Interpresa

La Societad Svizra da Radio e Televisiun (SRG SSR) cumpiglia las quatter unitads regiunalas RTR, SRF, RSI e RTS che contribueschan a l’infurmaziun, al divertiment ed a la furmaziun. Ellas derasan lur programs via radio, televisiun, internet, HbbTV, teletext e servetschs mobils per in e scadina, da tut temp e dapertut per las medemas cundiziuns. Lur purschidas adempleschan pretensiuns da maioritads e da minoritads e cuvran ina vasta paletta da temas. En pli sa distinguan ellas tras qualitad, relevanza e diversitad. En il sectur Purschida vegnan manadas naziunalmain las partiziuns Public e Portfolio da purschida, Datas ed IA d’interpresa, Servetschs d’accessibladad, Mandat per l’exteriur, Ficziun, Sport e Play+. Il sectur Operaziuns definescha e furnescha per tut l’interpresa las prestaziuns da producziun ed ils servetschs da tecnologia.

Cun var 6766 collavuraturas e collavuraturs, respectivamain 5479 plazzas a temp cumplain, cun ina svieuta annuala dad 1,56 milliardas francs, cun 17 programs da radio e 7 programs da televisiun sco era cun paginas d’internet, apps da novitads e servetschs da teletext cumplementars è la SRG SSR la pli gronda interpresa per medias electronicas da la Svizra. Ses programs da radio ed en il temp d’emissiun principal era ses programs da televisiun èn en tut las regiuns linguisticas da la Svizra a la testa dal martgà –ed els sa fan valair cun success cunter numerus emetturs da concurrenza da l’exteriur cun ina capacitad finanziala marcantamain pli solida.