Taxa da radio e televisiun

La lescha oblighescha tut las chasadas svizras ed interpresas cun sedia en Svizra da pajar taxas da recepziun per radio e televisiun.

A partir dal 1. da schaner 2019 remplazza ina taxa independenta dals apparats la taxa da recepziun actuala. La nova taxa per radio e televisiun importa 365 francs per chasada privata ad onn e vegn incassada a partir dal 2019. In'interpresa cun ina svieuta da passa 500 000 francs paja tut tenor svieuta tranter 365 e 35 590 francs per onn. Il Cussegl federal decida davart l'autezza e la repartiziun da las taxas.

A partir dal 1. da schaner incassescha la Serafe AG la taxa da radio e televisiun.

Mintga chasada privata e mintga interpresa cun sedia en Svizra è suttamessa a la taxa. I n'emporta betg, schebain insatgi retschaiva ils programs da radio e televisiun via satellit, antenna u internet – ed era betg tge gener d'emissiuns ch'ina persuna consumescha. Chasadas che na disponan da nagins apparats da recepziun pon sin dumonda vegnir deliberadas da l'obligaziun da pajar la taxa. Questa pussaivladad è limitada e vala mo per ils proxims tschintg onns. (pussaivladad dad opting-out).

Chasadas cun persunas che retiran prestaziuns supplementaras annualas tar l'AVS u AI vegnan sin dumonda deliberadas da l'obligaziun da pajar taxas. Pussaivla è er ina liberaziun retroactiva. Persunas estras cun status diplomatic e persunas surdtschorvas che vivan sulettas èn medemamain deliberadas da las taxas.

La digitalisaziun ha transfurmà dal tuttafatg l'utilisaziun da las medias. Oz èn tut ils cuntegns adina accessibels dapertut e da tut temp e quai independentamain dals chanals e vecturs. Perquai consumeschan tut las persunas en Svizra en ina moda producziuns da las SRG SSR u d'auters purschiders da radio e televisiun concessiunads; tuttina sch'i sa tracta d'in video da Nouvo sin Facebook, las novitads a la televisiun, la parada da hits sin Radio Bern 1 u l'«Echo der Zeit» sco podcast. Decisivs èn ils cuntegns e betg ils vecturs da derasaziun multifars.

La SSR ed ils purschiders da radio e televisiun privats concessiunads èn dependents da las entradas generadas cun las taxas per pudair producir cuntegns qualitativs relevants che n'èn uschiglio betg finanziabels via il pitschen martgà medial svizzer.

Enfin la fin dal 2018 è responsabla la Billag AG per l'incasso da las taxas da recepziun. A partir dal 2019 surpiglia la firma Serafe AG quest'incumbensa. La Serafe AG, ina societad affiliada da la Secon AG cun sedia a Fehraltorf, incassescha la taxa da radio e televisiun per incumbensa da la Confederaziun.

Na. La Serafe trametta automaticamain in quint a mintga chasada en Svizra. La Serafe fa quai a basa da las datas dals registers d'abitants dals chantuns e da las vischnancas.

La taxa per chasadas privatas sa sbassa per il 1. da schaner 2019 da 451 francs sin 365 francs. A partir dal 2019 paja ina chasada privata en Svizra damai 365 francs ad onn per radio e televisiun. Chasadas collectivas sco chasas d'attempads e da tgira, chasas da dimora, stabiliments da retenziun, internats u centers per requirents d'asil pajan 730 francs – persunas che abitan en ina chasada collectiva na pajan damai nagina taxa individuala.

Per interpresas cun sedia en Svizra vala in sistem da tariffas graduà. Interpresas cun ina svieuta annuala pli pitschna che 500 000 francs – quai èn trais quarts da tut las interpresas en Svizra – na pajan nagina taxa. Interpresas cun ina svieuta annuala tranter 500 000 francs ed in milliun francs pajan sco las chasadas privatas 365 francs.

88 pertschient da las entradas van a la SSR. Ultra da quai obtegnan 35 emetturs da radio privats, quai èn 13 staziuns da televisiun regiunalas, 13 radios locals commerzials e 9 radios cumplementars betg commerzials ina contribuziun (en tut 6 pertschient). Quests emetturs adempleschan tenor lur concessiun in mandat da prestaziun spezial. Ulteriurs 6 pertschient vegnan impundids per finanziar diversas activitads sco p.ex. la promoziun da novas tecnologias, la perscrutaziun da medias u l'incasso da Serafe.

La SSR proveda la populaziun svizra per incumbensa da la Confederaziun cun ina purschida multifara da radio, televisiun ed online en quatter linguas. La SSR reparta ses meds sin tut las quatter regiuns linguisticas da la Svizra e rinforza uschia la coesiun naziunala.

Quai signifitga concretamain: passa 70 pertschient da las entradas da la SSR derivan da la Svizra tudestga, però mo 43 pertschient da quels daners vegnan impundids per purschidas producidas en tudestg. La differenza va en favur da la Svizra franzosa, taliana e rumantscha. Grazia a questa repartiziun èsi pussaivel da porscher in program cumplessiv en ils martgads pitschens da las singulas regiuns linguisticas.

La SSR sa finanziescha per 75 pertschient da daners publics. Ina gronda part da las expensas totalas vegn utilisadas per atgnas producziuns (86 pertschient) sco per exempel «Echo der Zeit» (SRF), «Il Quotidiano» (RSI), «Mise au Point» (RTS) ubain «Telesguard» (RTR). Il 2017 ha la SSR impundì 38 pertschient da las expensas totalas per infurmaziun, 23 pertschient per divertiment e film, 19 pertschient per cultura, societad e furmaziun, 13 pertschient per sport e 7 pertschient per musica e giuventetgna.