Studio en la Chasa federala

Il studio en la Chasa federala è il center da producziun per ils rapports davart la politica federala a Berna.

Il studio en la Chasa federala a Berna è in studio da televisiun e da radio modern per las collavuraturas ed ils collavuraturs da las unitads d'interpresa da la SRG SSR che rapportan da la Chasa federala e da las regiuns.

Politica

La politica federala e naziunala stat en il center dals rapports realisads en il studio da la Chasa federala. Las correspundentas regiunalas ed ils correspundents regiunals ch'èn preschents en il studio rapportan da la Part Sura Bernaisa, dal chantun da Friburg, dal Giura e dal Vallais.

Parlament e regenza

Il studio en la Chasa federala registrescha tut las debattas dal Cussegl naziunal e dal Cussegl dals chantuns. Las registraziuns vegnan emessas en directa durant las sessiuns sin www.parlament.ch . Ultra da quai registrescha el era las conferenzas da medias dal Cussegl federal (www.tv.admin.ch).

Actualitads dal di

Nus realisain contribuziuns per emissiuns d'actualitad e producin emissiuns en directa. Nus registrain las conferenzas da medias dals departaments e las infurmaziuns da las cumissiuns, fracziuns e partidas. En il studio da la Chasa federala vegnan ultra da quai registradas las emissiuns politicas da las unitads d'interpresa da la SRG SSR.

Incumbensa

Sco furnitur da servetschs naziunal stat il studio en la Chasa federala a disposiziun a 35 correspundentas e correspundents da RTR, RSI, RTS, SRF e SWI e garantescha cun ses servetschs tecnics ch'els possian infurmar davart las activitads politicas a Berna e conturn per il radio, la televisiun e l'internet en tut las linguas naziunalas.

Sco partenari da producziun da la Confederaziun registrescha il studio en la Chasa federala tut las debattas dal Cussegl naziunal e dal Cussegl dals chantuns sco era tut las conferenzas da medias dal Cussegl federal per la Chanzlia federala. Il Parlament e la Regenza publitgeschan questas registraziuns a l'intern ed a l'extern e las mettan a disposiziun il medem mument e gratuitamain a tut las collavuraturas ed a tut ils collavuraturs da las medias.

Servetschs

Il studio da televisiun en il Center da medias ha in caracter strategic. El stat a disposiziun a las unitads d'interpresa da la SRG SSR tranter auter per emissiuns sco «Classe Politique». Igl è ultra da quai il studio d'urgenza en cas d'in blackout en ina centrala d'emissiun da las unitads d'interpresa da la SRG SSR.

Il studio da televisiun modern consista d'ina surfatscha da registraziun da 230 m2 ed è endrizzà a moda optimala per producziuns ed emissiuns. La reschia è integrada cumplettamain en l'ambient da producziun dal studio en la Chasa federala. Questa reschia permetta da producir er emissiuns realisadas en lieus externs (Plazza federala, sala dals pass pers, Bernerhof, etc.).

 

Ultra da quai stat a disposiziun in studio pli pitschen che la SRG SSR ed ils emetturs da televisiun privats svizzers nizzegian cuminaivlamain.

Il material da culissa po vegnir transportà cun in ascensur davent da la surfatscha da chargiar dal camiun directamain en il studio.

Producziuns da studio pli pitschnas pon vegnir realisadas sin dumonda ed a curta vista durant ils temps da producziun quotidians; producziuns pli grondas vegnan realisadas tenor offerta.

Ils studios da duplex 1–3 stattan a disposiziun per tut las emissiuns d'actualitads en duplex. Els vegnan duvrads sco studios d'urgenza en cas d'in blackout en ina centrala d'emissiun da las unitads d'interpresa da la SRG SSR.

Sch'ina persuna d'intervista vegn colliada en directa cun la «Tagesschau», sa chatta ella en general en in da noss studios da duplex. Quels porschan pussaivladads optimalas per realisar emissiuns en directa. Davent da quels pon ins colliar in:a u du:as partenari:as d'intervista cun mintga emettur dal mund.

La tecnologia da duplex cun bluebox u greenbox permetta da duvrar motivs da fund multifars: maletgs en directa da la Chasa federala, da la sala da las conferenzas da medias e da la sala dal Cussegl naziunal e dal Cussegl dals chantuns u era graficas e videos.

Ultra da quai disponan tut ils studios da duplex d'in teleprompter e d'in indriz che permetta da guardar en la camera e preleger il medem mument in text visualisà.

A chaschun d'emissiuns grondas en directa vegnan ils studios duvrads sco cabinas per las commentaturas ed ils commentaturs. En ed enturn l'edifizi dal parlament dispona il studio da la Chasa federala da passa 50 chaschas d'attatg (video, audio, IT) ch'èn colliadas directamain cun il studio. En tut quests lieus èsi pussaival d'installar in standup u in duplex.

Il studio en la Chasa federala dispona da sis studios da radio endrizzads cumplettamain per las unitads d'interpresa da la SRG SSR.

Ils studios da radio permettan da rapportar da la Chasa federala a chaschun da las sessiuns, da conferenzas da medias, d'occurrenzas da la politica federala e da retschaviments uffizials sco era da rapportar da la regiun da Berna.

Il studio en la Chasa federala porscha ils suandants servetschs:

  • planisar las contribuziuns da radio
  • coordinar tranter las unitads d'interpresa
  • metter a disposiziun ils meds per producir emissiuns da radio
  • retschaiver e tgirar ils giasts da las emissiuns da las unitads d'interpresa
  • planisar e coordinar l'audiotecnica e scolar las audiotecnicistas ed ils audiotecnicists
  • coordinar la lavur da las audiotecnicistas e dals audiotecnicists en la regiun da Berna ordaifer il center da medias (per exempel en l'edifizi dal parlament) per producir emissiuns da radio

Ils studios funcziunan da princip senza tecnicist:a, vegnan dentant tut tenor la cumplexitad da las emissiuns manads d'in:a audiotecnicist:a. En il studio da RTS stat a disposiziun ultra da quai ina webcam.

Svelt al lieu

Nus pudain realisar producziuns externas cun partenaris interns ed externs: dal simpel standup sur plazs da montascha mobils e transmissiuns mobilas (LiveU) fin al char da transmissiun e l'uplink satellitar.

Adina pronts

Da la lavina fin a l'inundaziun – dal di da partida fin a l'elecziun da la regenza: Per Vossa emissiun As sustegnain nus gugent cun nossa experientscha e nossa savida. Enritgi Vossa producziun cun maletgs autentics. Nus planisain e coordinain Vossas producziuns externas ed ans occupain en cas da basegn era da la producziun. Sur nossa hotline As stain nus a disposiziun da di e da notg e quai durant 365 dis.

ENG (Electronic News Gathering)

Il studio en la Chasa federala dispona d'atgnas equipas ENG. En pli avain nus fatg cunvegnas cun firmas externas per pudair cuvrir tut ils ulteriurs basegns. Las equipas disponan da cameras XD-CAM-HD.

Nossa fatschenta principala è la producziun da novitads per tut las unitads d'interpresa da la SRG SSR. Als plazs da montascha realisain nus contribuziuns finidas cun agid dal material registrà, da material d'archiv e da graficas.

Il studio en la Chasa federala dispona en total da sis plazs da videomontascha en il Center da medias.

A las correspundentas ed als correspundents da la Chasa federala e da las regiuns stat a disposiziun in ambient da producziun bain connectà. Els pon visiunar tut ils maletgs disponibels sin il server senza bandunar lur plaz da lavur.

Els han la pussaivladad da far la montascha a moda autonoma e da trametter quella directamain al plaz da montascha per elavurar vinavant u copiar. Davent da mintga plaz da montascha han els access al sistem da redacziun da l'unitad d'interpresa correspundenta.

Las contribuziuns montadas a fin pon els sonorisar directamain al plaz da montascha.

Ina partiziun da videografica en il studio da la Chasa federala creescha las suandantas graficas animadas per las contribuziuns producidas a Berna: 

  • infograficas
  • statisticas
  • diagrams
  • parts explicativas
  • chartas geograficas
  • tavlas da text
  • videograficas per las emissiuns da novitads

Las graficas creadas sa basan sin ils models e las directivas da l'unitad d'interpresa, da la redacziun e da l'emissiun correspundenta.

Ultra da quai prepara la partiziun da grafica elements d'autras medias per integrar quels en las atgnas contribuziuns: 

  • videos da l'internet
  • paginas-web
  • artitgels da gasettas dal di
  • communicaziuns a las medias da la Chasa federala

La Documentaziun video archivescha e cataloghisescha il material da video che deriva da las atgnas producziuns ENG realisadas en il studio da la Chasa federala. I sa tracta da maletgs d'occurrenzas politicas u da maletgs generals che pon vegnir reutilisads per illustrar autras tematicas. Per cuvrir eventualas largias vegnan filmadas sin dumonda differentas scenas. Mo il material davart la politica federala vegn archivà a lunga vista. L'ulteriur material istoric vegn archivà en las unitads d'interpresa, era las contribuziuns montadas.

La Documentaziun video retschertga e metta a disposiziun il material criv che po vegnir reutilisà. Grazia ad in sistem da retschertga online po ella era furnir maletgs da video da las regiuns.

La Documentaziun video gestiunescha il server cun il material ENG, il material copià da las regiuns ed il material d'archiv.

La Documentaziun text rimna e prepara en ina banca da datas ils documents davart temas da la politica federala en talian, franzos e tudestg per metter quels a disposiziun a las collavuraturas ed als collavuraturs da las medias. I sa tracta da communicaziuns a las medias, rapports, studis, factsheets, etc. publitgads da l'administraziun federala, dal parlament u da gruppas d'interess.

Ultra da quai fa ella retschertgas davart temas actuals en las trais linguas naziunalas grondas e gestiunescha dossiers electronics a lunga vista. Quels pon las schurnalistas ed ils schurnalists da la SRG SSR consultar directamain davent da lur plaz da lavur.

La MIP (Media-Ingest-Playout) è il cor tecnic dal studio da la Chasa federala. Tut ils signals d'audio e da video vegnan digitalisads, administrads e distribuids sin il videoserver central.

 

Davent da qua vegnan controllads ils commutaturs e la distribuziun dals signals en la rait da la SRG SSR. La MIP administrescha il server da maletgs central (gestiun da la banca da datas, administraziun da las metadatas, monitoring dal sistem, surveglianza da la producziun) e coordinescha e priorisescha las copias.

La Disposiziun è il post da coordinaziun per tut ils champs d'activitad. Ella attribuescha las incumbensas e controllescha ils process – da la preparaziun da la lavur fin a la facturaziun. Ultra da quai è ella responsabla per la planisaziun operativa, temporala, quantitativa e logistica da l'entir persunal e da tut ils meds da producziun.

La Disposiziun prenda encunter las dumondas, examinescha la disponibladad dals implants e dal persunal e planisescha las activitads a curta ed a media vista, resguardond las prescripziuns vertentas (contract collectiv da lavur, etc.). A basa da directivas definidas surpiglia ella l'entira planisaziun da las producziuns en il studio da la Chasa federala e procura che las incumbensas vegnian ademplidas sin il termin.

La Disposiziun porscha in helpdesk (retschavida, telefon), registrescha tut las datas-clav da la tecnica da producziun e coordinescha las novitads en collavuraziun cun las redacziuns da las unitads d'interpresa da la SRG SSR. Ultra da quai coordinescha e planisescha la Disposiziun – en cunvegna cun ils departaments e cun las superiuras ed ils superiurs e las redacziuns – la producziun e la diffusiun dals pleds da las cusseglieras federalas e dals cussegliers federals en il radio e la televisiun.