Helvetica

La presidenta da la Confederaziun Kathy Kunz (Ursina Lardi) sa chatta sin il punct culminant da sia pussanza. Ella è pronta da barattar bumbas illegalas per ostagis tegnids en fermanza en il Jemen. La situaziun escalescha prest. Tina (Flonja Kodheli) che lavura sco nettegiunza en la Chasa federala e che fa traglischar ils biros dals pussants decida d'entrar clandestinamain en il center da pussanza helvetic. Per liberar sia famiglia ...

Romain Graf, co descrivessas Vus la seria «Helvetica»?

Resumà en ina frasa schess jau: igl è l'istorgia d'ina nettegiunza che avanza cunter veglia ad in'agenta secreta. Jau hai vulì cumbinar dus geners: il film da spiunascha ed il drama da famiglia. En il center stat ina dunna che vegn implitgada en ina situaziun che para da surpassar sias abilitads. La nettegiunza Tina sto zuppentar da sia famiglia en tge maschinaria ch'ella è entretschada. Ella vegn confruntada cun ils embrugls da commerziants dad armas – e cun las varts negativas da la pussanza politica. Tina vegn messa sut squitsch ed extorcada. Pertge che sco nettegiunza ha ella access a tut las stanzas da la Chasa federala ...


«Igl è l'istorgia d'ina nettegiunza che avanza cunter veglia ad in'agenta secreta.»

La seria sa basa sin las implicaziuns geopoliticas actualas ... Danunder avais Vus questa savida?

La crisa politica internaziunala e la smanatscha terroristica furman la culissa da «Helvetica» – il focus è però in auter. Jau sun adina ma muventà tranter l'art e la politica. Jau hai studegià relaziuns internaziunalas e lura ma decidì per il film per far in pass vinavant e per giugar cun ils codes da la realitad. Jau persequitesch l'agir da las medias. Jau observ co che societads s'organiseschan e tge structuras da pussanza che predomineschan. Quai ma plascha. En quel context hai jau però vulì mussar che la Svizra è in pajais marcà da moviments cuntradictorics.

 

Reschissur Romain Graf

A tge cuntradicziuns pensais Vus? 

Nus essan abels d'intermediar tranter pajais cumpigliads en guerras e d'als vender il medem mument armas. Quai ston ins pir esser bun da far! Daspera essan nus in pajais militarmain neutral. Ma la profunda luschezza sin l'armada e las armas fa part da nossa cultura. Per il plot da «Helvetica» m'ha la lavur da retschertga durant las preparativas dà l'impuls da reflectar davart las armas e lur destrucziun. Dapi intgins onns s'engascha la Svizra en in program per destruir armas che custa 900 milliuns. En quel rom transporta ella cun il tren regularmain bumbas cun granatas en Germania dal Nord per las dismetter. Jau sun ma dumandà: «Tge fissi, sch'in militar corrupt decidess da deviar quests transports dad armas? Cun las bumbas pudess ins stabilir ina buna fatschenta.» Qua sa scuntran la politica ed il raquint.

Tge è la particularitad d'ina seria?

Decisiv è il text da partenza. Il script avain nus scrit en trais. Sche conflicts n'èn betg scrits bain en ina scena, sfarlatt'ins mo temp cun filmar e la scena vegn tagliada ora pli tard. Nus n'ans pudain betg prestar quest luxus. Cun filmar na stgaffesch'ins nagut da nov, quai n'è betg sco tar in film dramatic. Serias han in pli grond squitsch dal temp ed ils meds da producziun na sa laschan betg multiplitgar. Sche nus vulain producir svelt e bain, stuain nus esser preparads enorm bain.

Co lavurais Vus cun las acturas ed ils acturs?

Per mai èsi impurtant da far bleras provas. Tar serias na vegn quai betg adina fatg. Durant las provas chattain nus ils tuns ed ils puncts centrals d'ina scena, forsa betg visibels en il text. Jau filmesch las provas, nua che las acturas ed ils acturs sa schluitan en lur rollas ed improviseschan la scena. Lura scriv jau da nov la scena. Las acturas ed ils acturs emprendan il text adattà e cun filmar ans tegnain nus lura vi da quella versiun. Quest proceder pussibilitescha d'interiurisar gia ordavant il script uschia ch'ins è pli effizient durant la filmada.

Helvetica – in thriller politic en sis parts

Helvetica

  • Emissiun: november 2019
  • Reschia: Romain Graf
  • Script: Thomas Eggel, Romain Graf, Léo Maillard
  • Cast: Flonja Kodheli, Ursina Lardi, Roland Vouilloz
  • Producents: Max Karli, Pauline Gygax
  • Co-producents: Françoise Mayor, Patrick Suhner, Jacques-Henri Bronckart
  • Producziun: Rita Productions, Radio Télévision Suisse (RTS)