La SRG SSR reorganisescha sia producziun e creescha in center da cumpetenza digital

Communicaziuns a las medias 11.04.2019

Il cussegl d’administraziun da la SRG SSR ha l'intenziun da transferir il persunal ed ils meds da producziun da la tpc AG sin il 1. da schaner 2020 en l’unitad d’interpresa SRF. Ultra da quai vul el crear in center da cumpetenza per l’infrastructura ed ils servetschs dad IT, la producziun digitala e la distribuziun che vegn manà da la societad affiliada Swiss TXT AG. La reorganisaziun da quests servetschs centrals fa part dal program da refurma e da respargn current e pussibilitescha ensemen cun autras mesiras da spargnar diesch milliuns francs ad onn. La realisaziun succeda cun resalva d’ina procedura da consultaziun.

Bild SRF-Gebäude

La SRG SSR realisescha actualmain in program per 100 milliuns francs per augmentar l’effizienza e pussibilitar reinvestiziuns. Il motiv èn las cundiziuns da basa novas sco la reducziun ed il plafonament da la part da las taxas, in martgà da reclama regressiv, restricziuns en il martgà da reclama digital sco er investiziuns en l’avegnir.

Per schanegiar tant sco pussaivel l’offerta da programs examinescha la SRG SSR primarmain mesiras da spargn en ils secturs da las immobiglias, da l’infrastructura, da la tecnica, dals process da producziun e da l’administraziun. Emprimas mesiras vegnan gia realisadas da preschent. Il cussegl d’administraziun da la SRG SSR ha decidì en sia seduta dad ier d’instradar ulteriurs pass.  

Il center da producziun tecnica tpc fa part da nov da SRF 

Il cussegl d’administraziun da la SRG SSR ha decidì sin recumandaziun dal comité directiv da la SRG SSR d’integrar da nov il center da producziun tecnica tpc en SRF. Quest pass duai simplifitgar l’organisaziun e la coordinaziun da la producziun tranter las unitads d’interpresa. Cun la restructuraziun èsi pussaivel da spargnar custs surtut sin il stgalim dal management. Il cussegl d’administraziun ha incumbensà il comité directiv da la SRG SSR d’elavurar in concept detaglià. Cun resalva da la procedura da consultaziun prescritta legalmain prevesa la SRG SSR da realisar la nova structura sin il 1. da schaner 2020.

Sin fundament da l’integraziun da tpc en SRF han Nathalie Wappler, directura SRF, e Detlef Sold, CEO tpc, decidì en enclegientscha vicendaivla che Detlef Sold bandunia l’interpresa l’entschatta da fanadur. Christoph Gebel, Senior Advisor en la direcziun da SRF, surpiglia la direcziun dal project d’integraziun da tpc ed è responsabel – ensemen cun la direcziun da tpc – per il concept detaglià. A partir dal fanadur e fin che la nova organisaziun cumenza il schaner 2020 vegn Christoph Gebel a surpigliar era la direcziun da tpc.

Ils Business Services naziunals vegnan integrads il pli tard a partir dal 1. da schaner 2020 medemamain en SRF. Quests servetschs spezialisads cumpiglian var 70 plazzas a temp cumplain en la coordinaziun, la planisaziun d’incumbensas, en ils Solution Desks sco er en la transmissiun operativa da tuns, maletgs e datas.  

Nov center da cumpetenza tar Swiss TXT

Il cussegl d’administraziun ha ultra da quai decidì da crear in center da cumpetenza per l’infrastructura ed ils servetschs dad IT, la producziun digitala e la distribuziun. Quest center da cumpetenza duai cumpigliar la societad affiliada Swiss TXT AG (179 collavuraturas e collavuraturs) cun sedia a Bienna sco era l’INIT, l’unitad dad IT e d’infrastructura interna da la SRG SSR (100 collavuraturas e collavuraturs). En pli è e resta Swiss TXT AG il center da cumpetenza per ils Access Services da la SRG SSR. Cun resalva da la procedura da consultaziun prescritta legalmain èsi era previs da realisar quest pass sin il 1. da schaner 2020. 

Consequenzas per il persunal 

Las mesiras decididas duain pussibilitar da spargnar en total diesch milliuns francs ad onn. Igl è da quintar cun ina reducziun da circa 40 plazzas cumplainas, da quellas vegnan var 20 plazzas reducidas cun disditgas e pensiunaments anticipads. Per las persunas pertutgadas datti in plan social che prevesa differentas mesiras mitigiantas. 

La direcziun generala sa concentrescha sin la funcziun da management strategica 

En il rom da las refurmas ha il cussegl d’administraziun approvà ina retscha d’ulteriuras mesiras che permettan a la direcziun generala da far respargns supplementars.

Il directur general da la SRG SSR Gilles Marchand explitgescha: «Nus refurmain la SRG SSR vinavant a moda fundamentala per optimar la flexibladad e l’effizienza e per maximar a medem temp l’offerta da program. Cun la restructuraziun actuala sbassa la SRG SSR ses custs, optimescha ses process da producziun e reducescha la direcziun generala per pudair sa concentrar cumplainamain sin la funcziun da management strategica.»

Tenor Jean-Michel Cina, il president dal cussegl d'administraziun da la SRG SSR, è quai il dretg pass: «Cun questas decisiuns enchaminain nus consequentamain la via da las refurmas annunziadas ils 4 da mars 2018.»

 

Post da medias SRG SSR 
Edi Estermann
medienstelle.srg(at)srgssr.ch | tel. 031 350 95 95