«Dataland»: ina saira tematica naziunala davart l'intelligenza artifiziala e big data

Mesemna, ils 21 da november deditgeschan ils programs da televisiun naziunals da la SSR in'emissiun speziala als temas intelligenza artifiziala e big data. Las quatter staziuns da televisiun RTS, SRF, RSI e RTR emettan in film documentar, intervistas cun expertas ed experts, reportaschas ed ina retschertga d'opiniun davart ina problematica che pertutga tut las Svizras e tut ils Svizzers: en in'emissiun en directa da passa trais uras a partir da las 20.10.

Per Olivier Cajeux, coordinatur interregiunal RTS e manader da project, ha Dataland er ina funcziun didactica. «Cun questa emissiun avain nus la finamira da porscher in'orientaziun fundamentala en in mund che vegn dominà adina pli fitg da datas. Nus vulain explitgar il fenomen uschia ch'in e scadin al chapescha, pertge per ils blers da nus sa tracti d'in tema savens extremamain tecnisà ed abstract».

Dataland è in film documentar en trais episodas davart big data e sias differentas fassettas. L'emissiun ans maina a Dublin, ina citad connectada, nua che l'intelligenza artifiziala determinescha la vita sociala. La segunda etappa è la Finlanda, nua che la populaziun metta a disposiziun sia DNA per optimar ils fatgs da sanadad e la medischina predictiva. Per finir datti in sguard en la China, in pajais che eruescha cumportament punibel cun agid da l'identificaziun da la fatscha. Per illustrar la realitad svizra vegn la part redacziunala accumpagnada da reportaschas filmadas en las differentas parts dal pajais e suttituladas en las quatter linguas naziunalas. La discussiun dal tema vegn cumplettada d'ina retschertga d'opiniun che duai mussar per l'emprima giada la relaziun che las Svizras ed ils Svizzers han cun lur datas e tge temas e spetgas che existan en la populaziun.

Suenter il success da l'ediziun dal 2017 davart il tema clima exprima questa emissiun speziala l'engaschament da la SSR da s'occupar da temas d'interess naziunal che promovan il barat en l'entir pajais e permettan a medem temp da resguardar las particularitads regiunalas. Mintga unitad d'interpresa porscha in program davart temas communabels che sa drizza a sia gruppa en mira enritgì cun numerus inserts per tutgar il puls a tschellas regiuns.

 

«Dataland», mesemna, ils 21 da november, 20.10 sin RTS Un, SRF 1, RSI LA 1 ed SRF info per RTR

 

Post da medias SSR

Sibylle Tornay
medienstelle.srg(at)srgssr.ch / tel. 031 350 95 95