Far punts – Brücken bauen – jeter des ponts – costruire ponti: L'emissiun da la SSR per il 1. d'avust

Il viadi da scuverta per l'emissiun da la festa naziunala cumenza en il chantun il pli sid dal Grischun, al cunfin cun l'Italia. En il vitg pittoresc da Castasegna entran las moderaturas ed ils moderaturs en in auto da posta e partan per lur excursiun communabla dal 1. d'avust. Igl è in viadi divertent tras il sid da la Bregaglia, per lung dal lais da l'Engiadina fin a San Murezzan. Cun la Viafier retica vai vinavant sin il traject spectacular da l'Alvra sur ina da las punts las pli impressiunantas da la Svizra – il viaduct da la Landwasser ch'è 65 meters aut. 

Durant il viadi communabel rapportan las moderaturas ed ils moderaturs da nossas quatter regiuns linguisticas davart inscunters persunals cun umans che fan mintga di punts. Per exempel cun purs grischuns sin il funs en la Georgia, cun dunnas ed umens cun in impediment che lavuran en in'ufficina a Chiasso, cun gardists svizzers en il Vatican u cun umans da las pli differentas religiuns che vivan ensemen sut in tetg. Il moderatur da SRF Sven Epiney ristga da rampignar lung ina punt e la moderatura da RTR Corina Schmed ballantscha sin ina slackline en autezzas snuaivlas. 

Il viadi finescha damanaivel da Filisur e Schmitten sut il viaduct impressiunant da la Viafier retica. La gruppa da saut «Tanzerina» da Cuira mussa qua sia coreografia per la chanzun quadrilingua «Nus essan in – wir sind eins», cumponida da musicistas e musicists svizzers aposta per l'emissiun dal 1. d'avust. La musica ed il saut s'adattan perfetgamain per far ina punt cun l'entira Svizra. 

L'emissiun vegn preschentada il 1. d'avust sin SRF 1 a las 20:10, sin RTS 1 a las 20:05 e sin RSI LA 1 a las 21:05.