Cultura per l'entira Svizra

La cultura collia la tradiziun cun il preschent e l'avegnir. La cultura sa mida cuntinuadamain ed envida a scuvrir novas chaussas. La cultura dat invista, survista e perspectivas. La cultura è service public.

Viver la cultura en sia diversitad

Nus dain a la scena culturala en Svizra ina plattafurma mediala, e quai en tut il pajais: 12 pertschient dal temp d'emissiun da la televisiun e 5 pertschient da quel dal radio deditgain nus a reportaschas culturalas. Sco partenaria da numerusas occurrenzas gidain nus a crear ed a derasar cultura.

Promover la lavur culturala

Musica, cultura e litteratura reflecteschan la diversitad culturala e linguistica da la Svizra. Nus la promovain cun cleras intenziuns e gidain a purtar la cultura al public. Var 17 pertschient da nossas expensas investin nus en la promoziun da la cultura. Nus na crajain betg mo en la plazza culturala svizra – nus ans engaschain era per ella.

La SSR promova sco partenaria da medias bleras occurrenzas culturalas.

Insatge curra e passa adina

Noss emetturs da radio e televisiun rapportan a moda cumplessiva davart eveniments culturals. Nus dilucidain la scena e ses acturs or da tut las perspectivas e purschain formats multifars: davent da tips da cultura, recensiuns da cudeschs e reportaschas da festivals fin a registraziuns da concerts – en quatter linguas, or da tut las regiuns.

La Svizra – ina naziun da cultura

Tradiziun, mainstream u nischa – la cultura reflectescha la diversitad da la vita e porscha insatge per bunamain tuts: dus terzs da la populaziun svizra produceschan sezs en ina moda u l'autra cultura ed enritgeschan uschia il mintgadi.

Var 70 pertschient da las Svizras e dals Svizzers van almain ina giada ad onn en in museum, ad in concert, a guardar in monument u a kino. Var 50 pertschient van a teater e 20 pertschient visitan regularmain instituziuns culturalas.

Cultura – quai èn:

12 pertschient dal temp d'emissiun da televisiun

5 pertschient dal temp d'emissiun da radio

17 pertschient da las expensas