In di deditgà a la musica svizra

Saja quai musica classica, populara, jazz u pop: la SRG SSR dat gronda paisa a la producziun musicala svizra da tut ils geners. La cumpart da la musica svizra emessa è auta sin tut ils chanals da radio, tar ils emetturs tematics sco Radio Swiss Pop, Swiss Jazz u Swiss Classic munta ella a var 50 pertschient.

Ultra da quai mussan ils chanals da televisiun da la SRG SSR en tut las regiuns linguisticas mintg'onn passa tschient uras registraziuns da concerts da bands svizras e sin la plattafurma da streaming Play Suisse stattan a disposiziun concerts en registraziuns directas. Plinavant surdat la SRG SSR  premis da promoziun per musica e bands da newcomers ed envida regularmain furmaziuns svizras da sa preschentar en emissiuns live al radio.

Gievgia, ils 16 da settember, importa la cumpart da la musica svizra schizunt 100 pertschient. A chaschun dal Di da la musica svizra 2021 metta la SRG SSR durant 24 uras en il center la producziun musicala d'artistas svizras e d'artists svizzers u d'artistas ed artists che han in connex cun la Svizra. Ina survista dals programs da las singulas unitads d'interpresa da la SRG SSR suonda pli tard.