Taxa da radio e televisiun

La lescha oblighescha tut las chasadas svizras ed interpresas cun sedia en Svizra da pajar taxas da recepziun per radio e televisiun. 

Mintga chasada privata e mintga interpresa cun sedia en Svizra è suttamessa a la taxa. I n'emporta betg, schebain insatgi retschaiva ils programs da radio e televisiun via satellit, antenna u internet – ed era betg tge gener d'emissiuns ch'ina persuna consumescha. Chasadas che na disponan da nagins apparats da recepziun pon sin dumonda vegnir deliberadas da l'obligaziun da pajar la taxa. Questa pussaivladad è limitada e vala mo per ils proxims tschintg onns. (pussaivladad dad opting-out).

Chasadas cun persunas che retiran prestaziuns supplementaras annualas tar l'AVS u AI vegnan sin dumonda deliberadas da l'obligaziun da pajar taxas. Pussaivla è er ina liberaziun retroactiva. Persunas estras cun status diplomatic e persunas surdtschorvas che vivan sulettas èn medemamain deliberadas da las taxas.

La digitalisaziun ha transfurmà dal tuttafatg l'utilisaziun da las medias. Oz èn tut ils cuntegns adina accessibels dapertut e da tut temp e quai independentamain dals chanals e vecturs. Perquai consumeschan tut las persunas en Svizra en ina moda producziuns da las SRG SSR u d'auters purschiders da radio e televisiun concessiunads; tuttina sch'i sa tracta d'in video da Nouvo sin Facebook, las novitads a la televisiun, la parada da hits sin Radio Bern 1 u l'«Echo der Zeit» sco podcast. Decisivs èn ils cuntegns e betg ils vecturs da derasaziun multifars.

La SSR ed ils purschiders da radio e televisiun privats concessiunads èn dependents da las entradas generadas cun las taxas per pudair producir cuntegns qualitativs relevants che n'èn uschiglio betg finanziabels via il pitschen martgà medial svizzer.

A partir dal 2019 è responsabla la Serafe AG per l'incasso da las taxas da recepziun. La Serafe AG, ina societad affiliada da la Secon AG cun sedia a Fehraltorf, incassescha la taxa da radio e televisiun per incumbensa da la Confederaziun.

La taxa per chasadas privatas sa sbassa per il 1. da schaner 2019 da 451 francs sin 365 francs. A partir dal 2019 paja ina chasada privata en Svizra damai 365 francs ad onn per radio e televisiun. Chasadas collectivas sco chasas d'attempads e da tgira, chasas da dimora, stabiliments da retenziun, internats u centers per requirents d'asil pajan 730 francs – persunas che abitan en ina chasada collectiva na pajan damai nagina taxa individuala.

Per interpresas cun sedia en Svizra vala in sistem da tariffas graduà. Interpresas cun ina svieuta annuala pli pitschna che 500 000 francs – quai èn trais quarts da tut las interpresas en Svizra – na pajan nagina taxa. Interpresas cun ina svieuta annuala tranter 500 000 francs ed in milliun francs pajan sco las chasadas privatas 365 francs.

88 pertschient da las entradas van a la SSR. Ultra da quai obtegnan 35 emetturs da radio privats, quai èn 13 staziuns da televisiun regiunalas, 13 radios locals commerzials e 9 radios cumplementars betg commerzials ina contribuziun (en tut 6 pertschient). Quests emetturs adempleschan tenor lur concessiun in mandat da prestaziun spezial. Ulteriurs 6 pertschient vegnan impundids per finanziar diversas activitads sco p.ex. la promoziun da novas tecnologias, la perscrutaziun da medias u l'incasso da Serafe.

La SSR proveda la populaziun svizra per incumbensa da la Confederaziun cun ina purschida multifara da radio, televisiun ed online en quatter linguas. La SSR reparta ses meds sin tut las quatter regiuns linguisticas da la Svizra e rinforza uschia la coesiun naziunala.

La SSR sa finanziescha per 78 pertschient da daners publics. Ina gronda part da las expensas totalas vegn utilisadas per atgnas producziuns (87 pertschient) sco per exempel «Echo der Zeit» (SRF), «Il Quotidiano» (RSI), «Mise au Point» (RTS) ubain «Telesguard» (RTR). Il 2019 ha la SSR impundì 41 pertschient da las expensas totalas per infurmaziun, 21 pertschient per divertiment e film, 19 pertschient per cultura, societad e furmaziun, 12 pertschient per sport e 7 pertschient per musica e giuventetgna.

Co è la SSR organisada?

Tuttina sco organisaturs da radio cun in'incumbensa publica cumparabels en auters stadis democratics, s'orientescha era la SSR a l'idea directiva dal service public. Cuntrari a blers n'è ella però betg in institut dal dretg public, mabain ina societad.

Uschia funcziuna la SSR

La SSR è in'uniun averta per tuttas e tuts. Questa uniun maina la chasa da medias SSR publica ed independenta che producescha e derasa en quatter regiuns linguisticas purschidas audiovisualas ed occupa per quai passa 6600 collavuraturas e collavuraturs (chasa principala).

La societad SSR organisescha purschidas audiovisualas dal service public tenor la Lescha da radio e televisiun (LRTV) e tenor la concessiun dal Cussegl federal. Ella consista da quatter societads regiunalas: SRG.D, RTSR, Corsi e SRG.R. Quellas sa cumponan anc ina giada da societads commembras, p.ex. Argovia/Soloturn, Svizra da l'Ost, Giura. Da quellas sa sutdividan insaquantas.

Per cuntanscher sia finamira maina la societad in'interpresa cun las tschintg unitads d'interpresa RSI, RTR, RTS, SRF, SWI (purschida a l'exteriur) e cun las societads affiliadas (Technology and Production Center Switzerland AG, SWISS TXT AG e Telvetia SA).

La societad deleghescha l'interpresa professiunala SSR da cuntanscher la finamira da la societad (guardar «Finamira da la societad SSR»), numnadamain da realisar purschidas audiovisualas. Las quatter societads regiunalas rinforzan la SSR en la societad, animeschan la debatta publica davart in service public actual ed han influenza sin l'orientaziun e la qualitad dals programs da radio e da televisiun e da las ulteriuras purschidas publicisticas a maun da lur gremis ed en il rom da lur cumpetenzas.

Ils statuts da la SSR defineschan las cumpetenzas da la radunanza da delegads. Ultra dals affars statutars, che cumpetan tenor il dretg d'aczias a la radunanza generala, approva la radunanza da delegads sin proposta dal cussegl d'administraziun la tscherna dal directur general, las dumondas dal cussegl d'administraziun davart midaments da la concessiun relevants per la politica da medias ed il rapport annual davart la qualitad ed il service public da la SSR. Ils delegads elegian trais dals nov commembers dal cussegl d'administraziun da la SSR. La radunanza da delegads decretescha il reglament da bunificaziun per sasezza e per il cussegl d'administraziun e po decider davart l'autezza da las taxas da recepziun faschond dumondas al Cussegl federal. Ella definescha, quants daners che stattan a disposiziun annualmain a las societads regiunalas. Ella po però era surdar al cussegl d'administraziun incumbensas d'examinaziun davart il service public e la qualitad: dumondas areguard temas davart la qualitad ed il service public sto il cussegl d'administraziun respunder entaifer sis mais. Ultra da quai prenda la radunanza da delegads enconuschientscha dal reglament d'organisaziun e dals rapports davart la strategia e la realisaziun da la strategia.

La Svizra tudestga ha 18 delegads, la Svizra romanda nov, la Svizra taliana sis e la Svizra rumantscha trais. Latiers vegnan anc tschintg commembers dal cussegl d'administraziun che n'èn betg delegads en la funcziun dals presidents regiunals. La radunanza generala sa cumpona pia da totalmain 41 persunas. Ella sa raduna almain duas giadas l'onn.

Il cussegl d'administraziun ha duas rollas: el è la suprastanza da la societad e la direcziun generala da l'interpresa tenor las reglas dal dretg da la societad anonima e las definiziuns en la LRTV ed en la concessiun. El è responsabel visavi il Cussegl federal da cuntanscher las prescripziuns da prestaziuns legalas e giuridic-concessiunalas (guardar era lingia «Incumbensa e dretg»). Il cussegl d'administraziun controlla l'activitad commerziala e prenda decisiuns davart la strategia, il svilup da l'interpresa ed affars impurtants. Il cussegl d'administraziun surdat al directur general resp. a la directura generala la gestiun da la SSR e la responsabladad per ils programs. Tgi che ha tge cumpetenzas, reglescha l'uschenumnà reglament d'organisaziun. Il cussegl d'administraziun da la SSR cumpiglia nov commembers: ils quatter presidents regiunals da SRG.D, RTSR, Corsi e SRG.R, duas persunas elegidas dal Cussegl federal e trais persunas elegidas da la radunanza da delegads. La presidenta resp. il president vegn elegì/ida da la radunanza da delegads.

La societad SSR sa cumpona da quatter societads regiunalas: SRG.D, RTSR, Corsi e SRG.R. En tut las societads regiunalas datti ils suandants trais gremis: il cussegl regiunal, la suprastanza regiunala ed il cussegl dal public. Il cussegl regiunal tematisescha ils giavischs socials e culturals da la regiun, prendan enconuschientscha dal rapport da las unitads d'interpresa davart la qualitad, il service public ed ils concepts da programs fan dumondas d'examinaziun a la suprastanza regiunala davart concepts da programs, determineschan ils delegads e surpiglian autras incumbensas.

Las suprastanzas regiunalas mainan las societads regiunalas e participeschan tenor ils statuts da la SSR als affars dal cussegl d'administraziun da la SSR ch'èn relevants per ils programs. Ellas defineschan ils concepts da programs da l'unitad d'interpresa correspundenta e distribueschan ils daners tranter las spartas da programs (TV), las chadainas da radio e la multimedia, quai però entaifer in rom definì dal cussegl d'administraziun. Mintga suprastanza regiunala po far propostas al cussegl d'administraziun per la tscherna dal directur da las unitads d'interpresa (RSI, RTR, RTS, SRF) e da tscherts commembers da la direcziun generala. Ils presidents da las societads regiunalas appartegnan ex officio a la radunanza da delegads ed al cussegl d'administraziun da la SSR.

Mintga societad regiunala dispona era d'in cussegl dal public che segirescha il contact stretg tranter ils responsabels da program ed il public da radio e da televisiun e che sustegna la lavur da program cun far constataziuns, propostas ed incitaziuns. En mintga regiun linguistica han ils cussegls dal public organisà in servetsch da mediaziun. Sch'insatgi considerescha p.ex. in'emissiun da televisiun sco betg adequata u cunter la lescha, po el reclamar tar il servetsch da mediaziun. Il servetsch da mediaziun n'ha nagina cumpetenza da relaschar directivas, el vegn però ad empruvar d'intermediar tranter ils realisaturs dal program ed ils aspectaturs malcuntents. Il medem vala per emissiuns da radio e purschidas online. Cunter il giudicat dals servetschs da mediaziun pon ins inoltrar ina procedura da meds legals (q.v.d. che sut tschertas cundiziuns regladas da la LRTV po l'instanza da recurs independenta (UBI), dal Tribunal federal e dal Tribunal europeic dals dretgs uman giuditgar in recurs cunter in'emissiun).

Il directur general da la SSR maina l'interpresa. Tge cumpetenzas ch'el ha precis e co che quellas sa distanzieschan da quellas dal cussegl d'administraziun, è reglà en il reglament d'organisaziun. Il directur general è il superiur dals commembers da la direcziun generala, pia dals directurs da RSI, RTR, RTS e SRF, dal directur d'operaziuns e dal directur da finanzas.

La direcziun generala da la SSR è il gremi operativ il pli aut da la SSR. Ella prepara la strategia da l'interpresa ed è responsabla per la realisaziun. Ella sa fatschenta però era cun ina pluna auters temas, numnadamain cun la purschida (program), il persunal, las finanzas, las immobiglias, la tecnologia ed il dretg. Per ch'ella vegnia a frida cun tut quests temas, sa raduna la direcziun generala var diesch giadas l'onn. Adina preschent è il secretari general da la SSR – era sch'el n'ha nagin dretg da vuschar.

Sch'i na dat ina giada nagin consens areguard ina tractanda, decida il directur general.

La SSR è ina societad. Per ch'ina societad è reconuschida en Svizra, sto la radunanza constitutiva decretar statuts en scrit. Il dretg da las uniuns è la basa giuridica per mintga societad, quai è definì en il Cudesch civil. Statuts specifics che sa basan sin quel preciseschan, co che la societad è definida, organisada e finanziada. Ils statuts vegnan decretads da la radunanza da delegads ed approvads dal Departament federal per ambient, traffic, energia e communicaziun (Datec).

Perquai che la SSR n'è però betg mo ina societad, mabain ina societad ch'è organisada tenor ils princips dal dretg da la societad anonima, na datti en la SSR betg mo statuts, mabain er in reglament d'organisaziun. Quel sa basa sin ils statuts e reglescha p.ex. las cumpetenzas tranter il cussegl d'administraziun e la direcziun generala, fa constataziuns precisas davart las incumbensas dals differents gremis e definescha tschertas premissas organisatoricas, sco p.ex. che las decisiuns dals gremis ston vegnir protocolladas en scrit. Il cussegl d'administraziun decretescha il reglament d'organisaziun.

In'autra ovra directiva relevanta è l'urden da fatschenta. Il reglament d'organisaziun ordinescha ch'il directur general sto decretar in urden da fatschenta. En quel èsi scrit, co che la SSR sto s'organisar entaifer l'interpresa, p.ex. tge cumpetenzas ch'il directur general ha envers ils auters commembers da la direcziun generala u co ch'ins sto organisar las sesidas da la direcziun generala.