Gulivaziun da finanzas

Sco chasa da medias publica stat la SSR garanta per solidaritad federala. Ella garantescha in'offerta federalistica da purschidas audiovisualas en tut las parts dal pajais e tut las linguas naziunalas.

La SSR è la suletta interpresa da medias che producescha purschidas audiovisualas en tut las quatter regiuns linguisticas ed en tut las quatter linguas naziunalas. Quai è pussaivel grazia a valurs svizras sco la solidaritad ed il federalissem – ellas èn il fundament da nossa identitad ed in mussavia per nossa lavur. Mo grazia a la contribuziun da solidaritad da las Svizras tudestgas e dals Svizzers tudestgs sa la SSR servir era las autras regiuns linguisticas mintga di cun ina purschida da radio, televisiun ed online multifara e da gronda qualitad. Dals 895 milliuns francs che la Svizra tudestga incassescha survegn ella 535 milliuns francs. Ils ulteriurs 360 milliuns francs vegnan redistribuids sco suonda: 115 milliuns retschaiva la Svizra franzosa, 225 milliuns van a favur da la Svizra taliana e 20 milliuns ha la Svizra rumantscha dabun. Cun la gulivaziun da finanzas solidarica fa la SSR ina contribuziun impurtanta a la coesiun naziunala, a la chapientscha vicendaivla ed al barat tranter las regiuns linguisticas.

Ils retgavs da sponsoring, programs e servetschs e la contribuziun da la Confederaziun per SWI swissinfo.ch vegnan declerads directamain tar las unitads d'interpresa. L'assegnaziun dals meds vegn elavurada en il rom dal plan da finanzas e dal process da preventivar e deliberada dal cussegl d'administraziun da la SSR. Ella sa basa sin ils suandants elements:

  • assegnaziun da basa per finanziar la purschida da program eguala en tut las regiuns linguisticas tenor concessiun
  • assegnaziun structurala per cuvrir las expensas per las incumbensas naziunalas communablas, l'infrastructura d'edifizis e la distribuziun dals programs
  • assegnaziuns per incumbensas spezialas, cunzunt per la derasaziun internaziunala da programs
  • assegnaziuns per projects gronds impurtants

Grafica: Rapport da gestiun da la SSR 2022

Actualisà l'ultima giada: fanadur 2023