In nov Pacte de l'audiovisuel sco resposta al svilup digital
La SSR conferma ses engaschament a favur da la producziun audiovisuala svizra ed investescha cun 32,5 milliuns francs ad onn ulteriurs meds en il Pacte de l'audiovisuel. I sa tracta dal coc da la nova cunvegna che la SSR e ses partenaris da la branscha da film svizra han suttascrit a Soloturn per ils onns 2020 fin 2023. Cun ulteriurs 5 milliuns francs ad onn rinforza il Pacte de l'audiovisuel las investiziuns a favur da la cinematografia svizra e promova uschia la transfurmaziun digitala da la SSR.
«Platzspitzbaby» da Pierre Monnard
En il rom dals Dis da film da Soloturn han la SSR ed ils represchentants da la branscha da film svizra suttascrit oz il Pacte de l'audiovisuel per ils onns 2020-2023. Il contract definescha las cundiziuns generalas per producziuns che la SSR realisescha ensemen cun producents independents. «Jau engraziel als acturs da la branscha per la collavuraziun ed il spiert constructiv che han dà la temprà a questas tractativas. Nus avain cuntanschì in resultat che tegna quint da la midada da las medias fundamentala, ed en spezial era dal svilup da las plattafurmas da streaming e dal diever on demand dad ovras coproducidas», constatescha il directur general da la SSR Gilles Marchand.
En cumparegliaziun cun ils 27,5 milliuns francs dal Pacte per ils onns 2016-2019 è la summa che la SSR investescha en la producziun audiovisuala s'augmentada sin 32,5 milliuns francs. La summa supplementara da 5 milliuns duai ir a favur da films da televisiun svizzers. Plinavant mussa la SSR qua tras era sia voluntad d'investir vinavant substanzialmain en la cinematografia svizra che cumpiglia films, serias, films documentars ed animaziuns. «Malgrà la situaziun finanziala fitg difficila vul la SSR s'engaschar anc pli fitg per il film svizzer cun tut sias fassettas, quai che sa manifestescha en la nova versiun dal Pacte. La lavur audiovisuala ha prioritad per nus», di Gilles Marchand.
Dretgs per la diffusiun online
Per l'emprima giada vegn la SSR a cumprar dretgs d'emetter pli lungs per la diffusiun online da coproducziuns, a las qualas la SSR è participada cun dapli che 50 pertschient. Quest pass è impurtant en vista a la plattafurma da streaming da la SSR planisada per quest atun. «Dasper la producziun è la distribuziun ina da las sfidas che la SSR sto prender per mauns en il temp da la digitalisaziun. La plattafurma da la SSR che nus lantschain l'atun è in pass impurtant en questa direcziun che cuvra ils interess da noss public», di Gilles Marchand.
Concretamain èn ils dretgs da diffusiun per ils emprims sis mais inclus en il Pacte. Suenter ha la SSR la pussaivladad da prolungar la validitad per ina tariffa speziala. Er en connex cun films da kino profitescha la SSR da dretgs per la diffusiun online sin basa d'ina tariffa negoziada, tant enavant ch'ils coproducents dattan lur consentiment.
Gronda varietad da coproducziuns
Ils ultims exempels per ovras producidas en il rom dal Pacte de l'audiovisuel èn las serias «Helvetica», «Wilder» e «Quartier des Banques» ed ils films «Platzspitzbaby» da Pierre Monnard, «Zwingli» da Stefan Haupt ed il film rumantsch «Amur senza fin» da Christoph Schaub. Ina part dals meds dal Pacte vegn duvrada per la sincronisaziun, per ch'ils cuntegns coproducids possian vegnir mess a disposiziun sche pussaivel en l'entira Svizra, en spezial via ils chanals da la SSR.
Il Pacte de l'audiovisuel en cifras
- Onn da fundaziun: 1997
- Dumber d'associaziuns cinematograficas che han prendì part a las tractativas 2020-2023: 7
- Investiziuns planisadas per 2020-2023: 32,5 milliuns francs ad onn
- Repartiziun tenor producziuns da kino e da televisiun: 19,5 milliuns francs per la televisiun e multimedia, 9 milliuns francs per kino ed animaziun, 4 milliuns francs per premias Succès Passage Antenne
- Investiziuns dapi il 1997: passa 400 milliuns francs
- Dumber da films coproducids dapi il 1997: passa 2800
- Dumber da serias coproducidas dapi il 1997: passa 20
Contact
Post da medias SSR, Lauranne Peman
medienstelle.srg(at)srgssr.ch / tel. 031 350 95 95
