Covid-19: ils effects sin las entradas e sin l'ulteriura transfurmaziun da la SRG SSR

Communicaziuns a las medias 29.09.2020

l lockdown e la crisa da sanadad actuala han accelerà ils trends da las entradas da la reclama regressivas e da l'utilisaziun pli e pli digitala da las medias svizras. La SSR reagescha sin quellas midadas, fa adattaziuns e cuntinuescha sia transfurmaziun.

Covid-19 ha procurà tar las medias l'emprima mesadad dal 2020 per ina clera diminuziun da las entradas da la reclama. Occurrenzas da sport e da cultura han ins stuì spustar u stritgar.

Per la SSR vegn la sminuziun da las entradas da la reclama, ch'è d'attribuir surtut a la crisa da sanadad, ad importar quest onn en cumparegliaziun cun l'onn avant 65 milliuns francs. La sminuziun dapi il 2017 munta uschia en total prest a 100 milliuns francs. Las perspectivas per ils proxims onns restan pretensiusas. Sin fundament da questa situaziun ha la SSR decis da prender, suenter las mesiras da spargn gia realisadas il 2018 ed il 2020, ulteriuras mesiras d'adattaziun e da transfurmaziun.

Ils proxims quatter onns (2021–2024) vegn perquai realisà in nov plan da spargn da 50 milliuns francs. Quest plan vegn ad avair effects era sin il dumber da plazzas da lavur. L'interpresa da la SSR quinta fin il 2024 cun ina reducziun da var 250 plazzas da lavur a temp cumplain (Full Time Equivalent, FTE) envers las actualmain 5500 FTE. Questa reducziun vegn realisada en emprima lingia cun fluctuaziuns natiralas, relaschadas n'èn però betg d'evitar. En cunvegnientscha cun ses partenari social prevesa la SSR perquai ultra dal plan social mesiras accumpagnantas spezialas en il sectur da la rescolaziun professiunala e dal pensiunament anticipà voluntar.

Per reagir sin il consum da medias midà e sin ils basegns da la publicitad cuntinuescha la SSR il medem mument cun la transfurmaziun dal service public iniziada il 2018 suenter la votaziun. Suenter la realisaziun da projects impurtants en il sectur producziun e distribuziun lantscha la SSR il november 2020 sia nova plattafurma naziunala da streaming Play Suisse. Play Suisse porscha films, serias e docus svizras da tut las quatter regiuns linguisticas cun suttitels e recumandaziuns individualas.
 

Post da medias SSR
Edi Estermann
medienstelle.srg(at)srgssr.ch / tel. 058 136 21 21