Sminuziuns dal retgav e custs pli bass marcheschan l'onn 2019 da la SRG SSR

Communicaziuns a las medias 08.04.2020

La SSR concluda l'onn 2019 sco annunzià cun in resultat annual negativ da 22,2 milliuns francs. Il plafonament da la cumpart da las taxas da recepziun per la SSR ed il ferm regress da las entradas da reclama han bain pudì vegnir cumpensads cun reducir massivamain las expensas. Ils custs da restructuraziun colliads cun quellas reducziuns engrevgeschan dentant il resultat annual.

La SSR guarda danovamain enavos sin in onn animà. Il program dal 2019 è stà marcà da producziuns grondas sco las elecziuns dal Parlament federal, la Festa federala da lutga e da gieus alpesters a Zug, la «Fête des Vignerons» a Vevey e d'autras. En pli ha la SSR producì novas staflas da las serias «Wilder» e «Quartier des banques» e coproducì serias sco «Helvetica» e «Frieden» e plirs films davart l'istorgia contemporana svizra.

Il 2019 è stà per l'interpresa er in onn da la transfurmaziun cun numerus projects sco l'integraziun dal tpc en SRF per il 1. da schaner 2020, las lavurs preliminaras per includer ils servetschs d'informatica centrals en SwissTXT (medemamain per il 1. da schaner 2020) ed il svilup dal project «Campus» en Svizra franzosa. L'onn passà è vegnì intensivà ulteriuramain il dumber da las cooperaziuns cun chasas da medias privatas e per exempel renovà il «Pacte de l'audiovisuel» per promover la producziun svizra da films. Da l'autra vart è l'onn 2019 era stà marcà da las mesiras per sbassar massivamain ils custs.

Cumpart plafonada da las taxas da recepziun

Ils 18 d'october 2017 ha il Cussegl federal plafonà la cumpart da las taxas da recepziun per la SSR per l'onn 2019 ad 1,2 milliardas francs. Il 2017 muntava quella cumpart anc a var 1,25 milliardas francs. Quellas entradas èn damai sa reducidas per la SSR per var 50 milliuns francs. Resguardond la taglia sin la plivalur ha il retgav da las taxas da recepziun per la SSR muntà l'onn passà a totalmain 1,18 milliardas.

La situaziun sin il martgà da reclama è sa sviluppada era l'onn passà a moda pauc plaschaivla. Il gudogn tras reclamas è sa reducì il 2019 per ulteriurs 23,1 milliuns francs. En general sa fragmentescha il diever da las medias vinavant e l'utilisaziun dal program à la carte na promova betg la reclama lineara. Ultra da quai s'accentuescha il trend ch'il budget da reclama sa sposta da la televisiun lineara sin las plattafurmas digitalas internaziunalas.

Realisar il plan da refurma e da reinvestiziun

La SSR ha reagì gia ils 4 da mars 2018 sin la midada da las cundiziuns generalas ed ha lantschà in plan da refurma e da reinvestiziun en la dimensiun da 100 milliuns francs. L'atun 2019 ha la finamira da spargn stuì vegnir augmentada per 50 milliuns sin da nov 150 milliuns francs pervi da las entradas da reclama anc adina regressivas. Grazia a la realisaziun speditiva han ils custs, sin fundament da differentas mesiras rigurusas en tut las unitads d'interpresa, pudì vegnir sbassads gia il 2019 per en total 60 milliuns francs surtut en il sectur da la distribuziun, da la tecnica e da las immobiglias. Uschia ha la SSR era desistì l'onn passà da mesiras generalas pertutgant il svilup da las pajas, quai che ha permess in respargn dad 8,4 milliuns francs. En tut l'interpresa è il dumber dal persunal (valurs dal di da referenza) vegnì reducì il 2019 per 74 plazzas a temp cumplain – quai surtut via fluctuaziuns natiralas.

La transfurmaziun cuntinuescha

L'interpresa cuntinuescha a sa transfurmar era l'onn current. La SSR sto s'adattar vinavant a las relaziuns dal martgà ed a las modas d'utilisaziun ch'èn sa midadas ed a medem temp resguardar il rom finanzial che vegn adina pli stretg. Era las consequenzas economicas da la crisa dal coronavirus vegnan ad influenzar la situaziun. L'onn 2019 han ils custs da restructuraziun muntà a 36,2 milliuns francs. Quests custs engrevgeschan ulteriuramain il quint annual ed han manà, ensemen cun ils facturs numnads, ad in resultat annual negativ.

Il rapport da gestiun vegn uss tramess per l’approvaziun en proceder circular ad ils commembers da la radunanza da delegadas e delegads. Ils 29 d'avrigl 2020 vegn el publitgà sin la pagina-web da la SSR (gb.srgssr.ch).