Infurmaziun per tuts

L'infurmaziun è la funtauna da la furmaziun libra da l'opiniun e da la democrazia. Emissiuns d'infurmaziun retschertgadas bain tematiseschan las relaziuns sociopoliticas da differents puncts da vista. Ellas dattan infurmaziuns supplementaras ed orientaziun ed animeschan da discussiunar. Infurmaziun è service public.

39 pertschient da tut las expensas pertutgan la
sparta Infurmaziun

Infurmaziun per l'entira Svizra

Las emissiuns d'infurmaziun e da novitads da la SSR rapportan davart eveniments actuals da la Svizra e dal mund. Ellas porschan ina vista independenta or da la perspectiva svizra sin la vita politica, economica e sociala.

Sulettamain infurmaziuns e rapports retschertgads bain ed intermediads a moda vardaivla pussibiliteschan als umans da furmar libramain in'opiniun. Nossas reportaschas independentas prestan ina contribuziun essenziala e promovan uschia la cultura politica en Svizra.

Infurmaziun da tuttas uras

Radio

  • Musica (Suisa) 66%
  • Analisa musicala 3%
  • Moderaziun 8%
  • Servetsch da radio 1%
  • Actualitad ed infurmaziun 13%
  • Cultura e furmaziun 6%
  • Gieus auditivs 1%
  • Divertiment 1%
  • Sport 1%
  • Autras emissiuns 2%

Nus infurmain a moda cumplessiva ed accurata davart actualitads: en il radio cun novitads da mintg'ura, ils schurnals regiunals ed infurmaziuns davart il sport e l'aura. Emissiuns sco «Actualitad», «Echo der Zeit», «Doppelpunkt», «Input» u «Info 3» envidan da s'occupar analiticamain ed a moda pli profunda da temas multifars.

Televisiun

  • Actualitad ed infurmaziun 34%
  • Cultura e furmaziun 13%
  • Musica 1%
  • Films e serias 21%
  • Divertiment 4%
  • Sport 12%
  • Emissiuns per uffants 4%
  • Autras emissiuns 10%

Passa 2,5 milliuns aspectaturas ed aspectaturs s'infurmeschan mintga saira cun il «Telesguard», «Tagesschau» u «10vor10» davart quai che curra e passa en Svizra ed a l'exteriur. Emissiuns sco «Schweiz aktuell» rapportan or d'ina perspectiva regiunala svizra. Ed emissiuns d'infurmaziun sco «Cuntrasts» «Minisguard», «Club», «Kassensturz» u «Arena» dattan impuls da reflectar dumondas politicas, economicas e socialas.

Infurmaziun è integraziun

SWI swissinfo.ch rapporta mintga di en diesch linguas davart la politica, l'economia, la cultura, la societad e la scienza svizra. Questa purschida sa drizza ad in public internaziunal. Cun quai presta SWI ina contribuziun a l'integraziun dad estras ed esters. Era per Svizras e Svizzers a l'exteriur è la purschida online da SWI multifara e preziusa. Ad els stattan a disposiziun tranter auter infurmaziuns davart votaziuns ed elecziuns federalas.

Infurmaziun
quai èn 34 pertschient da noss temp d'emissiun da televisiun.

Infurmaziun d'emprim maun

60 correspundentas e correspundents da SRF en Svizra ed en l'entir mund rapportan d'emprim maun – ina prestaziun che mo paucs purschiders da service public europeics porschan pli. Nus ans obligain ad autas pretensiuns da qualitad, quai che noss public stima: el attestescha gronda credibladad ed in aut cuntegn d'infurmaziun a nossas purschidas, sco quai che enquistas mussan adina puspè.

Correspundents da la SSR rapportan da tut il mund.

Correspundent Pascal Weber a Cairo.

Coproducziun premiada da la SSR

Dapi il 2007 è la SSR partenaria da medias da la fundaziun da medias Civis.

Civis-Medienpreis

La documentaziun «Ayham – mein neues Leben» ed il film da televisiun «Ne m’abandonne pas – Gib mich nicht auf» han gudagnà il 2017 il premi europeic da medias Civis. La fundaziun da medias Civis undrescha emissiuns da radio e televisiun che promovan la convivenza paschaivla dad umans da differentas derivanzas.