Audits da qualitad externs 2024

L'onn 2024 ha il team d'audit da la SAS Grischun examinà in sectur redacziunal da las tschintg unitads d'interpresa da la SRG SSR. Ditg concret èn quai stads «Attualità culturale di Rete Due» tar RSI, «Mise au Point» tar RTS, la redacziun da radio «Actualitad» tar RTR, «Puls Check» tar SRF e la plattafurma online SWI swissinfo.ch. Il team da l'audit ha examinà cun egl critic quatter champs: «normas e finamiras», «controlla», «debriefing e resun» sco era «la reelavuraziun da purschidas e dal program». En tut ils champs han ins cuntanschì resultats buns fin excellents.

Il team d'audit da la professuressa Franziska Oehmer-Pedrazzi concluda en sia valitaziun ch'il sistem per garantir la qualitad da la SRG SSR funcziunia fitg bain e correspundia per gronda part a las pretensiuns. El prenda enconuschientscha che las persunas responsablas per la qualitad da la gruppa da lavur naziunala realiseschan las prescripziuns legalas da las mesiras per garantir la qualitad «cun in process per garantir la qualitad circular ed interactiv sur quatter fasas». En general dat il team d'audit in fitg bun attestat al sistem da garantir la qualitad da la SRG SSR.

Recumandaziuns per optimar il sistem 

Garantir la qualitad è in process cuntinuant che sto vegnir adattà d'in cuntin a las novas cundiziuns. Potenzial d'optimar vesa il team d'audit cunzunt en ils suandants secturs:

• Normas e finamiras: Scolaziuns regularas e process d'engaschament pudessan vegnir rinforzads. Ins pudess metter a disposiziun dapli temp per reflectar davart l'integraziun da las valurs en il mintgadi da lavur. Ospitaziuns da redacziun regularas pon promover il process d'emprender communabel ed augmentar l'identificaziun per valurs communablas en il mintgadi.
• Controlla: Il princip da plirs egls pudess vegnir duvrà a moda pli consequenta e sustegnì cun plattafurmas digitalas sco era process standardisads e responsabladads.
• Debriefing / resun: Discurs da resun e process interns pudessan vegnir organisads a moda pli structurada e transparenta. Era funtaunas da feedback externas sco il public, il cussegl dal public u il post da mediaziun pudessan ins implementar pli fermamain.
• La reelavuraziun da purschidas e dal program: Ins pudess investir dapli temp e resursas en dumondas strategicas a lunga vista.

Perspectiva

Las persunas responsablas per la qualitad han prendì enconuschientscha da questas recumandaziuns. Mesiras per las realisar vegnan examinadas e planisadas l'onn suenter che l'audit ha gì lieu.
 

Actualisà: l'avrigl 2025