Thomas Egger

Carriera professiunala

Thomas Egger è econom da manaschi SAS e dispona d'in Executive MBA da l'Universitad da Berna e da Rochester (USA) sco era d'in Executive Master en dretg d'economia da l'Universitad da Son Gagl. Ultra da quai ha el absolvì differentas furmaziuns supplementaras en Corporate Governance, Compliance e Performance Management. Thomas Egger ha cumenzà sia carriera professiunala il 1987 tar la Societad da Banca Svizra, pli tard l'UBS SA, nua ch'el è stà activ fin il 2002 en differentas funcziuns en Svizra ed a New York (USA), il davos sco responsabel Controlling Private Banking. Silsuenter ha el lavurà tar la Valora Management SA sco manader dal controlling e da la tresoraria dal concern e sco vicemanader da las finanzas. Il 2005 ha el midà tar La Posta Svizra, nua ch'el ha surpiglià differentas funcziuns directivas. Tranter auter è el stà manader da la contabilitad e dal controlling dal concern, manader da la strategia e dal management da ristgas dal concern e manader da las finanzas da Post Logistics. Il davos ha el surpiglià la direcziun dal sectur Servetschs da finanzas che reunescha las cumpetenzas finanzialas centralas sco la contabilitad u l'acquisiziun. Ultra da quai è el stà manader interimistic dal sectur Finanzas dal concern e commember dal cussegl administrativ da la Postfinance SA, commember dal cussegl da fundaziun da la cassa da pensiun da la Posta e d'ulteriurs cussegls administrativs.

Mandat

Cassa da pensiun SRG SSR (PKS CPS) (cussegl da fundaziun)