SRG SSR sto sa preparar sin in nov ciclus cun la votaziun davart l’iniziativa, las tractativas davart la nova concessiun e l’elavuraziun d’ina nova planisaziun da finanzas a media vista.»  

Per incumbensa e cun sustegn cumplain dal cussegl administrativ vegn Gilles Marchand a manar ed a far avanzar vinavant ils numerus projects da la SRG SSR fin che sia successura u ses successur entra en uffizi.